ជាតិ
បោះឆ្នោត
ការបោះឆ្នោតចាប់ផ្តើមពីម៉ោង៧ព្រឹកនេះ រហូតដល់ម៉ោង៣រសៀល!
× ការបោះឆ្នោតជ្រើសតាំងតំណាងរាស្ត្រ នីតិកាលទី៦ ប្រព្រឹត្តទៅពីម៉ោង៧ព្រឹកថ្ងៃទី២៩ ខែកក្កដា នេះ រហូតដល់ម៉ោង៣រសៀល។ ប្រធានគណបក្សជាច្រើនត្រូវបោះឆ្នោតនៅមណ្ឌលនានាក្នុងរាជធានីភ្នំពេញ ខណៈមួយចំនួនទៀត ត្រូវបោះនៅមណ្ឌលដែលខ្លួនឈរជាបេក្ខភាពតំណាងរាស្ត្រ។
លោក ញឹក ប៊ុនឆៃ ប្រធានគណបក្សខ្មែររួបរួមជាតិ បោះឆ្នោតនៅខេត្តបន្ទាយមានជ័យ លោក ស៊ិន សុភាព ប្រធានគណបក្សរស្មីខេមរា នៅមណ្ឌលខេត្តកំពង់ស្ពឺ សម្ដេចក្រុមព្រះ នរោត្តម រណឬទ្ធិ ព្រះប្រធានគណបក្សហ្វ៊ុនស៊ិនប៉ិច នៅមណ្ឌលខេត្តកំពង់ចាម លោក ហួន រាជចំរើន ប្រធានគណបក្សខ្មែរអភិវឌ្ឍសេដ្ឋកិច្ច នៅមណ្ឌលខេត្តតាកែវ លោក ពេជ្រ ស្រស់ ប្រធានគណបក្សយុវជនកម្ពុជា នៅមណ្ឌលខេត្តត្បូងឃ្មុំ លោក ប្លាង សីន ប្រធានគណបក្សគណបក្សជនជាតិដើមប្រជាធិបតេយ្យកម្ពុជា នៅមណ្ឌលខេត្តមណ្ឌលគិរី រីឯសម្ដេច ហ៊ុន សែន ប្រធានគណបក្សប្រជាជនកម្ពុជា បោះឆ្នោតនៅមណ្ឌលខេត្តកណ្ដាល។
នៅរាជធានីភ្នំពេញ មានដូចជា លោក ច័ន្ទ ប៊ុនហន ប្រធានគណបក្សមាតុភូមិយើង លោក នួន សុខាវី ប្រធានគណបក្សពន្លឺថ្មី លោក សេង សុខេង ប្រធានគណបក្សសញ្ជាតិកម្ពុជា លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋាន លោកស្រី ពោធិតី សាវត្ថី ប្រធានគណបក្សធម្មាធិបតេយ្យ លោក គង់ មុនីកា ប្រធានគណបក្សឆន្ទៈខ្មែរ លោក កែម រិទ្ធិសិត ប្រធានគណបក្សខ្មែរតែមួយ។
លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ដែលមិនបានឈរឈ្មោះ ក៏ត្រូវបោះឆ្នោតនៅមណ្ឌលរាជធានីភ្នំពេញផងដែរ។ លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក លោកស្រី សុខ រ័ត្នសុវណ្ណបច្ចៈសីលា ប្រធានគណបក្សសាធារណរដ្ឋប្រជាធិបតេយ្យ លោក លន់ ឫទ្ធិ ប្រធានគណបក្សខ្មែរសាធារណរដ្ឋ និងលោក ក្រវ៉ាញ ដារ៉ន ប្រធានគណបក្សខ្មែរឈប់ក្រ ស្ថិតក្នុងចំណោមមេបក្សដែលមិនឈរជាបេក្ខភាពតំណាងរាស្ត្រ៕
© រក្សាសិទ្ធិដោយ thmeythmey.com