សេដ្ឋកិច្ចអន្តរជាតិ
អន្តរជាតិ
ថៃត្រៀមជិត ៣ពាន់លានដុល្លារ សម្រាប់ជួយវិស័យស្រូវអង្កររបស់ខ្លួនឆ្នាំ២០១៨-២០១៩ រូបពីហ្វេសប៊ុក Amru Rice
× រដ្ឋាភិបាលថៃ នៅក្នុងសប្ដាហ៍នេះ បានអនុម័តវិធានការជួយវិស័យស្រូវអង្ករ ដែលមានតម្លៃទឹកប្រាក់សរុបចំនួន ៩៧,៩៥ពាន់លានបាត (ប្រហែល ២,៩ពាន់លានដុល្លារ) សម្រាប់រដូវប្រមូលផលឆ្នាំ២០១៨-២០១៩ ។ នេះបើតាមការចុះផ្សាយរបស់កាសែតបាងកកប៉ុស្ដិ៍។
វិធានការខាងលើ រួមមានផែនការផ្ដល់ឥណទាន ដែលមានទឹកប្រាក់សរុប ៣៥,០៦ពាន់លានបាត (ជាង១ពាន់លានដុល្លារ) ដែលនឹងផ្ដល់ដោយធនាគាររដ្ឋ BAAC និងថវិកាជំនួយចំនួន ៦២,៨៩ពាន់លានបាត (ជិត២ពាន់លានដុល្លារ) ដែលរដ្ឋាភិបាលនឹងផ្ដល់ឲ្យកសិករ។
លោក Nathporn Chatusripitak ទីប្រឹក្សារដ្ឋមន្ត្រីការិយាល័យនាយករដ្ឋមន្ត្រី ឲ្យដឹងថា វិធានការនេះ នឹងគ្រប់ដណ្ដប់លើ ៣គម្រោង។ ទី១, ការផ្ដល់ឥណទានដល់កសិករដែលយល់ព្រមពន្យារការលក់ស្រូវ និងការផ្ដល់ជំនួយថវិកាសម្រាប់ការច្រូតកាត់ និងលើកកម្ពស់តម្លៃស្រូវ។ ទី២, ឥណទានសម្រាប់សហករណ៍កសិកម្ម ដើម្បីប្រមូលស្រូវ និងបង្កើតតម្លៃបន្ថែម។ និងទី៣, កម្មវិធីឧបត្ថមធនអត្រាការប្រាក់ ៣ភាគរយ សម្រាប់ពាណិជ្ជករស្រូវអង្ករ ដែលយល់ព្រមរក្សាទុកស្រូវក្នុងឃ្លាំង។
កម្មវិធីរបស់រដ្ឋាភិបាលទាំងនេះ នឹងចាប់ផ្ដើមដំណើរការពីខែកញ្ញាឆ្នាំ២០១៨នេះ ដល់ខែកញ្ញាឆ្នាំ២០១៩ សម្រាប់គ្រប់ខេត្ត លើកលែងតែតំបន់ភាគខាងត្បូង។ ដោយឡែកកម្មវិធីសម្រាប់ភាគខាងត្បូង ត្រូវអនុវត្តពីខែមិថុនា ដល់ខែតុលាឆ្នាំ២០១៩ ឯណោះ។
រដ្ឋាភិបាលគ្រោងថវិកា ២២,៥៦ពាន់លានបាត សម្រាប់ផ្ដល់កម្ចីដល់កសិករ ដែលព្រមពន្យារពេលលក់ស្រូវ និងសម្រាប់ការលើកកម្ពស់តម្លៃស្រូវ។ ហើយឥណទានសម្រាប់ក្រុមសហគមន៍ សម្រាប់ទិញស្រូវ និងបង្កើតតម្លៃបន្ថែម រដ្ឋាភិបាលគ្រោងថវិកា ១២,៥ពាន់លានបាត។
កម្មវិធីឧបត្ថមធនអត្រាការប្រាក់៣ភាគរយ សម្រាប់ពាណិជ្ជករស្រូវអង្ករ ដែលព្រមស្តុកស្រូវពីរយៈពេល ៦០ទៅ១៨០ថ្ងៃ ត្រូវបានរដ្ឋាភិបាលគ្រោងថវិកា ៥៧២ លានបាត។
គម្រោងផ្ដល់ប្រាក់ជំនួយសម្រាប់ការច្រូតកាត់ រដ្ឋាភិបាលនឹងផ្ដល់ឲ្យ ១៥០០បាតក្នុងដីស្រែមួយរ៉ៃ ហើយបានដាក់ពិដានមិនឲ្យច្រើនជាង ១៨០០០បាតក្នុងមួយគ្រួសារ និងមិនលើសពី ១២រ៉ៃ៕
© រក្សាសិទ្ធិដោយ thmeythmey.com