ជាតិ
សេដ្ឋីខ្មែរបួនរូប ត្រូវបានអង្គការអន្តរជាតិមួយ សុំឲ្យអាមេរិក ដាក់ទណ្ឌកម្ម រូបគំនូរដែលតំណាងឧកញ៉ាទាំងបួន ត្រូវបានផលិតដោយអង្គការ Global Witness។ ពីឆ្វេងទៅស្តាំ៖ លោក ម៉ុង ឫទ្ធី, លោក លី យ៉ុងផាត់, លោក ទ្រី ភាព, លោក ឡៅ ម៉េងឃីន។
× ឧកញ៉ាខ្មែរបួនរូប គឺលោក ម៉ុង ឫទ្ធី លោក លី យ៉ុងផាត់ លោក ទ្រី ភាព និងលោក ឡៅ ម៉េងឃីន ត្រូវបានអង្គការឃ្លាំមើលពិភពលោកមួយឈ្មោះ Global Witness បញ្ជូលទៅក្នុងបញ្ជីខ្មៅ ហើយក៏ស្នើឲ្យសហរដ្ឋអាមេរិក ដាក់ទណ្ឌកម្មលើពួកគេ។ ក្នុងចំណោមអ្នកទាំងបួន មានម្នាក់ ចេញមកបកស្រាយ និងបង្ហាញពីភាពស្អាតស្អំរបស់ខ្លួន។
ខណៈការបោះឆ្នោតនៅកម្ពុជា ជិតមកដល់ Global Witness ស្រាប់តែចេញសេចក្តីប្រកាសព័ត៌មានមួយ នៅពីថ្ងៃ២០ខែកក្កដា ឆ្នាំ២០១៨ ស្តីពីការស្នើឲ្យសហរដ្ឋអាមេរិក ដាក់ទណ្ឌកម្មលើឧកញ៉ាខ្មែរបួនរូប។ សេចក្តីប្រកាសព័ត៌មាននេះ មានចំណងជើងថា «តើអ្នកណាខ្លះ ដែលទទួលបានផលប្រយោជន៍ពីការសម្លាប់លទ្ធិប្រជាធិបតេយ្យនៅកម្ពុជា?»។
Global Witness ដែលតែងតែចេញរបាយការណ៍ទិតៀនរដ្ឋាភិបាលកម្ពុជា និងធ្លាប់បើកកកាយពីមុខជំនួយរបស់ក្រុមគ្រួសារសម្តេចនាយករដ្ឋមន្ត្រី ហ៊ុន សែន នាពេលកន្លងមក បានចោទជារួមលើឧកញ៉ាទាំងបួនថា ធ្វើជំនួញមិនត្រឹមត្រូវ។ ក្នុងចំណោមអ្នកទាំងបួន អ្នកខ្លះ ត្រូវបានអង្គការឃ្លាំមើលពិភពលោកមួយនេះ ចោទថា រំលោភដីធ្លីរបស់ប្រជាពលរដ្ឋ និងរកស៊ីកាប់ឈើ ហើយអ្នកខ្លះ រងការចោទប្រកាន់ថា បូមខ្សាច់លក់ និងរត់ពន្ធកញ្ឆា ជាដើម។
Global Witness ក៏បានអះអាងដែរថា អ្នកជំនួញល្បីឈ្មោះទាំងបួន ដើរតួនាទីយ៉ាងសកម្មក្នុងការសម្លាប់លទ្ធិប្រជាធិបតេយ្យ និងការរំលោភសិទ្ធិមនុស្សនៅកម្ពុជា។ អង្គការនេះ ថែមទាំង លើកឡើងថា អ្នកជំនួញខាងលើ តែងរួចផុតសំណាញ់ច្បាប់ (និទណ្ឌភាព) ដោយសារតែពួកគេ គឺជាខ្នងបង្អែកដ៏សំខាន់របស់សម្តេច ហ៊ុន សែន ក្នុងការគាំទ្រផ្នែកនយោបាយ និងការផ្គត់ផ្គង់ផ្នែកហិរញ្ញវត្ថុដល់យោធា។
អង្គការឃ្លាំមើលពិភពលោក បានសង្កត់ធ្ងន់យ៉ាងដូច្នេះថា៖«អ្នកជំនួញទាំងនោះ ទទួលបានផលចំណេញយ៉ាងសម្បើម ពីការកាន់អំណាចរបស់លោក ហ៊ុន សែន»។
លោក ម៉ុង ឫទ្ធី ដែលជាមនុស្សម្នាក់ ក្នុងចំណោមមនុស្សទាំងបួន បានច្រានចោលទាំងស្រុងនូវរាល់ការចោទប្រកាន់របស់ Global Witness។ តាមរយៈការផ្តល់បទសម្ភាស់ដល់សារព័ត៌មានថ្មីៗតាមទូរសព្ទ នៅរសៀលថ្ងៃទី២១ ខែកក្កដា ឆ្នាំ២០១៨នេះ លោក ម៉ុង ឫទ្ធី បានបកស្រាយយ៉ាងដូច្នេះថា៖«គេចោទ ជាសិទ្ធិរបស់គេ។ និយាយឲ្យខ្លី គឺជារឿងនយោបាយទេ នៅពេលការបោះឆ្នោតជិតមកដល់»។
បច្ចុប្បន្ន តំណាងរាស្ត្រសហរដ្ឋអាមរិកមួយចំនួន កំពុងធ្វើច្បាប់ថ្មីមួយទៀត ដើម្បីដាក់ទណ្ឌកម្មបន្ថែមមកលើរដ្ឋាភិបាលកម្ពុជា។ នេះជាមូលហេតុ ដែល Global Witness សម្រេចចិត្តស្នើទៅសហរដ្ឋអាមេរិក ឲ្យដាក់ទណ្ឌកម្មលើឧកញ៉ាទាំងបួន ដោយមិនបានស្នើទៅប្រទេសណាផ្សេង។
ម្យ៉ាងទៀត ប្រទេសមហាអំណាចមួយនេះ បានធ្វើសកម្មភាពជាក់ស្តែងរួចហើយ ក្នុងការដាក់ទណ្ឌកម្មលើកម្ពុជា ដូចជា ផ្តាច់ជំនួយលើការបោះឆ្នោត និងរឹតបន្តឹងការផ្តល់ទិដ្ឋាការដល់មន្ត្រីកម្ពុជា។ ថ្មីៗនេះ នាយឧត្តមសេនីយ៍ ហ៊ីង ប៊ុនហៀង មេអង្គរក្សរបស់សម្តេច ហ៊ុន សែន ត្រូវបានសហរដ្ឋអាមេរិក បង្កកទ្រពសម្បត្តិ ដោយចោទថាលោក ពាក់ព័ន្ធនឹងការរំលោភសិទ្ធិមនុស្ស។
ចំណែកឯ មេប្រដាប់អាវុធជាន់ខ្ពស់១៤រូបរបស់កម្ពុជា ក៏ទើបនឹងរងការចោទប្រកាន់ពីអង្គការឃ្លាំមើលសិទ្ធិមនុស្ស (Human Rights Watch) ថាជាប់ពាក់ព័ន្ធនឹងការរំលោពសិទ្ធមនុស្សដូចគ្នា៕
Tag:
បោះឆ្នោត
Global Witness
ឧកញ៉ាខ្មែរ
ទណ្ឌកម្ម
អាមេរិក
© រក្សាសិទ្ធិដោយ thmeythmey.com