ក្រចេះ៖ ទឹកទន្លេមេគង្គ ហក់ឡើងដល់កម្រិតប្រកាសអាសន្ន

ជាតិ

ក្រចេះ៖ ទឹកទន្លេមេគង្គ ហក់ឡើងដល់កម្រិតប្រកាសអាសន្ន

11, Aug 2018 , 4:11 pm

រូបភាព

រូបភាពពីសាលាខេត្តក្រចេះ

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ នៅរសៀលថ្ងៃសៅរ៍នេះ កម្ពស់ទឹកទន្លេមេគង្គ ក្នុងខេត្តក្រចេះ បានបន្តហក់ឡើងដល់កម្ពស់ ២២ ម៉ែត្រ ដែលជាកម្រិតប្រកាសអាសន្ន និងអាចបង្កគ្រោះថ្នាក់ដល់ជីវិត និងប៉ះពាល់ទ្រព្យសម្បត្តិរបស់ពលរដ្ឋផងដែរ។ លោក វ៉ា ថន អភិបាលខេត្តក្រចេះ បានបញ្ជាក់ប្រាប់សារព័ត៌មានថ្មីៗដូច្នេះ។

ការហក់ឡើងរបស់ទឹកទន្លេមេគង្គ បានប៉ះពាល់ និងលិចផ្នែកខ្លះនៃក្រុងក្រចេះ ព្រមទាំងស្រុកចំនួន៤ទៀត គឺស្រុកសំបូរ ស្រុកឆ្លូង ស្រុកចិត្របុរី និងស្រុកព្រែកប្រសព្វ។ នេះបើតាមលោកអភិបាលខេត្ត វ៉ា ថន ។

ដោយសារកម្ពស់ទឹកបន្តកើនឡើង រដ្ឋបាលខេត្តក្រចេះ ក៏បានជូនដំណឹងដល់ប្រជាពលរដ្ឋ ដែលរស់នៅតាមដងទន្លេមេគង្គ និងតាមតំបន់កំពុងរងផលប៉ះពាល់ ឲ្យបង្កើនការប្រុងប្រយ័ត្នដែរ ខណៈរដ្ឋបាលខេត្ត ក៏បានត្រៀមកម្លាំង ដើម្បីសង្គ្រោះប្រជាពលរដ្ឋឲ្យទាន់ពេល ក្នុងករណីយថាហេតុការណ៍ណាមួយនោះ។ នេះបើតាមលោក វ៉ា ថនដដែល៕