ជាតិ
សង្គមជាតិ
អភិបាលខេត្តព្រះសីហនុ និងមន្ត្រីជាន់ខ្ពស់ចិន រួមគ្នាដោះស្រាយអសន្តិសុខដែលបង្កដោយជនជាតិចិន រូបភាពពីហ្វេសប៊ុក រដ្ឋបាលខេត្តព្រះសីហនុ
× កម្ពុជា-ចិន បានបង្កើនកិច្ចសហប្រតិបត្តិជាមួយគ្នាលើវិស័យជាច្រើន។ កិច្ចសហប្រតិបត្តិការនេះ លំហូរនៃជនជាតិចិន ដែលបានចូលមកវិនិយោគ និងរស់នៅកម្ពុជាជាច្រើន ក្នុងរយៈពេលប៉ុន្មានឆ្នាំកន្លងមកនេះ ជាពិសេសនៅខេត្តព្រះសីហនុ។ ការមកដល់ទាំងអ្នកវិនិយោគ និងអ្នកមកធ្វើការនៅខេត្តព្រះសីហនុនេះ មានជនជាតិចិនមួយចំនួន មិនគោរពច្បាប់កម្ពុជា ហើយបានបង្កអសន្តិសុខ និងបង្កើតជាបទល្មើសផ្សេងៗ។ មន្ត្រីជាន់ខ្ពស់នៃស្ថានទូតចិន បានប្រាប់ទៅអភិបាលខេត្តព្រះសីហនុថា បើមានជនជាតិចិនណាបង្កអសន្តិសុខ ត្រូវផ្ដល់ដំណឹងទៅស្ថានទូត ដើម្បីចាត់ការជនជាតិនោះ។
ភារៈធារីនៃស្ថានទូតចិនប្រចាំនៅកម្ពុជា លោក ជា លី បានប្រាប់ទៅអភិបាលខេត្តព្រះសីហនុ លោក យន្ត មីន ថា ការផ្ដល់ដំណឹងនេះឲ្យស្ថានទូតចិន ដើម្បីជួយសហការដោះស្រាយ ដោយធ្វើយ៉ាងណាឱ្យសាធារណជនទូទៅ មានទំនុកចិត្ត និងឥតព្រួយបារម្ភអំពីអសន្តិសុខ ដែលកើតឡើងចំពោះមុខ។ នេះបើតាមទំព័រហ្វេសប៊ុករដ្ឋបាលខេត្តព្រះសីហនុ។
ការលើកឡើងរបស់លោក ជា លី គឺធ្វើឡើងនៅក្នុងជំនួបជាមួយលោក យន្ត មីន លើការពង្រឹងសន្តិសុខសុវត្ថិភាព និងការអភិវឌ្ឍនៅខេត្តព្រះសីហនុ ខណៈក្រុមហ៊ុនវិនិយោគចិន ចាប់អារម្មណ៍យ៉ាងខ្លាំងលើខេត្តនេះ។ លោក ជា លី បានសរសើរលោក យន្ត មីន ថា បានដឹកនាំអភិវឌ្ឍខេត្តព្រះសីហនុ ឱ្យមានការរីកចម្រើនលឿន គួរឱ្យកត់សម្គាល់ ហើយថ្មីៗនេះ វត្តមានអាគារខ្ពស់ៗ បាននឹងកំពុងរីកព្រោងព្រាតនៅក្នុងខេត្តមួយនេះ។
លោក ជា លី បានបន្តទៀតថា ក្នុងនាមស្ថានទូតចិន ក៏ជាប្រទេសចិន មានការគាំទ្រគោលនយោបាយរបស់រាជរដ្ឋាភិបាលកម្ពុជា និងប្តេជ្ញាជំរុញឱ្យមានការអភិវឌ្ឍថែមទៀត លើវិស័យវិនិយោគនិងសន្តិសុខផងដែរ។
ជាការឆ្លើយតប លោក យន្ត មីន មានប្រសាសន៍ថា ខេត្តព្រះសីហនុ ស្វាគមន៍អ្នកវិនិយោគ និងអ្នកទេសចរគ្រប់សញ្ជាតិដោយឥតកាន់ថាសាសន៍ណាឡើយ។ ហើយក្នុងនាមថ្នាក់ដឹកនាំខេត្ត លោក សូមធានាចំពោះសន្តិសុខ សុវត្ថិភាពដល់គ្រប់ជាតិសាសន៍ មិនថាពលរដ្ឋខ្មែរ អ្នកវិនិយោគ និងភ្ញៀវទេសចរណាទេ។
លោក បញ្ជាក់ដូច្នេះថា៖«ខេត្តព្រះសីហនុ មានសមត្ថភាពគ្រប់គ្រាន់ក្នុងការការពារទប់ស្កាត់ ដើម្បីបុព្វហេតុសន្តិសុខ សុវត្ថិភាព កុំឱ្យមានការព្រួយបារម្ភអ្វីឡើយ»៕
Tag:
កម្ពុជា
ចិន
យន្ត មីន
ជា លី
© រក្សាសិទ្ធិដោយ thmeythmey.com