ជាតិ
បោះឆ្នោត
គ.ជ.ប៖ គិតត្រឹមម៉ោង១១ អ្នកទៅបោះឆ្នោតមាន៥៨,៨០ភាគរយ
× ដំណើរការបោះឆ្នោតជ្រើសតាំងតំណាងរាស្ត្រ គិតត្រឹមម៉ោង១១ព្រឹកនេះ មានអ្នកទៅបោះប្រមាណ៥៨,៨០ភាគរយ។ នេះបើតាមការរបាយការណ៍របស់គណៈកម្មាធិការជាតិរៀបចំការបោះឆ្នោត (គ.ជ.ប)។
គ.ជ.ប បានអះអាងថា ក្នុងចំណោមអ្នកមានឈ្មោះបោះឆ្នោត ៨ ៣៨០ ២១៧នាក់ មានចំនួន ៤ ៩២៧ ៨៩៤នាក់ហើយដែលបានទៅបោះឆ្នោត ដោយគិតត្រឹមម៉ោង១១ ថ្ងៃនេះ។ ក្នុងចំណោមអាត្រាអ្នកទៅបោះ ៥៨,៨០ភាគរយ មណ្ឌលខេត្តមណ្ឌលគិរី កែប ឧត្តរមានជ័យ មានចំនួនលើស៦៥ភាគរយ។
ចំនួនអ្នកទៅបោះក្នុងរង្វង់ជាង៦០ភាគរយមាននៅមណ្ឌល បន្ទាយមានជ័យ កំពង់ឆ្នាំង កណ្តាល ព្រៃវែង ពោធិ៍សាត់ ព្រះសីហនុ ស្វាយរៀង តាកែវ និងប៉ៃលិន។ មណ្ឌលផ្សេងទៀត មានអ្នកចូលរួមចន្លោះពី៥០ភាគរយទៅជិត៦០ភាគរយ។
នៅរាជធានីភ្នំពេញ អ្នកទៅបោះមាន ៥០៦ ៣៧៩នាក់ ក្នុងចំណោមអ្នកមានឈ្មោះ ៨៦៦ ៣៤៧នាក់ ពោលគឺ៥៨,៤៥ភាគរយ ដោយគិតត្រឹមម៉ោង១១ថ្ងៃត្រង់។
លោក ហង្ស ពុទ្ធា អ្នកនាំពាក្យគ.ជ.ប បានបញ្ជាក់ប្រាប់សារព័ត៌មានថ្មីៗតាមទូរសព្ទថា របាយការណ៍នេះ គឺជារបាយការណ៍ពិតប្រាកដ និងផ្លូវការ ដៅចេញដោយគ.ជ.ប។ លោក និយាយយ៉ាងដូច្នេះ៖«មកដល់ពេលនេះ មិនទាន់មានបញ្ហាអ្វីទេ។ ដំណើរការបោះឆ្នោត ប្រព្រឹត្តជាប្រក្រតី»៕
© រក្សាសិទ្ធិដោយ thmeythmey.com