ជាតិ
បោះឆ្នោត
នយោបាយជាតិ
ទូតអាមេរិក ប្រាប់ពលរដ្ឋខ្លួនឲ្យប្រយ័ត្នពីសុវត្ថិភាព ក្នុងអំឡុងពេលបោះឆ្នោតនៅកម្ពុជា លោក william heidt ឯកអគ្គរដ្ឋទូតអាមេរិកប្រចាំកម្ពុជា
× ស្ថានទូតអាមេរិក បានផ្ញើសារ ទៅកាន់ប្រជាពលរដ្ឋរបស់ខ្លួន ដែលកំពុងរស់នៅ និងធ្វើដំណើរកម្សាន្តក្នុងប្រទសកម្ពុជា ឲ្យប្រុងប្រយ័ត្នពីសុវត្ថិភាព ចំពោះព្រឹត្តិការណ៍បោះឆ្នោត នៅថ្ងៃទី២៩ ខែកក្កដា ឆ្នាំ២០១៨។ ស្ថានទូតអាមេរិក បារម្ភថា ក្នុងអំឡុងបោះឆ្នោត អាចនឹងមានការប្រមូលផ្តុំ និងការធ្វើបាតុកម្ម ហើយរដ្ឋាភិបាល ក៏អាចនឹងចល័តកងកម្លាំង ដើម្បីការពារសន្តិសុខដែរ។
ស្ថានទូតអាមេរិក បានអំពាវនាវឲ្យពលរដ្ឋអាមេរិក ជៀសវាងឲ្យឆ្ងាយ បើមានការប្រមូលផ្តុំ ឬការធ្វើបាតុកម្ម ប្រឆាំងនឹងការបោះឆ្នោតមែន។ លើសពីនេះ ស្ថានទូតអាមេរិក ក៏បានដាស់តឿនពលរដ្ឋខ្លួន កុំឲ្យធ្វើដំណើរតាមបណ្តាខេត្តនានា បើមិនចាំបាច់។
តាមរយៈសារដែលបង្ហោះលើទំព័រហ្វេសប៊ុក និងលើគេហទំព័រ ស្ថានទូតអាមេរិក បានប្រាប់ពលរដ្ឋខ្លួន បែបនេះថា៖«ការធ្វើបាតុកម្ម ឬការប្រមូលផ្តុំ អាចបង្កឲ្យមានការប្រឈមមុខដាក់គ្នា»។
លោក សុខ ឥសាន អ្នកនាំពាក្យគណបក្សកាន់អំណាច មិនសប្បាយចិត្តឡើយ ពេលឃើញស្ថានទូតអាមេរិក បញ្ចេញសារបែបនេះ ពីព្រោះថា ប្រទេសកម្ពុជា នឹងមិនមានអសន្តិសុខ ភាពវឹកវរ ឬបញ្ហាណាមួយ កើតឡើងនោះទេ ទោះជាក្នុងថ្ងៃបោះឆ្នោតក៏ដោយ។ លោក ចាត់ទុក សាររបស់ស្ថានទូតអាមេរិកថា មានន័យគាំទ្រអតីតអ្នកប្រឆាំង និងមានបំណងបំភិតបំភ័យប្រជាពលរដ្ឋកម្ពុជា កុំឲ្យទៅបោះឆ្នោត។
អ្នកនាំពាក្យគណបក្សកាន់អំណាចរូបនេះ ប្រាប់សារព័ត៌មានថ្មីៗតាមទូរសព្ទយ៉ាងដូច្នេះថា៖«ប្រជាពលរដ្ឋខ្មែរ ដឹងច្បាស់ណាស់ ថាកំពុងរស់នៅដោយសុខក្សេមក្សាន្ត និងមានសុខសន្តិភាព។ គ្មាននរណាជឿទូតអាមេរិកទេ»៕
Tag:
បោះឆ្នោត
អាមេរិក
សុខ ឥសាន
© រក្សាសិទ្ធិដោយ thmeythmey.com