អន្តរជាតិ
ចិនសួររកភស្តុតាង ក្រោយប្រមុខការទូតអូស្ត្រាលីចោទថា ខ្លួនធ្វើឲ្យរដ្ឋប៉ាស៊ីហ្វិកជួបបញ្ហាបំណុល លោកស្រី Hua Chunying អ្នកនាំពាក្យក្រសួងការបរទេសចិន និងរដ្ឋមន្រ្តីការបរទេសអូស្ត្រាលី Julia Bishop
× នៅថ្ងៃទី១៨ ខែកក្កដា ទីក្រុងប៉េកាំងបានបង្ហាញការមិនសប្បាយចិត្តជាខ្លាំង ជុំវិញសម្ដីចោទប្រកាន់របស់មន្ត្រីអូស្ត្រាលីពាក់ព័ន្ធជំនួយរបស់ចិនទៅកាន់ប្រទេសនៅតំបន់មហាសមុទ្រប៉ាស៊ីហ្វិក។ រដ្ឋមន្ត្រីការបរទេសអូស្ត្រាលី Julia Bishop និយាយថា ចិនទំនងជាធ្វើឲ្យប្រទេសដែនកោះទាំងអស់ធ្លាក់ក្នុងស្ថានភាពបំណុលដែលគ្មានស្ថិរភាព។ ចិនបានស្នើឲ្យអូស្ត្រាលីមើលទំនាក់ទំនងរវាងខ្លួន និងរដ្ឋប៉ាស៊ីហ្វិកក្នុងផ្លូវល្អខ្លះផង។
វត្តមានចិននៅតំបន់មហាសមុទ្រប៉ាស៊ីហ្វិក នៅតែជារឿងដែលធ្វើអូស្ត្រាលីមិនសប្បាយចិត្ត។ ចិនបានបោះលុយដ៏ច្រើនសន្ធឹកសន្ធាប់ទៅឲ្យប្រទេសដែនកោះក្រីក្រនៅក្នុងមហាសុទ្រប៉ាស៊ីហ្វិក ដែលអូស្ត្រាលីចាត់ទុកជាដែនឥទ្ធិពលរបស់ខ្លួន។ តាមរយៈជំនួយ កម្ចី និងការវិនិយោគលើគម្រោងហេដ្ឋារចនាសម្ព័ន្ធធំៗ ទំនាក់ទំនងរវាងចិន និងប្រទេសទាំងនោះកាន់តែស្អិតល្មួត។ ប៉ុន្តែរដ្ឋមន្ត្រីការបរទេសអូស្ត្រាលី Julia Bishop យល់ថា ចិនអាចធ្វើប្រទេសទាំងនោះជួបបញ្ហាបំណុលមិនខាន។
ឆ្លើយតបសំណួរអ្នកសារព័ត៌មានជុំវិញការអធិប្បាយរបស់លោកស្រី Bishop អ្នកនាំពាក្យក្រសួងការបរទេសចិន Hua Chunying ចាត់ទុកសម្ដីប្រមុខការទូតជារឿងចាស់ ព្រោះមន្ត្រីអូស្ត្រាលី និងប្រព័ន្ធផ្សព្វផ្សាយនៅអូស្ត្រាលីខ្លះតែងនិយាយលើសលស់ផង។ ក្នុងសន្និសីទសារព័ត៌មាននៅថ្ងៃទី១៨ ខែកក្កដា លោកស្រី Hua ក៏បានសួររកភស្តុតាងពីមន្ត្រីអូស្ត្រាលីដើម្បីបង្ហាញថា ចិនពិតជាធ្វើឲ្យប្រទេសនៅតំបន់មហាសមុទ្រប៉ាស៊ីហ្វិកប្រឈមមុខបញ្ហា។
«តើពួកគេអាចបង្ហាញឧទាហរណ៍មួយជាមួយនឹងព័ត៌មានជាក់លាក់ពីទីកន្លែង ពេលវេលា និងវិធីសាស្ត្រដែលចិនបង្កើតបំណុលដែលគ្មានស្ថិរភាព? តើពួកគេគិតថាគ្រាន់តែប្រើប្រាស់ពាក្យ «ប្រហែល» អាចដោះសារការចោទប្រកាន់ដោយគ្មានការទទួលខុសត្រូវ និងការការវិនិច្ឆ័យជាមុនរបស់ពួកគេ?» នេះជាសំណួររបស់អ្នកនាំពាក្យខាងលើមុននឹងនិយាយថា ជំនួយរបស់ចិនជួយអភិវឌ្ឍប្រទេសទាំងនោះដែលមានសេដ្ឋកិច្ចកំពុងងើបឡើង ហើយត្រូវការហិរញ្ញវត្ថុ។
មន្ត្រីក្រសួងការបរទេសចិនដដែលក៏បានលើកយកសម្ដីរបស់មន្ត្រីប្រទេសតំបន់មហាប៉ាស៊ីហ្វិកដែលមិនយល់ស្របនឹងជំហររបស់អូស្ត្រាលីផង។ បើតាមការស្រង់សម្ដីលោកស្រី Hua រដ្ឋមន្ត្រីយុត្តិធម៌តុងហ្កា និយាយថា វាជារឿងគួរឲ្យសង្វេគដែលអូស្ត្រាលីចោទចិនជុំវិញការគាំទ្រប្រទេសប៉ាស៊ីហ្វិកដែលកំពុងត្រូវការជំនួយ។ ឯនាយករដ្ឋមន្ត្រីកោះសាម័រវិញលើកឡើងថា សម្ដីរបស់មន្ត្រីអូស្ត្រាលី ជាការមើលងាយមេដឹកនាំដែនកោះប៉ាស៊ីហ្វិក និងធ្វើឲ្យល្អក់កករទំនាក់ទំនងទ្វេភាគីផង។
តាមពិតទៅ តាំងពីដើមមក អូស្ត្រាលី ចាត់ទុកកោះតូចប៉ាស៊ីហ្វិកស្ថិតនៅផ្នែកមួយដែលស្ថិតក្រោមឥទ្ធិពលរបស់ខ្លួន។ ប៉ុន្តែរយៈពេលយូរឆ្នាំមកនេះ ក្រុងកង់បេរ៉ាហាក់ព្រងើយកន្តើយនឹងប្រទេសតូចៗទាំងនោះទៅវិញ។ ចំណែកឯចិនវិញដែលខ្លួនកាន់តែរះត្រដែតឡើងទាំងយោធា និងសេដ្ឋកិច្ចនោះ ប្រឹងពង្រីកឥទ្ធិពលរបស់ខ្លួននៅក្នុងតំបន់នេះដែរដើម្បីប្រជែងមហាអំណាចគីឡូមធ្យមមួយ តាមរយៈការជះលុយមិនស្រណោះដៃ៕
Tag:
ចិន
អូស្ត្រាលី
ប៉ាស៊ីហ្វិក
© រក្សាសិទ្ធិដោយ thmeythmey.com