ជាតិ
នយោបាយជាតិ
អ្នកវិភាគ ថា លោក កឹម សុខា អាចនឹងត្រូវដោះលែងនៅក្រោយបោះឆ្នោត លោក កឹម សុខា នៅពេលដែលត្រូវបានចាប់ខ្លួននៅផ្ទះកាលពីយប់ថ្ងៃទី៣ ខែកញ្ញា ឆ្នាំ២០១៧។ រូបថត AFP
× ភ្នំពេញ៖ អតីតមេដឹកនាំគណបក្សសង្គ្រោះជាតិលោក កឹម សុខា អាចនឹងដោះលែងនៅក្រោយការបោះឆ្នោតនេះ ដើម្បីសម្រួលស្ថានភាពនយោបាយ។ វាជាការយល់ឃើញររបស់អ្នកវិភាគនយោបាយ។ ប៉ុន្តែគណបក្សប្រជាជនកម្ពុជា បាននិយាយដាច់ណាត់ថា គ្មានការសម្បទាននយោបាយណាមួយ ដល់គណបក្សប្រឆាំងឡើយ។
លោក ឯម សុវណ្ណារ៉ា មើលឃើញថា ស្ថានការណ៍នយោបាយនៅក្រោយការបោះឆ្នោត នឹងអាចមានការប្រែប្រួល ដើម្បីបន្ធូរបន្ថយភាពតានតឹង ក្រោមក្រសែភ្នែកអន្តរជាតិ ។ អ្វីដែលអ្នកវិភាគរូបនេះ មើលឃើញសញ្ញាវិជ្ជមាននោះ គឺការដោះលែងលោក កឹម សុខា អតីតមេបក្សប្រឆាំង និងសកម្មជនបក្សជិត២០នាក់ ដែលជាប់ឃុំ រួមទាំងថ្នាក់ដឹកនាំបក្សនយោបាយ១១៨នាក់ ក៏អាចអនុញ្ញាតឲ្យធ្វើនយោបាយឡើងវិញដែរ។ មូលហេតុដែលលោក សុវណ្ណរ៉ា មើលឃើញស្ថានការណ៍នយោបាយប្រែប្រួលនេះ ដោយសារសម្ពាធអន្តរជាតិនៅក្រោយបោះឆ្នោត នឹងកើតឡើងកាន់ខ្លាំង បើសិនជាគ្មានដំណោះស្រាយនយោបាយ។
ថ្លែងប្រាប់សារព័ត៌មានថ្មីៗ លោក ឯម សុវណ្ណារ៉ា បានបញ្ជាក់ដូច្នេះថា៖«ខ្ញុំយល់ថាក្រោយបោះឆ្នោតនេះ ហេតុការណ៍នយោបាយកាន់តែល្អ ព្រោះអ្នកនយោបាយ គេនឹងដោះស្រាយឲ្យវាមានរូបភាពល្អ ដោយឲ្យគណបក្សប្រឆាំងរស់ឡើងវិញ ដើម្បីមានលទ្ធភាពប្រកួតប្រជែងជាមួយបក្សកាន់អំណាចបន្ត និងស្ដារស្ថានការណ៍ឡើងវិញ»។
ដូចការលើកឡើងរបស់លោក ឯម សុវណ្ណារ៉ា ដែរ លោក ហង្ស វិទូ យល់ឃើញថា គណបក្សប្រជាជន នឹងប្រើសន្លឹកបៀក្នុងដៃនេះ លេងយ៉ាងមានប្រសិទ្ធភាពជាមួយអន្តរជាតិ ដើម្បីបង្វែស្ថានការបោះឆ្នោត។ ប៉ុន្តែជាលទ្ធផលនោះ គណបក្សប្រជាជនបានឈ្នះឆ្នោតដដែល ពោលគឺគ្មានការបោះឆ្នោតឡើងវិញទេ។
ពាក់ព័ន្ធបញ្ហានេះ បណ្ដាអន្តរជាតិ បានចេញលិខិតរិះគន់ការបោះឆ្នោត អមជាមួយការអំពាវនាវឲ្យរដ្ឋាភិបាល បើកច្រកនយោបាយ និងដោះលែងលោក កឹម សុខា រួមទាំងសកម្មជននយោបាយ ដើម្បីស្ដារលទ្ធិប្រជាធិបតេយ្យឡើងវិញ។
តែយ៉ាងណាអ្នកនាំពាក្យរដ្ឋាភិបាលថា គ្មានសញ្ញាវិជ្ជមានណាមួយ ទាក់ទងនឹងការដោះលែងអ្នកនយោបាយឡើយ។ ការដោះលែងអ្នកនយោបាយណាមួយ គឺជាសិទ្ធិអំណាចរបស់តុលាការ ដូច្នេះរដ្ឋាភិបាល គ្មានសិទ្ធិអ្វីជ្រៀតជ្រែកលើប្រព័ន្ធយុត្តិធម៌នោះទេ។
បន្ថែមពីនេះលោក សុខ ឥសាន អ្នកនាំពាក្យគណបក្សប្រជនកម្ពុជា បានសរសេរនៅបណ្ដាញសង្គមតេឡេក្រាមថា គណបក្សលោក នឹងមិនធ្វើសម្បទាននយោបាយជាមួយអតីតគណបក្សសង្គ្រោះជាតិឡើយ។
តុលាការនឹងបើកសវនាការលើបណ្ដឹងសុំនៅក្រៅឃុំរបស់លោក កឹម សុខា អតីតប្រធានគណបក្សសង្គ្រោះជាតិ នៅព្រឹកថ្ងៃទី២២ សីហាខាងមុខនេះ។ មកដល់ពេលនេះ លោក កឹម សុខា បានជាប់ឃុំនៅពន្ធនាគារត្រពាំងថ្លុង អស់រយៈពេល១១ខែហើយ លើករណី «ឃុបឃិតជាមួយបរទេស»។
ក្រោយពីសវនាការសុំនៅក្រៅឃុំខាងនេះ តុលាការ ក៏នឹងត្រូវចេញដីកាសម្រេចជាថ្មី លើករណីលោក កឹម សុខា នៅខែកញ្ញាខាងមុខនេះ បន្ទាប់ពីចៅក្រមស៊ើបសួរ សម្រេចពន្យារពេល៦ខែលើកទី១ ដើម្បីបន្តស៊ើបអង្កេតលើករណីឃុបឃិតជាមួយបរទេស ។
លោកស្រី ម៉េង សុភារី មេធាវីការពារក្តីឲ្យលោក កឹម សុខា បានពន្យល់ថា ក្នុងករណីដែលតុលាការពន្យារពេលស៊ើបអង្កេត លើលោក កឹម សុខា រយៈពេល៦ខែនេះ ហើយរកមិនឃើញភស្តុតាងដាក់បន្ទុកលើកូនក្តីខ្លួនទេ នោះតុលាការ អាចចេញដីកាដំណោះស្រាយទម្លាក់ការចោទប្រកាន់នេះ ឬបញ្ជូនសំណុំរឿងទៅជំនុំជម្រះ។ ប៉ុន្តែបើតុលាការ យល់ថា ករណីលោក កឹម សុខា នៅមិនទាន់ស៊ើបអង្កេតចប់សព្វគ្រប់ នោះតុលាការអាចបន្តការពន្យារពេល៦ខែទៀត ជាលើកទី២ ៕
© រក្សាសិទ្ធិដោយ thmeythmey.com