ជាតិ
អភិបាលខេត្តសៀមរាបពន្លឿនឲ្យដោះស្រាយបញ្ហាពលរដ្ឋដែលរស់នៅលើទួលបុរាណ
× សៀមរាប៖ រមណីយដ្ឋានអង្គរ ត្រូវបានចុះបញ្ជីក្នុងសម្បត្តិបេតិកភណ្ឌពិភពលោករបស់អង្គការយូណេស្កូ នៅឆ្នាំ១៩៩២។ ដើម្បីគោរពទៅតាមគោលការណ៍នានានៃច្បាប់បេតិកភណ្ឌពិភពលោក អាជ្ញាធរជាតិអប្សរាដែលមានតួនាទីគ្រប់គ្រងរមណីយដ្ឋាន ត្រូវប្រាកដថាថែរក្សាទេសភាពវប្បធម៌នានាឱ្យនៅនិរន្ដរភាព តួយ៉ាងមិនត្រូវឱ្យមានសំណង់កើនឡើងក្នុងតំបន់នេះឡើយ។ ចំណុចនេះហើយដែលការសាងសង់ផ្សេងៗ ត្រូវបានរិតត្បិតជាខ្លាំង។
ពិតណាស់ថា គោលការណ៍នេះមិនបានឱ្យពលរដ្ឋដែលមិនយល់ពីបញ្ហាបេតិកភណ្ឌ សប្បាយចិត្តឡើយ។ ហើយទីកន្លែងមួយចំនួន ត្រូវបានទន្ទាញលួចចូលរស់នៅដោយខុសច្បាប់ តួយ៉ាងនៅលើទួល ស្រះ និងប្រឡាយបុរាណមួយចំនួន។ ប៉ុន្តែនៅលើទួលខ្លះ ត្រឹមជាទួលបុរាណធម្មតា ដែលគួររៀបចំឱ្យប្រជាពលរដ្ឋអាស្រ័យបានដែរ។
អភិបាលខេត្តសៀមរាប លោក ឃឹម ប៊ុនសុង បានលើកទឹកចិត្តឱ្យអាជ្ញាធរធ្វើការរួមគ្នា ដើម្បីដោះស្រាយដល់ប្រជាពលរដ្ឋប្រមាណជាង១០០គ្រួសារ ដែលកំពុងរស់នៅលើទីទួលបុរាណមួយកន្លែងក្នុងសង្កាត់គោកចក។ ការលើកឡើងនេះធ្វើឡើងនៅក្នុងពិធីចែកវិញ្ញាបនបត្រសម្គាល់កម្មសិទ្ធិដីធ្លីជូនប្រជាពលរដ្ឋក្នុងសង្កាត់គោកចក ដែលធ្វើឡើងនៅថ្ងៃទី២៣ កក្កដា នៅបរិវេណប្រាសាទវត្តគោកចក។
ប្រជាពលរដ្ឋដែលរស់នៅលើទួលបុរាណនោះសរុបមានចំនួន ១៦០គ្រួសារ ដែលមានសិទ្ធិអាស្រ័យផលធម្មតា តែមិនអាចអភិវឌ្ឍន៍អ្វីបានឡើយ។ លោក ឃឹម ប៊ុនសុង ចង់ឱ្យអាជ្ញាធរពន្លឿន និងចុះមើលជាក់ស្ដែងដល់កន្លែងទួលបុរាណនោះ តើថាវាមានលទ្ធភាពផ្តល់ជូនពលរដ្ឋប៉ុន្មានគ្រួសារអាចកាន់កាប់ និងទទួលបានបណ្ណសម្គាល់ដីពីសូរិយោដី។ យ៉ាងណា លោកអភិបាលបានប្រាប់ពលរដ្ឋថា ត្រូវស្គាល់កន្លែងបុរាណដ្ឋាន ដោយមិនត្រូវចេះតែរំលោភចូលទៅនៅទេ ព្រោះអាចបាត់បង់ប្រយោជន៍ធំបាន ព្រោះទីទាំងនោះត្រូវបានការពារដោយស្ថាប័នជាតិ និងអន្ដរជាតិ។
អ្នកនាំពាក្យសាលាខេត្តសៀមរាប លោក លី សំរិទ្ធ បានឱ្យដឹងថា កន្លងមកអាជ្ញាធរធ្លាប់បានធ្វើការជាច្រើនជាមួយអាជ្ញាធរជាតិអប្សរា និងបានបង្រួមទួលបុរាណដែលមិនមានសារប្រយោជន៍ខ្លះ សម្រាប់ឱ្យពលរដ្ឋអាស្រ័យផល។ លោកបន្ថែមថា៖«...កុំទុក (ទួល ឬត្រពាំង) ធំពេក។ អភិរក្សកុំប៉ះពាល់ធ្ងន់ធ្ងរដល់ពលរដ្ឋ បើជាទួលធម្មតា ទួលអ្នកតាយូរហើយ ឬត្រពាំងដែលអស់ប្រយោជន៍ គោកអស់ហើយ គួរតែចែកឱ្យពលរដ្ឋប្រើប្រាស់កាន់កាប់»។
ទាក់ទងនឹងពលរដ្ឋនៅសង្កាត់គោកចក លោក លី សំរិទ្ធ ថ្លែងថានឹងពិភាក្សាជាមួយអាជ្ញាធរជាតិអប្សរា ដើម្បីពិនិត្យលើទួលបុរាណមួយចំនួន ប៉ុន្តែលោកមិនគាំទ្រដល់ពលរដ្ឋខ្លះ ដែលចូលចាក់ដី និងកាន់កាប់ក្នុងត្រពាំងបុរាណ ដែលជាប្រព័ន្ធរំដោះទឹកក្នុងក្រុងអង្គរ និងក្រុងសៀមរាបឡើយ។ លោក លី សំរិទ្ធ បន្តថា អាជ្ញាធរមិនបណ្ដោយឱ្យការរស់នៅពលរដ្ឋ ប៉ះពាល់ដល់ការអភិវឌ្ឍក្រុង ឬធ្វើឱ្យប៉ះពាល់ប្រយោជន៍ជាតិជាដាច់ខាត ពួកគេគួរមើលឃើញពីគុណវិបត្តិទៅថ្ងៃក្រោយ។
គួរបញ្ជាក់ថា ពលរដ្ឋជាង ២ពាន់គ្រួសារ បានទទួលវិញ្ញាបនបត្រសម្គាល់ដីធ្លីពីសាលាខេត្តសៀមរាប ក្នុងនោះមានភូមិ ត្រពាំងសេះ ភូមិកស្សិណខាងត្បូង និងភូមិវាល សង្កាត់គោកចក ដែលជាព្រំប្រទល់ក្នុងតំបន់២នៃរមណីយដ្ឋានអង្គរ។ ពលរដ្ឋដែលទទួលបានបណ្ណកម្មសិទ្ធិដីធ្លីបានសម្ដែងអារម្មណ៍រីករាយ ខណៈពលរដ្ឋផ្សេងទៀត ដែលមានព្រំដីក្នុងតំបន់អង្គរ មិនសប្បាយចិត្តត្បិតពួកគេមិនអាចអភិវឌ្ឍន៍អ្វីផ្សេងលើសំណង់ផ្ទះដែលពួកគេរស់នៅ។ យ៉ាងណា លោកអភិបានខេត្តបានអះអាងថា នឹងបន្តដោះស្រាយបញ្ហានេះជាមួយអាជ្ញាធរជាតិអប្សរាជាបន្តទៀត៕
© រក្សាសិទ្ធិដោយ thmeythmey.com