ជាតិ
សេដ្ឋកិច្ច
ស្រូវនិងបន្លែជាង ៣ពាន់ហិចតា ក្នុងខេត្តចំនួន៦ បានខូចទាំងស្រុង ដោយជំនន់ទឹកភ្លៀង
× ស្រូវសរុបចំនួន ១៦៨១ហិចតា និងដំណាំបន្លែផ្សេងៗចំនួន១៥៦១ហិចតា ក្នុងខេត្តចំនួន៦ ដែលជាប់ទន្លេមេគង្គ ត្រូវបានខូចខាតទាំងស្រុងដោយជំនន់ទឹកភ្លៀង។ ខេត្តរងគ្រោះទាំង៦ នោះមាន ស្ទឹងត្រែង ក្រចេះ ត្បូងឃ្មុំ កំពង់ចាម ព្រៃវែង និងកណ្តាល។ នេះបើតាម លោក កែវ វី អ្នកនាំពាក្យគណៈកម្មការជាតិគ្រប់គ្រងគ្រោះមហន្តរាយ ដែលប្រាប់សារព័ត៌មានថ្មីៗ នៅថ្ងៃទី១០ ខែសីហា។
អ្នកនាំពាក្យរូបនេះ បានបន្ថែមទៀតថា ក្រៅពីចំនួនខូចខាតទាំងស្រុងខាងលើ នៅមានស្រូវ និងសន្ទូងជាង២,៧ម៉ឺនហិចតា និងចម្ការបន្លែ ផ្លែឈើជិត៦០០០ហិចតា កំពុងលិចលង់ និងប្រឈមនឹងការខូច ផងដែរ។
ជាមួយគ្នានេះ ប្រជាពលរដ្ឋជាង៦ម៉ឺនគ្រួសារ ក្នុងស្រុកចំនួន៣៧ នៅខេត្តទាំង៦លើ កំពុងជួបនឹងគ្រោះជន់លិចនេះ។ ក្នុងនោះ មាន៥១១២គ្រួសារ ត្រូវបានជម្លៀសទៅទីទួលសុវត្ថិភាពចំនួន៥៣កន្លែង។
លោក បានបញ្ជាក់ថា ការប៉ះពាល់ និងការខូចខាតនេះ គឺបណ្តាលមកពីកម្ពុជា បានរងឥទ្ធិពលសម្ពាធទាប និងព្យុះផ្សេងៗជាច្រើន ពីបណ្តាប្រទេសជាប់អាងទន្លេមេគង្គ និងប្រទេសចិនជាដើម ដែលស្របពេលជាមួយនឹងវស្សានៅកម្ពុជាបានមកដល់ ទើបបានធ្វើឲ្យមានភ្លៀងធ្លាក់ខ្លាំង ពិសេសខេត្តដែលជាប់ទន្លេមេគង្គនេះតែម្តង៕
Tag:
ជំនន់ទឹកភ្លៀង
ស្រូវ
ចម្ការ
© រក្សាសិទ្ធិដោយ thmeythmey.com