រដ្ឋបាល ត្រាំ ចាប់ផ្ដើមអនុវត្តទណ្ឌកម្មលើអ៊ីរ៉ង់ឡើងវិញ

អន្តរជាតិ

រដ្ឋបាល ត្រាំ ចាប់ផ្ដើមអនុវត្តទណ្ឌកម្មលើអ៊ីរ៉ង់ឡើងវិញ

07, Aug 2018 , 8:19 pm

រូបភាព

ដោយ: តន ចាន់រិទ្ធារ៉ា

រដ្ឋបាលប្រធានាធិបតីអាមេរិក ដូណាល់ ត្រាំ នៅថ្ងៃទី៧ ខែសីហា បានចាប់ផ្ដើមអនុវត្តទណ្ឌកម្មសេដ្ឋកិច្ចលើអ៊ីរ៉ង់វិញ ក្រោយដើរចេញពីកិច្ចព្រមព្រៀងនុយក្លេអ៊ែរឆ្នាំ២០១៥ ។ ទណ្ឌកម្មលើកនេះ មានគោលដៅដាក់សម្ពាធផ្នែកហិរញ្ញវត្ថុលើទីក្រុងតេហេរ៉ង់ដែលអាចក្រុងវ៉ាស៊ីនតោនចោទថា បន្តអភិវឌ្ឍមីស៊ីលបាលីស្ទិក និងគាំទ្រក្រុមភេរវកម្ម។ យ៉ាងណា លោក ត្រាំ បានបើកផ្លូវសម្រាប់ការចរចា ប៉ុន្តែប្រធានាធិបតីអ៊ីរ៉ង់បានបដិសេធ។ អឺរ៉ុបឯណោះវិញ ក៏ខកចិត្តមិនស្ទើរដែរចំពោះសកម្មភាពអាមេរិក។

ចូលថ្ងៃទី៧ ខែសីហា ទណ្ឌកម្មជុំទីមួយរបស់អាមេរិកលើអ៊ីរ៉ង់ចាប់ផ្ដើមហើយ។ ការដាក់ទណ្ឌកម្មនេះ ធ្វើឡើងក្រោយប្រធានាធិបតីអាមេរិក ដូណាល់ ត្រាំ ប្រកាសដកអាមេរិកចេញពីកិច្ចព្រមព្រៀងនុយក្លេអ៊ែរឆ្នាំ២០១៥ កាលពីខែឧសភា ឆ្នាំ២០១៨ ។ លោក ត្រាំ ចាត់ទុកកិច្ចព្រមព្រៀងនេះ ជាកិច្ចព្រមព្រៀងដ៏អាក្រក់បំផុត ព្រោះនិយាយតែរឿងនុយក្លេអ៊ែរ មិនបានបញ្ចូលកម្មវិធីមីស៊ីលបាលីស្ទិករបស់អ៊ីរ៉ង់អ្វីឡើយ។

ទណ្ឌកម្មជុំទីមួយនេះនឹងផ្ដោតលើឧស្សាហកម្មសំខាន់របស់អ៊ីរ៉ង់ដូចជារថយន្ត និងកម្រាលព្រំជាដើម។ លើសពីនោះ អាមេរិកនឹងរឹតត្បិតអ៊ីរ៉ង់ពីការកាន់កាប់បណ្ឌធនាគារ និងវិស័យហិរញ្ញវត្ថុផង។ ក្នុងវិស័យហិរញ្ញវត្ថុនេះដែរ ក្រុងតេហេរ៉ង់ជួបបញ្ហាក្នុងស្រុកតាំងពីលោក ត្រាំ ប្រកាសដកខ្លួនមកម្ល៉េះ ដោយតម្លៃរូបិយវត្ថុអ៊ីរ៉ង់ rial បានធ្លាក់តម្លៃស្ទើរពាក់កណ្ដាលទៅហើយ។

ចំណែកឯទណ្ឌកម្មជុំទីពីរនឹងចាប់ផ្ដើមអនុវត្តនៅថ្ងៃទី៥ ខែខែវិច្ឆិកាឯណោះ។ ក្នុងផែនការទណ្ឌកម្មនេះ ក្រុងវ៉ាស៊ីនតោននឹងចាក់ចំផ្លូវដង្ហើមក្រុងតេហេរ៉ង់តែម្ដង គឺបិទការនាំចេញប្រេង។ ហាមឃាត់អ៊ីរ៉ង់នាំចេញប្រេង នឹងបង្កបញ្ហាកាន់តែធំសម្រាប់សេដ្ឋកិច្ចរបស់អ៊ីរ៉ង់ ទោះជាប្រទេសខ្លះដូចជាចិន ឥណ្ឌា និងតួកគី ដែលសុទ្ធតែជាម៉ូយប្រេងរបស់អ៊ីរ៉ង់ មិនអនុវត្តតាមសំណើអាមេរិក ហើយមិនព្រមកាត់បន្ថយការនាំចូលពីប្រេងពីអ៊ីរ៉ង់ក៏ដោយចុះ។

