លោក Thierry ជនជាតិបារាំងដែលជួយផ្សព្វផ្សាយវប្បធម៌ និងទេសចរណ៍ខ្មែរបាត់បង់ជីវិតនៅក្នុងខេត្តសៀមរាប

ជាតិ

លោក Thierry ជនជាតិបារាំងដែលជួយផ្សព្វផ្សាយវប្បធម៌ និងទេសចរណ៍ខ្មែរបាត់បង់ជីវិតនៅក្នុងខេត្តសៀមរាប

07, Aug 2018 , 3:53 pm

រូបភាព

ដោយ: ថ្មីៗ

ភ្នំពេញ៖ ជាអ្នកស្រឡាញ់រូបថត, លោក Thierry Diwo បានចូលមកក្នុងប្រទេសកម្ពុជានៅក្នុងអំឡុងទសវត្សរ៍៩០។ ចូលមកក្នុងប្រទេសកម្ពុជាភ្លាម លោកជាគ្រូបង្រៀនថតរូបផង និងជាអ្នកថតរូបប្រាសាទខ្មែរ សិល្បៈខ្មែរជាទូទៅផង។ ជាអកុសល កាលពីយប់ថ្ងៃទី៦ខែសីហាឆ្នាំ២០១៨កន្លងមកនេះ លោក Thierry បានទទួលមរណភាពដោយរោគាពាធនៅក្នុងខេត្តសៀមរាបក្នុងវ័យប្រមាណជា៦០ឆ្នាំ។

ចាប់តាំងពីទសវត្សរ៍៩០មក, លោក Thierry Diwo បានថតរូបប្រាសាទខ្មែររាប់ម៉ឺនសែនសន្លឹក និងបានថតរបាំខ្មែរស្ទើរគ្រប់ទម្រង់ដើម្បីផ្សព្វផ្សាយទៅកាន់ពិភពលោក។ តាមរយៈការងារ និងក្តីស្រឡាញ់របស់លោកចំពោះប្រាសាទខ្មែរ និងរបាំខ្មែរ, លោក Thierry Diwo ត្រូវបានអ្នកខ្លះហៅគាត់ថា គឺជាបុគ្គលឆ្នើមដែលបានជួយផ្សព្វផ្សាយវប្បធម៌ និងទេសចរណ៍ខ្មែរទៅកាន់ពិភពលោក។

មិនត្រឹមតែថតប្រាសាទ និងសិល្បៈខ្មែរប៉ុណ្ណោះទេ។ តែលោកបានបណ្តុះបណ្តាលនិស្សិតខ្មែរមួយចំនួនក្នុងទសវត្សរ៍៩០ឲ្យក្លាយទៅជាអ្នកថតរូបដ៏ល្បីល្បាញនាពេលបច្ចុប្បន្ននេះ ក្នុងនោះមានដូចជា លោក ឃឹម សុវណ្ណារ៉ា អ្នកថតរូបដ៏ល្បីល្បាញ, លោក តាំង ជិនសុធី អ្នកថតរូបសារព័ត៌មានដ៏ល្បីប្រចាំទីភ្នាក់ងារព័ត៌មានបារាំង AFP, លោក ម៉ក់ រ៉េមីស្សា អ្នកថតរូបគ្រប់ទម្រង់ដ៏ល្បីល្បាញ, លោក ចាន់ វិថារិន ជាអ្នកគូររូបដ៏ល្បីល្បាញ និងអ្នកដទៃទៀត។ កូនសិស្សលោក Thierry Diwo បង្ហាញអារម្មណ៍សោកស្តាយ និងក្រៀមក្រំគ្រប់គ្នាបន្ទាប់ពីទទួលដំណឹងមរណភាព៕