ជាតិ
សេដ្ឋកិច្ច
កម្ពុជា នាំចេញសម្លៀកបំពាក់មានទំហំទឹកប្រាក់ជាង ៤ពាន់លានដុល្លារ ក្នុងឆមាសទី១
× ឆមាសទី១ ឆ្នាំ២០១៨ កម្ពុជាសម្រេចបានទំហំពាណិជ្ជកម្មសរុប ១៣៩៨៥លានដុល្លារ។ ក្នុងនោះ ការនាំចេញមានចំនួនប្រមាណ ៥៧៩៤លានដុល្លារ កើនឡើង១១ភាគរយ និងការនាំចូល មានចំនួន ៨១៩១លានដុល្លារ កើនឡើង១០.៦ភាគរយ បើធៀបនឹងរយៈពេលដូចគ្នានៅឆ្នាំ២០១៧។ នេះបើតាមរបាយការណ៍ពាក់កណ្ដាលឆ្នាំរបស់ធនាគារជាតិនៃកម្ពុជា (NBC)។
របាយការណ៍បានបន្ថែមថា ក្នុងទំហំពាណិជ្ជកម្មនៃការនាំចេញរបស់កម្ពុជា ចំនួន៥៧៩៤លានដុល្លារនេះ ការនាំចេញសម្លៀកបំពាក់មានទំហំទឹកប្រាក់ចំនួន ៤១៤៣លានដុល្លារ កើនឡើង១១ភាគរយ ។ ចំណែកផលិតផលកសិកម្ម មាន២៧២លានដុល្លារ កើនឡើង៨ភាគរយ និងការនាំចេញផ្សេងៗមានចំនួន ១៣៧៩លានដុល្លារ កើនឡើង១៤ភាគរយ។
កន្លងមករដ្ឋមន្ដ្រីក្រសួងពាណិជ្ជកម្មលោក ប៉ាន់ សូស័ក្តិ បានបញ្ជាក់ថា សមាហរណកម្មសេដ្ឋកិច្ចនេះ បានបើកច្រកទីផ្សារ នាំចេញកាន់តែទូលំទូលាយសម្រាប់កម្ពុជា នៅក្រោមប្រព័ន្ធអនុគ្រោះពន្ធ MFN, GSP, និង EBA ផ្តល់ដោយ ប្រទេសចំនួន ៣២ ក្នុងពិភពលោក។
កាលពីឆ្នាំ២០១៧ ការនាំចេញរបស់កម្ពុជា មានតម្លៃប្រមាណ ១១,២ពាន់លានដុល្លារ កើនឡើងជាង៩ភាគរយ បើធៀបនឹងឆ្នាំ២០១៦ មានទឹកប្រាក់១០,២ពាន់លានដុល្លារ។ ការនាំចូលមានទំហំទឹកប្រាក់ជាង១៥ពាន់លានដុល្លារ កើនឡើងជិត១០ភាគរយ ធៀបនឹងឆ្នាំ២០១៦ មានជាង១៤ពាន់លានដុល្លារ។
ផលិតផលនាំចេញសំខាន់ៗរបស់កម្ពុជា រួមមាន វាយនភ័ណ្ឌ សម្លៀកបំពាក់ ស្បែកជើង កាបូប គ្រឿងអេឡិចត្រូនិក ទោចក្រយានយន្ត ផលនេសាទ ជ័រកៅស៊ូ ឈើកែច្នៃ អង្ករ ដំឡូងមី គ្រាប់ស្វាយចន្ទី ពោតក្រហម សណ្តែកសៀង ម្រេច ផ្លែស្វាយស្រស់ ដូងប្រេង និងទំនិញកសិកម្មដទៃទៀត សម្រាប់ទីផ្សារ អឺរ៉ុប អាម៉េរិក កាណាដា ជប៉ុន ចិន និងអាស៊ាន ជាដើម៕
Tag:
ពាណិជ្ជកម្ម
នាំចេញ-នាំចូល
ប៉ាន សូរស័ក្ដិ
© រក្សាសិទ្ធិដោយ thmeythmey.com