ជាតិ
សង្គមជាតិ
លោក ស៊ុន ចាន់ថុល៖ កំណាត់ផ្លូវជាតិ៤ ត្រូវបិទ រហូតដល់ទឹកស្រកអស់ លោក ស៊ុន ចាន់ថុន រដ្ឋមន្រ្តីក្រសួងសាធារណការ និងដឹកជញ្ជូន (ពាក់មួកពណ៌ស)។ រូបពីហ្វេសប៊ុករបស់ក្រសួងសាធារណការ
× រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានប្រាប់ទៅអភិបាលខេត្តព្រះសីហនុ ឱ្យបន្តបិទផ្លូវជាតិលេខ៤ ត្រង់ចំណុចស្ពានស្ទឹងច្រាល និងស្ពានស្ទឹងសំរោង។ ការបិទបណ្ដោះអាសន្ននេះ ដោយសារជំនន់ទឹកភ្លៀងនៅតែមិនទាន់ស្រកទាំងស្រុងនៅឡើយ ដែលកំពុងហូរកាត់ផ្លូវ ហើយការធ្វើចរាចរណ៍របស់រថយន្តធុនធ្ងន់នឹងអាចបណ្ដាលឱ្យផ្លូវនេះរងការខូចខាតធ្ងន់ធ្ងរ។
លោក ស៊ុន ចាន់ថុល បានចុះទៅពិនិត្យកំណាត់ផ្លូវជាតិលេខ៤ នៅចំណុចខាងលើ នាព្រឹកថ្ងៃទី២០ ខែកក្កដានេះ ដោយមានការចូលរួមពីអភិបាលខេត្តព្រះសីហនុ និងកំពង់ស្ពឺ ព្រមទាំងមន្ត្រីបច្ចេកទេសខាងផ្លូវ ហើយនិងមន្ត្រីពាក់ព័ន្ធផងដែរ។
លោករដ្ឋមន្ត្រី បានលើកឡើងថា ក្រុមបច្ចេកទេសនឹងចាប់ផ្តើមជួសជុល និងស្តារការខូចខាតហេដ្ឋារចនាសម្ព័ន្ធផ្លូវថ្នល់ និងស្ពានឡើងវិញជាបន្ទាន់ បន្ទាប់ពីជំនន់ទឹកភ្លៀងបានស្រកទៅវិញ ដើម្បីធានាឱ្យមាននិរន្តរភាពចរាចរណ៍ជាប្រក្រតី។
លោក បន្ថែមថា បច្ចុប្បន្ន ផ្លូវនេះ មានប្រវែង៧ម៉ែត្រ (ទទឹង) ដូច្នេះក្រសួងគ្រោងនឹងពង្រីកដល់ទៅ១៤ម៉ែត្រ ហើយនិងខ្ពស់ជាងនេះ ដើម្បីកុំឱ្យជន់លិចពីទឹកភ្លៀងបន្តទៀត ហើយសម្រាប់គម្រោងនេះ ប្រាក់កម្ចីពីធនាគារពិភពលោក។ លោក និយាយទៀតថា ក្នុងករណី ដែលរថយន្តដឹកទំនិញធុនធ្ងន់អាចផ្ទេរដាក់តាមផ្លូវដែកសិន ដើម្បីរក្សាស្ថានភាពផ្លូវថ្នល់។
កំណាត់ផ្លូវជាតិលេខ៤ ដែលលិចទឹក។ រូបពីក្រសួងសាធារណការ
ព័ត៌មានដែលបង្ហោះលើទំព័រហ្វេសប៊ុរបស់ក្រសួងសាធារណការ បានឲ្យដឹងថា ក្រៅពីកំណាត់ផ្លូវជាតិលេខ៤ និងកំណាត់ផ្លូវខេត្តលេខ១៣២ រួមទាំងផ្លូវជាតិ និងផ្លូវខេត្តមួយចំនួនទៀត ក៏ទទួលរងការខូចខាតស្រទាប់ផ្លូវផ្នែកផ្ទៃខាងលើផងដែរ ដែលបង្កឲ្យមានការលំបាកធ្វើចរាចរណ៍៕
Tag:
ទឹកភ្លៀង
ផ្លូវជាតិលេខ៤
ស៊ុន ចាន់ថុន
© រក្សាសិទ្ធិដោយ thmeythmey.com