កីឡាអន្តរជាតិ
អន្តរជាតិ
បារាំង ជំរុញស្ត្រីឲ្យរាយការណ៍ពីការបៀតបៀនផ្លូវភេទអំឡុងពេល World Cup
× មេប៉ូលិសប្រចាំទីក្រុងប៉ារីសនៅថ្ងៃទី១៨ ខែកក្កដា បានជំរុញឲ្យស្ត្រីជាពលរដ្ឋខ្លួនរាយការណ៍ពីករណីបៀតបៀនផ្លូវភេទណាមួយនាអំឡុងការប្រកួតពានរង្វាន់ FIFA World Cup 2018 នៅរុស្ស៊ី បន្ទាប់ពីមានគណនីជាច្រើនរបស់ជនរងគ្រោះវបានបង្ហោះលើប្រព័ន្ធផ្សព្វផ្សាយសង្គមពីករណីនេះនៅប៉ុន្មានថ្ងៃចុងក្រោយនេះ។
ទីភ្នាក់ងារព័ត៌មាន AFP ចុះផ្សាយដូច្នេះថា របាយការណ៍ស្តីពីការចាប់បង្ខំថើប និងសកម្មភាពលុកលាន់បានចាប់ផ្តើមកើតឡើងបន្ទាប់ពីក្រុមជម្រើសជាតិបារាំងបានឈ្នះការប្រកួតវគ្គផ្តាច់ព្រ័ត្រ World Cup ទល់នឹងក្រូអាស៊ី នៅយប់ថ្ងៃទី១៥ ខែកក្កដា ខណៈអ្នកគាំទ្ររាប់សែននាក់បានសម្រុកចូលទៅតាមដងផ្លូវក្នុងក្រុងប៉ារីស និងទីក្រុងដទៃទៀត។
ក្នុងចំណោមអ្នកគាំទ្រទាំងនោះ មានស្ត្រីមួយចំនួនបានរៀបរាប់អំពីការបៀតបៀនផ្លូវភេទនៅពេលអបអរជ័យជម្នះនៅតាមរុក្ខវិថី Champs Elysees នៅក្រោយការប្រកួតមួយថ្ងៃ ដោយអ្នករងគ្រោះទាំងនោះប្រើសញ្ញាសម្គាល់ HasTag #MeTooFoot នៅលើបណ្តាញសង្គមរបស់ពួកគេបន្ទាប់ពីការរំលោភបំពាននោះ។
អ្នកប្រើប្រាស់ Twitter ម្នាក់ដែលមានគណនីឈ្មោះ Isa បានបង្ហោះកាលពីថ្ងៃទី១៦ ខែកក្កដាថា៖«សម្រាប់ខ្ញុំវាបានកើតឡើងនៅពេលបារាំងស៊ុតចូលគ្រាប់ទី៣ ... ពេលនោះខ្ញុំមានអារម្មណ៍ថាមានដៃលុកចូលក្រោមសំពត់របស់ខ្ញុំ»។
ជុំវិញករណីខាងលើនេះ លោក Michel Delpuech មេប៉ូលិសប្រចាំក្រុងប៉ារីស បានប្រាប់វិទ្យុ Europe 1 ថាបញ្ហាទាំងនេះត្រូវតែយកមកពិចារណាដើម្បីឲ្យមានការស៊ើបអង្កេតឡើងវិញ។ លោកបន្ថែមថា៖«ការងាររបស់យើងគឺត្រូវតាមរកជនដៃដល់លើស្ត្រីទាំងអស់មកដាក់ទោសតាមច្បាប់ ប្រសិនបើពួកគេត្រូវបានកំណត់អត្តសញ្ញាណច្បាស់លាស់ហើយនោះ»៕
Tag:
បាល់ទាត់
FIFA World Cup
© រក្សាសិទ្ធិដោយ thmeythmey.com