ជាតិ
បោះឆ្នោត
នយោបាយជាតិ
FIDH ស្នើឲ្យលែងលោក កឹម សុខា មុនបោះឆ្នោត តែមន្ត្រីរដ្ឋាភិបាល ថាហួសពេលហើយ
×![]()
ជិតដល់ថ្ងៃបោះឆ្នោតមែនទែនទៅហើយ អង្គការអន្តរជាតិមួយឈ្មោះសហព័ន្ធសិទ្ធិមនុស្សអន្តរជាតិ (FIDH) នៅតែប្រឹងទាមទារឲ្យដោះលែងលោក កឹម សុខា អតីតប្រធានគណបក្សសង្គ្រោះជាតិ រួមទាំងអតីតសមាជិកផ្សេងទៀតនៃគណបក្សនេះ។ FIDH ក៏បានទាមទារឲ្យគណបក្សប្រឆាំងដ៏ធំមួយនេះ ធ្វើសកម្មភាពឡើងវិញផងដែរ។
សហព័ន្ធសិទ្ធិមនុស្សអន្តរជាតិ ដែលមានអង្គការជិត២០០ មកពីបណ្តាប្រទេសជាង១០០ លើពិភពលោកជាសមាជិក ថែមទាំងស្នើឲ្យរដ្ឋាភិបាលកម្ពុជា បង្កើតលក្ខខណ្ឌដ៏ល្អមួយ ដែលអាចធ្វើឲ្យការបោះឆ្នោតនៅថ្ងៃអាទិត្យនេះ ប្រព្រឹត្តទៅតាមស្តង់ដាអន្តរជាតិ។ អង្គការនេះ បានអំពាវនាវឲ្យសហគមន៍អន្តរជាតិដទៃ កុំទទួលស្គាល់លទ្ធផលបោះឆ្នោតនៅកម្ពុជា ប្រសិនណាបើសំណើខាងលើរបស់ខ្លួន មិនជោគជ័យ។
FIDH បានហៅការបោះឆ្នោតនៅកម្ពុជា ដែលគ្មានការចូលរួមពីគណបក្សសង្គ្រោះជាតិ ថាជាការបោះឆ្នោតក្លែងក្លាយ។ តាមរយៈសេចក្តីថ្លែងការណ៍របស់ខ្លួន ដែលធ្វើឡើងនៅថ្ងៃទី២៦ ខែកក្កដា អង្គការអន្តរជាតិ ដែលតែងតែរិះគន់រដ្ឋាភិបាលកម្ពុជា បានបញ្ជាក់យ៉ាងដូច្នេះថា៖«លទ្ធផលនៃការបោះឆ្នោត គ្រាន់តែជាការត្រួសត្រាយផ្លូវឲ្យលោកនាយករដ្ឋមន្ត្រី ហ៊ុន សែន បានបន្តកាន់អំណាចរយៈពេល៥ឆ្នាំទៀតប៉ុណ្ណោះ»។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី សើចចំអកឲ្យ FIDH ថាចេញសេចក្តីថ្លែងការណ៍ និងដាក់សំណើទាំងមិនយល់ពីច្បាប់កម្ពុជា។ លោក បន្ថែមថា សេចក្តីថ្លែងការណ៍របស់អង្គការនេះ មានចេតនាប្រឆាំងនឹងការបោះឆ្នោតនៅកម្ពុជា។
លោក ផៃ ស៊ីផាន បញ្ជាក់ប្រាប់សារព័ត៌មានថ្មីៗតាមទូរសព្ទបែបនេះថា៖«អត់ន័យទេ។ មកដល់ពេលនេះហើយ វា ហួសពេលទៅហើយ។ គ្មានអ្វីត្រូវមកតតាំងនោះទេ»៕
Tag:
បោះឆ្នោត
FIDH
ផៃ ស៊ីផាន
© រក្សាសិទ្ធិដោយ thmeythmey.com
