ត្រាំ ឆ្លើយទៅអ៊ីរ៉ង់៖ ឈប់គំរាមអាមេរិក បើមិនចង់ជួបមហន្តរាយដូចប្រទេសខ្លះ

អន្តរជាតិ

ត្រាំ ឆ្លើយទៅអ៊ីរ៉ង់៖ ឈប់គំរាមអាមេរិក បើមិនចង់ជួបមហន្តរាយដូចប្រទេសខ្លះ

23, Jul 2018 , 8:39 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ ទំនងជាក្ដៅសឹ្លកត្រចៀកខ្លាំងហើយ ក្រោយឮសម្ដីរបស់ប្រធានាធិបតីអ៊ីរ៉ង់ ហាសាន់ រូហានី ដែលប្រាប់ឲ្យអាមេរិកប្រយ័ត្នប្រយែងនយោបាយរបស់ខ្លួនលើអ៊ីរ៉ង់។ តាមរយៈ Twitter របស់ខ្លួននៅថ្ងៃទី២២ ខែកក្កដា លោក ត្រាំ បានប្រាប់មេដឹកនាំអ៊ីរ៉ង់ឲ្យឈប់ប្រើប្រាស់សម្ដីគំរាមអាមេរិកម្ដងទៀត បើមិនចង់ជួបបញ្ហាធំទេនោះ ប៉ុន្តែលោកមិនប្រាប់ថា នឹងចាត់វិធានការបែបណាឡើយ។

ប្រយោគមួយឃ្លារបស់ប្រធានាធិបតីអ៊ីរ៉ង់ ហាសាន់ រូហានី ទៅកាន់ប្រធានាធិបតីអាមេរិក ដូណាល់ ត្រាំ «កុំលេងកន្ទុយតោឲ្យសោះ» ពិតជាធ្វើឲ្យលោក ត្រាំ អត់ទ្រាំមិនបានរហូតសរសេរសារលើ Twitter គំរាមផ្ដល់មេរៀនជូរចត់ឲ្យអ៊ីរ៉ង់វិញ។ សង្គ្រាមពាក្យសម្ដីរវាងអាមេរិក និងអ៊ីរ៉ង់បានពុះកញ្ជ្រោលឡើងនៅចុងសប្ដាហ៍មុន បន្ថែមពីលើការមិនចុះសម្រុងគ្នាស្រាប់ បន្ទាប់ពីអាមេរិកដើរចេញពីកិច្ចព្រមព្រៀងនុយក្លេអ៊ែរឆ្នាំ២០១៥ មកនោះ។

ក្នុងសំណេរជាអក្សរធំៗលើបណ្ដាញសង្គម Twitter របស់ខ្លួន លោកប្រធានាធិបតី ត្រាំ គំរាមលោក រូហានី ដោយផ្ទាល់ថា៖ «មិនត្រូវគំរាមអាមេរិកម្ដងទៀតឡើយ បើមិនចង់ជួបគ្រោះមហន្តរាយដូចប្រទេសមួយចំនួនធ្លាប់ជួបក្នុងប្រវត្តិសាស្ត្រទេនោះ»។ ខណៈមិនបង្ហើបពីអ្វីដែលអាមេរិកអាចធ្វើនោះ មេដឹកនាំអាមេរិករូបនេះទំនងចង់រំឭកអ៊ីរ៉ង់ពីអ្វីដែលកើតឡើងកាលពីឆ្នាំ១៩៤៥ គឺពេលដែលអាមេរិកទម្លាក់គ្រាប់បែកនុយក្លេអ៊ែរពីរគ្រាប់លើជប៉ុន។

បន្ថែមពីលើការគំរាមអ៊ីរ៉ង់ លោក ត្រាំ ក៏ប្រកាសជំហររបស់អាមេរិកដែលឈប់ធ្វើតាមសម្ដីទាមទារដ៏ឆ្កួតឡប់អ៊ីរ៉ង់ និងពោរពេញដោយហិង្សា និងសេចក្ដីស្លាប់។ ចុងបញ្ចប់នៃសារតាមបណ្ដាញសង្គម ប្រធានាធិបតីអាមេរិកក៏ផ្ញើសារឲ្យអ៊ីរ៉ង់ប្រយ័ត្នខ្លួនដែរ។ សម្ដីរបស់លោក ត្រាំ ជាការឆ្លើយតបនឹងសម្ដីគំរាមរបស់លោក រូហានី ដែលប្រាប់លោក ថា សង្គ្រាមជាមួយអ៊ីរ៉ង់ គឺជាសង្គ្រាមដ៏ធំក្នុងប្រវត្តិសាស្ត្រពិភពលោកតែម្ដង។

នារយៈពេលចុងក្រោយនេះ អ៊ីរ៉ង់ បានក្លាយជាគោលដៅវាយប្រហាររបស់អាមេរិក ស្របពេលបញ្ហាជាមួយកូរ៉េខាងជើងបានធូរស្រាលខ្លះ។ តាំងពីពេលឃោសនារកសំឡេងឆ្នោតមកទល់ពេលបច្ចុប្បន្ន លោក ត្រាំ មិនដែលពេញចិត្តសកម្មភាពរបស់អ៊ីរ៉ង់ឡើយ ហើយបានដាក់ចេញនយោបាយតឹងរ៉ឹងប្រឆាំងអ៊ីរ៉ង់ផង។ ក្រោយដើរចេញពីកិច្ចព្រមព្រៀងនុយក្លេអ៊ែរឆ្នាំ២០១៥ លោកក៏ប្រុងដាក់ទណ្ឌកម្មសេដ្ឋកិច្ចមិនធ្លាប់មានក្នុងប្រវត្តិសាស្ត្រប្រឆាំងអ៊ីរ៉ង់ទៅទៀត។

ថ្មីៗនេះទៀតសោត អាមេរិកក៏ចង់ឲ្យប្រទេសជុំវិញពិភពលោកឈប់នាំចូលប្រេងពីអ៊ីរ៉ង់ ដើម្បីដាក់សម្ពាធឲ្យមហាអំណាចតំបន់មជ្ឈិមបូព៌ាមួយនេះបន្ទន់ឥរិយាបថរបស់ខ្លួន។ ចំណាត់បែបនេះរបស់អាមេរិក អាចធ្វើឲ្យពិភពលោកជួបបញ្ហាខ្លាំង ព្រោះអ៊ីរ៉ង់អាចញ៉ុកច្រកដឹកជញ្ជូនប្រេងនៅសមុទ្រ Hormuz មិនខាន៕