កីឡាករនីហ្សេរីយ៉ា Emmanuel លើកទង់ជាតិខ្មែរក្នុងព្រឹត្តិការណ៍ ONE Warrors នៅសិង្ហបុរី

កីឡាជាតិ

ជាតិ

កីឡាករនីហ្សេរីយ៉ា Emmanuel លើកទង់ជាតិខ្មែរក្នុងព្រឹត្តិការណ៍ ONE Warrors នៅសិង្ហបុរី

20, Jul 2018 , 1:20 pm

រូបភាព

ដោយ:

អ្នកលេងគុនខ្មែរនីហ្សេរីយ៉ា Emmanuel Onyedikachi ដែលហ្វឹកហាត់នៅក្លិបរបស់កីឡាករ ចាន់ រតនា បានលើកទង់ជាតិកម្ពុជាក្នុងព្រឹត្តិការណ៍ ONE Warrors Series 2 នៅប្រទេសសិង្ហបុរី ក្រោយរូបគេយកឈ្នះកីឡាករឥណ្ឌា។ ជាមួយគ្នានេះ កីឡាករ ចាន់ សំអាត បានរងការខកចិត្តក្រោមថ្វីដៃកីឡាករហ្វីលីពីន Michael Fangki ទាំងមិនអស់ចិត្ត។

កីឡាករនីហ្សេរីយ៉ា Emmanuel Onyedikachi បានបង្ហាញភាពខ្លាំងលើឆាកអន្តរជាតិលើកដំបូងរបស់ខ្លួន តាមរយៈការផ្តួលកីឡាករឥណ្ឌា Sandeep Kumar Dahiya ឲ្យបោះបង់ការប្រកួតត្រឹមទឹកទី១ក្នុងព្រឹត្តិការណ៍ ONE Warrors Series 2 នៅប្រទេសសិង្ហបុរី កាលពីយប់ថ្ងៃទី១៩ ខែកក្កដា ឆ្នាំ២០១៨។

ជ័យជម្នះរបស់កីឡាករនីហ្សេរីយ៉ារូបនេះ គឺបន្ទាប់ពីរូបគេប្រើជើងទាត់រហូតធ្វើឲ្យកីឡាករឥណ្ឌាខូចជើងស្តាំយ៉ាងធ្ងន់ធ្ងររហូតមិនអាចបន្តការប្រកួតបាន។ អ្វីដែលជាមោទកភាពសម្រាប់កម្ពុជានោះ គឺកីឡាករនីហ្សេរីយ៉ារូបនេះ បានពាក់ទង់ជាតិកម្ពុជានៅលើស្មា ពេលអាជ្ញាកណ្តាលលើកដៃឲ្យរូបគេឈ្នះកីឡាករឥណ្ឌា។

តែអ្វីដែលគួរឲ្យសោកស្តាយក្នុងព្រឹត្តិការណ៍នេះ គឺមិត្តរួមក្រុមកីឡាករ ចាន់ សំអាត បានប្រកួតចាញ់កីឡាករហ្វីលីពីន Michael Fangki ត្រឹមទឹកទី១ទាំងមិនអស់ចិត្ត។ ព្រោះ កីឡាករ ចាន់ សំអាត មិនបានប្រើស្នៀតពិសេសណាមួយ តបតជាមួយកីឡាករហ្វីលីពីនខាងលើនោះឡើយ។ គ្រាន់តែស្នូរជួងទឹកទី១ចាប់ផ្តើមមិនបានប៉ុន្មានផង កីឡាករ Michael Fangki បានឡើងជិះពីលើកីឡាករ ចាន់ សំអាត នឹងបានប្រើកណ្តាប់ដៃរួមជាមួយកែងមកលើ សំអាត ដែលព្យាយាមរើបម្រាស់ពីការគ្របសង្កត់។ កីឡាករហ្វីលីពីនរូបនេះ បានគ្រប់គ្រងស្ថានការណ៍រហូតអាជ្ញាកណ្តាលបញ្ឈប់ការប្រកួតត្រឹមទឹកទី១តែម្តង។

ជ័យជម្នះនេះមានន័យថា វាដូចនឹងអ្វីដែលកីឡាករហ្វីលីពីនរូបនេះបាននិយាយទុកមុនមែន។ មុនការប្រកួតមកដល់កីឡាករហ្វីលីពីនខាងលើ បានបោះសម្តីឌឺដងឲ្យកីឡាករ ចាន់ សំអាតថា ត្រៀមតែរងការខកចិត្តឲ្យ ហើយទៅ៕