កីឡាជាតិ
ជាតិ
ភ្នំពេញក្រោនបញ្ចប់កិច្ចសន្យាខ្សែប្រយុទ្ធអ៊ីរ៉ង់ Pouya Hosseini ទាំងមិនទាន់ចប់រដូវកាល រូបពីហ្វេសប៊ុកភ្នំពេញក្រោន៖ កីឡាករ Pouya Hosseini ពាក់អាវក្រហម
× ភ្នំពេញ៖ ក្លិបបាល់ទាត់ទាត់ភ្នំពេញក្រោន បានសម្រេចបញ្ចប់កិច្ចសន្យាកីឡាករអ៊ីរ៉ង់ Pouya Hosseini មុនពេលវេលាកំណត់ ក្រោយរួមរស់ជាមួយគ្នាជាងពាក់កណ្តាលរដូវកាល។ ភ្នំពេញក្រោន មិនបានបញ្ជាក់ពីមូលហេតុលម្អិត នៃការបញ្ចប់កិច្ចសន្យានេះឡើយ ខណៈការបង្ហាញខ្លួនជាច្រើនលើកក្នុងពានរង្វាន់លីគកំពូល ខ្សែប្រយុទ្ធរូបនេះ រកបានតែពីរគ្រាប់ប៉ុណ្ណោះ។
នៅសល់តែជាង១ខែទៀតប៉ុណ្ណោះ ការប្រកួតបាល់ទាត់ដណ្តើមពានរង្វាន់ក្របខណ្ឌមិត្តហ្វូនខេមបូឌានលីគប្រចាំឆ្នាំ២០១៨ នឹងត្រូវបញ្ចប់ការប្រកួតជាស្ថាពរ ខណៈក្រុមនីមួយៗនៅសល់ម្នាក់៦ប្រកួត។ ទោះបីការប្រកួតស្ថិតក្នុងដំណើរការក្តី តែក្លិបបាល់ទាត់ភ្នំពេញក្រោន ដែលជាម្ចាស់ជើងឯក៦សម័យកាល បានបញ្ចប់កិច្ចសន្យាខ្សែប្រយុទ្ធអ៊ីរ៉ង់ Pouya Hosseini ទាំងពាក់កណ្តាលទី ក្រោយរួមរស់ជាមួយគ្នាជិត៩ខែ។
ដ្បិតក្លិបនេះ មិនបានបញ្ជាក់ពីមូលហេតុលម្អិតនៃការបញ្ចប់កិច្ចសន្យានេះក៏ដោយ តែការធ្វើមិនបានល្អរបស់ខ្សែប្រយុទ្ធកម្ពស់១.៨៣ម៉ែត្ររូបនេះ ក្នុងពានរង្វាន់លីគកំពូល ត្រូវបានគេចាត់ទុកថា អាចជាមូលហេតុនៃការចែកផ្លូវគ្នានេះ។ ការបង្ហាញខ្លួនជាច្រើនប្រកួត ឲ្យក្លិបភ្នំពេញក្រោនកន្លងមក ខ្សែប្រយុទ្ធអ៊ីរ៉ង់រូបនេះ រកបានតែពីរគ្រាប់ប៉ុណ្ណោះ។
កីឡាករ Pouya Hosseini បានចុះកិច្ចសន្យា១រដូវកាលលេងឲ្យក្លិបភ្នំពេញក្រោនកាលពីអំឡុងខែធ្នូ ឆ្នាំ២០១៧ ក្រោយរូបគេចាកចេញពីក្លិប Nongbua Pitchaya FC (ថៃ) ។ កីឡាកររូបនេះ ធ្លាប់លេងឲ្យក្លិប Muangthong United (ថៃ) ពីឆ្នាំ២០១៤-២០១៥ ក្រោយផ្ទេរមកពីក្លិប Udon Thani FC (ថៃ) នៅឆ្នាំ២០១៣៕
Tag:
ភ្នំពេញក្រោន
Cambodian League 2018
Pouya Hosseini
© រក្សាសិទ្ធិដោយ thmeythmey.com