គ.ជ.ប ស្នើឲ្យគ្រប់ភាគីរក្សាភាពស្ងប់ស្ងាត់ក្នុងថ្ងៃស បើពុំដូច្នេះទេ នឹងត្រូវរងចំណាត់ការ

ជាតិ

បោះឆ្នោត

គ.ជ.ប ស្នើឲ្យគ្រប់ភាគីរក្សាភាពស្ងប់ស្ងាត់ក្នុងថ្ងៃស បើពុំដូច្នេះទេ នឹងត្រូវរងចំណាត់ការ

27, Jul 2018 , 10:39 pm

រូបភាព

លោក ស៊ិក ប៊ុនហុក ប្រធានគ.ជ.ប ស្ថិតក្នុងកិច្ចប្រជុំជាមួយភាគីពាក់ព័ន្ធ នាពេលកន្លងមក។ រូបពីគ.ជ.ប

ដោយ:

ភ្នំពេញ៖ ប្រធានគណៈកម្មការធិការជាតិរៀបចំការបោះឆ្នោត (គ.ជ.ប) លោក ស៊ិក ប៊ុនហុក បានអំពាវនាវទៅ គ្រប់ភាគីពាក់ព័ន្ធទាំងអស់ នៅក្នុងដំណើរការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ ដែលនឹងប្រព្រឹត្តថ្ងៃ២៩ ខែកក្កដា នេះ ឱ្យរក្សាភាពស្ងប់ស្ងាត់នៅថ្ងៃ ស (ថ្ងៃ២៨ ខែកក្កដា) និងថ្ងៃបោះឆ្នោត។ ក្នុងកណីរកឃើញថាបង្កចលាចល ឬសកម្មភាពណាមួយដែលរំលោភច្បាប់ស្ដីពីការបោះឆ្នោត គ.ជ.ប នឹងចាត់វិធានការដ៏តឹងរឹងជាក់ជាមិនខាន។

សេចក្ដីអំពាវរបស់លោក ស៊ិក ប៊ុនហុក ដែលធ្វើឡើងនៅថ្ងៃទី២៧ ខែកក្ដដានេះ បានឲ្យដឹងថា គ្រប់គណបក្សនយោបាយ បេក្ខជន ភ្នាក់ងារគណបក្សនយោបាយ អ្នកគាំទ្រគណបក្សនយោបាយ រួមនឹងអ្នកគ្រប់គ្រងបណ្ដាញប្រព័ន្ធផ្សព្វផ្សាយព័ត៌មានគ្រប់ប្រភេទ ត្រូវរក្សាភាពស្ងប់ស្ងាត់ចាប់ពីម៉ោង១២:០០ យប់ថ្ងៃទី២៧ ដល់ម៉ោង១២:០០ យប់ថ្ងៃទី២៩ ខែកក្កដា។

លោក ស៊ិក ប៊ុនហុក បានបន្ថែមថា គ្រប់ភាគីពាក់ព័ន្ធទាំងអស់ ត្រូវរួមគ្នាគោរពច្បាប់ស្ដីពីការបោះឆ្នោតជ្រើសតាំងតំណាងរាស្ត្រ បទបញ្ជា និងនីតិវិធី រួមនឹងក្រមសីលធម៌ សម្រាប់ការបោះឆ្នោត។

ប្រធាន គ.ជ.ប បន្តទៀតថា អាជ្ញាធរគ្រប់លំដាប់ថ្នាក់ ដែលទទួលខុសត្រូវ និងធានាសន្តិសុខណ្ដាប់ធ្នាប់សាធារណៈ នារដូវកាលបោះឆ្នោតនេះ ត្រូវផ្ដល់កិច្ចសហប្រតិបត្តិការជាមួយ គ.ជ.ប ក៏ដូចជាគណៈកម្មការរៀបចំការការបោះឆ្នោតគ្រប់លំដាប់ថ្នាក់ ដើម្បីរក្សាសុវត្ថិភាព និងរបៀបរយនៅក្នុងដំណាក់កាលនេះ។

លោក ស៊ិក ប៊ុនហុក សង្កត់ធ្ងន់ថា៖«ត្រូវចាត់វិធានការឱ្យបានម៉ឺងម៉ាត់ ដើម្បីបង្ការ និងទប់ស្កាត់នូវរាល់សកម្មភាព ព្រមទាំងបាតុភូតទាំងឡាយ ដែលមានបំណងបំផ្លាញការបោះឆ្នោត ដូចជាការរារាំងប្រជាពលរដ្ឋមិនឱ្យទៅបោះឆ្នោត និងការធ្វើឱ្យមានការភាន់ច្រឡំ ឬក៏បង្កការរំខានមិនឱ្យដំណើរបោះឆ្នោត និងរាប់សន្លឹកឆ្នោត ជាដើម»៕