ជាតិ
បោះឆ្នោត
លោក ចិន ថុន៖ ទោះលទ្ធផលបោះឆ្នោតយ៉ាងណា ក៏ LDP ទទួលយកដែរ លោក ខឹម វាសនា ដឹកនាំក្បួនឃោសនា មុនការបោះឆ្នោត
× ភ្នំពេញ៖ អគ្គលេខាធិការគណបក្សសម្ព័ន្ធដើម្បីប្រជាធិបតេយ្យ (LDP) លោក ចិន ថុន អះអាងថា ទោះជាលទ្ធផលបោះឆ្នោតយ៉ាងណាក៏ LDP ទទួលយកដែរ។ ការទទួលយកនេះ ក៏ព្រោះLDP មិនមានលទ្ធភាពអ្វីក្នុងការទាមទារឡើងវិញឡើយ។
ក្រោយការបោះឆ្នោតត្រូវបានបញ្ចប់ គណបក្សសម្ព័ន្ធដើម្បីប្រជាធិបតេយ្យ ដែលមានលោក ខឹម វាសនា ជាប្រធាន ជឿជាក់ថា ខ្លួននឹងទទួលបានកៅអីក្នុងរដ្ឋសភានាអាណត្តិនេះ។ នេះបើតាមការអះអាងពីលោក ចិន ថុន អគ្គលេខាធិការគណបក្សសម្ព័ន្ធដើម្បីប្រជាធិបតេយ្យ។ តែអគ្គលេខាធិការគណបក្សរូបនេះ មិនបង្ហាញថា ខ្លួនអាចទទួលបានប៉ុន្មានអាសនៈក្នុងរដ្ឋសភានោះឡើយ។ ផ្ទុយទៅវិញគណបក្សនេះ នឹងព្រមទទួលយកលទ្ធផលដែលទទួលបានក្រោយការបោះឆ្នោតនេះ ព្រោះថា LDP មិនមានកម្លាំងដើម្បីទាមទារអ្វីឡើយ។
លោក ចិន ថុន បញ្ជាក់យ៉ាងដូច្នេះថា៖ «យើងមិនមានលទ្ធភាពអីដើម្បីទៅទាមទារគេនោះទេ។ ព្រោះសូម្បីតែរឿងគូសធិក ក្នុងសន្លឹកឆ្នោត ដែលគេ (គ.ជ.ប) មិនចំណាយលុយសោះក៏យើងធ្វើមិនបាន។ អ៊ីចឹងយើងគ្មានអីក្រៅពីការទទួលយកលទ្ធផលនោះទេ»។
យ៉ាងណាមិញ លោក ចិន ថុន បានឲ្យសារព័ត៌មានថ្មីៗដឹងថា ការបោះឆ្នោត គណបក្សលោក សង្កេតឃើញថាមានដំណើរការល្អ អាចទទួលយកបាន។ តែចំពោះការរាប់សន្លឹកឆ្នោត ភ្នាក់ងារសង្កេតការណ៍របស់ LDP បានជួបបញ្ហាជាច្រើន ដូចជាការគំរាមកំហែង និងការហាមឃាត់មិនឲ្យមានការថតរូប សន្លឹកឆ្នោតមិនបានការ ជាដើម។
អគ្គលេខាធិការរូបនេះ បានឲ្យដឹងទៀតថា គណបក្សសម្ព័ន្ធដើម្បីប្រជាធិបតេយ្យ នឹងប្រមូលរាល់ទិន្ន័យដែលទទួលបាន ដើម្បីយកទៅដាក់ពាក្យបណ្ដឹងនៅ គ.ជ.ប ជុំវិញភាពមិនប្រក្រតី ក្នុងការរាប់សន្លឹកឆ្នោត។ តែលោក ចិន ថុន អះអាងថា គណបក្សលោក នឹងមិនដាក់ពាក្យបណ្ដឹងឲ្យរាប់សន្លឹកឆ្នោតឡើងវិញឡើយ៕
Tag:
បោះឆ្នោត
គ.ជ.ប
LDP
© រក្សាសិទ្ធិដោយ thmeythmey.com