សង្គ្រាមពាក្យសម្ដីត្រាំ-រូហានី

មួយថ្ងៃមុនទណ្ឌកម្មអាមេរិកចូលធរមាន ប្រធានាធិបតីអាមេរិក ដូណាល់ ត្រាំ និងប្រធានាធិបតីអ៊ីរ៉ង់ ហាសាន់ រូហានី បានឆ្លើយឆ្លងគ្នាទៅមកដោយសម្ដីខ្លាំងៗ។ នៅថ្ងៃទី៦ ខែសីហា លោក ត្រាំ បានប្រាប់ឲ្យអ៊ីរ៉ង់ផ្លាស់ប្ដូរឥរិយាបថឆ្គាំឆ្គងរបស់ខ្លួន បើមិនចង់រងទណ្ឌកម្មសេដ្ឋកិច្ចធំមិនធ្លាប់មានដូចដែលលោកបានសន្យាកន្លងមក។ ប៉ុន្តែប្រធានាធិបតីអាមេរិករូបនេះក៏បានទុកទ្វារចំហសម្រាប់ការចរចាបញ្ចប់បញ្ហានៅថ្ងៃអនាគតផងដែរ។

យ៉ាងណាមិញ មេដឹកនាំអ៊ីរ៉ង់ រូហានី មិនបានអើពើសំណើរបស់លោក ត្រាំ ឡើយ។ បើតាមទីភ្នាក់ងារព័ត៌មាន AFP លោក រូហានី និយាយបែបប្រៀបធៀបក្នុងកិច្ចសម្ភាសជាមួយទូរទស្សន៍រដ្ឋអ៊ីរ៉ង់ ថា៖ «បើអ្នកជាសត្រូវ អ្នកចាក់អ្នកដទៃ ហើយក៏និយាយថា អ្នកចង់ចរចា។ ដូច្នេះរឿងដំបូង គឺអ្នកត្រូវដកកាំបិតសិន»។ ដោយហៅសម្ដីលោក ត្រាំ ជាការធ្វើសង្គ្រាមចិត្តសាស្ត្រប្រឆាំងអ៊ីរ៉ង់ លោក រូហានី បន្តថា ការចរចាជាមួយទណ្ឌកម្ម ជារឿងគ្មានន័យ។

ដោយឡែករដ្ឋមន្ត្រីការបរទេសអ៊ីរ៉ង់ មហាម៉ាត់ ចាវាដ ហ្សារីហ្វ ក៏បានចំអកឲ្យអាមេរិកថា ការណ៍ដែលអន្តរជាតិប្រតិកម្មទៅនឹងចំណាត់ការរបស់រដ្ឋបាលក្រុងវ៉ាស៊ីនតោន បង្ហាញពីការឯកោផ្នែកការទូតរបស់អាមេរិក។ ប្រមុខការទូតអ៊ីរ៉ង់រូបនេះក៏ទទួលស្គាល់ថា ទណ្ឌកម្មអាមេរិកនឹងបង្កបញ្ហាខ្លះទៅលើអ៊ីរ៉ង់មិនខានឡើយ។

អឺរ៉ុបបានត្រឹមខកចិត្ត

សហភាពអឺរ៉ុប គឺជាតួអង្គកណ្ដាលក្នុងជម្លោះរវាងអាមេរិក និងអ៊ីរ៉ង់។ ការដាក់ទណ្ឌកម្មឡើងវិញពីសំណាក់អាមេរិក បានធ្វើឲ្យកិច្ចប្រឹងប្រែងរបស់អឺរ៉ុបក្នុងពេលប៉ុន្មានខែមកនេះបែរទៅជាអសារបង់ដូចអំបិលត្រូវទឹក។ នេះក៏ព្រោះតែក្រោយអាមេរិកដើរចេញពីកិច្ចព្រមព្រៀងឆ្នាំ២០១៥ សហភាពអឺរ៉ុប និងភាគីហត្ថលេខីដូចជាបារាំង និងអង់គ្លេសជាដើម បានខិតខំសង្គ្រោះកិច្ចព្រមព្រៀងប្រវត្តិសាស្ត្រនេះពីការដួលរលំ។

ស្នងការទទួលបន្ទុកកិច្ចការការបរទេសអឺរ៉ុប Federica Mogherini លើកឡើងថា អឺរ៉ុបទាំងមូល និងភាគីពាក់ព័ន្ធកិច្ចព្រមព្រៀង ពិតជាខកចិត្តនឹងការសម្រេចចិត្តរបស់សម្ព័ន្ធមិត្តខ្លួនជាខ្លាំង។ យ៉ាងណាចុះ បើតាមប្រមុខការទូតអឺរ៉ុប អង្គការនេះនឹងបន្តការពារប្រតិបត្តិករពាណិជ្ជកម្មរបស់ក្រុមហ៊ុនអឺរ៉ុបដែលរកស៊ីស្របច្បាប់នៅអ៊ីរ៉ង់។

តាមពិតទៅ ក្រោយអាមេរិកគំរាមដាក់ទណ្ឌកម្មនេះ ក្រុមហ៊ុនរបស់អឺរ៉ុបដែលទទួលផលចំណេញច្រើនពីកិច្ចព្រមព្រៀងនុយក្លេអ៊ែរ បានសម្រេចចិត្តដកខ្លួនពីអ៊ីរ៉ង់ ព្រោះមិនចង់រងទណ្ឌកម្មអាមេរិក ដែលមិនលើកលែងឲ្យក្រុមហ៊ុនបរទេសណាដែលរកស៊ីនៅអ៊ីរ៉ង់នោះ។ លោក ត្រាំ ក៏ថែមទាំងគំរាមផ្ដល់ផលវិបាកដ៏ធំលើក្រុមហ៊ុន ឬបុគ្គលដែលបំពានចំណាត់ការរបស់អាមេរិក៕