កីឡាជាតិ
ជាតិ
Keisuke Honda ស្ម័គ្រចិត្តធ្វើជាគ្រូបង្វឹកថ្មីរបស់ក្រុមកីឡាបាល់ទាត់ជម្រើសជាតិកម្ពុជា
× លោក Keisuke Honda ក្លាយជាអ្នកចាត់ការទូទៅថ្មីនៃក្រុមកីឡាបាល់ទាត់ជម្រើសជាតិកម្ពុជា។ លោកបានបង្ហាញវត្តមាននាពិធីផ្លូវការមួយដែលរៀបចំដោយសហព័ន្ធកីឡាបាល់ទាត់កម្ពុជា នៅសណ្ឋាគារ Le Royal នាព្រឹកថ្ងៃទី១២ ខែសីហា នេះ។
Honda អាយុ៣២ឆ្នាំ ជាខ្សែបម្រើប្រយុទ្ធដ៏ឆ្នើមនៃក្រុមកីឡាបាល់ទាត់ជម្រើសជាតិជប៉ុន ដែលទើបតែចុះហត្ថលេខាលេងឲ្យក្លិប Melbourne Victory របស់អូស្ត្រាលី។ លោកដឹកនាំក្រុមកម្ពុជាដោយស្ម័គ្រចិត្ត ពោលគឺមិនត្រូវការប្រាក់កម្រៃនោះឡើយ។ មែនទែនទៅ លោក Honda មិនអាចបង្ហាញវត្តមានគ្រប់ពេលជាមួយក្រុមជម្រើសជាតិកម្ពុជាឡើយ ប៉ុន្តែលោក
មានកាលវិភាគដ៏ត្រឹមត្រូវរវាងការចាត់ចែងដឹកនាំក្រុមកម្ពុជា និងការលេងនៅក្លិប Melbourne Victory។
ក្រោយទំនេរពីការលេងនៅ Melbourne Victory លោកនឹងដឹកនាំកិច្ចប្រជុំមួយសប្តាហ៍ម្តងតាមរយៈវីដេអូ Conference ជាមួយក្រុមការងារនៅកម្ពុជា។ លោកក៏ត្រូវការកិច្ចសហការពីក្លិបផ្សេងៗផងដែរ។
បើគិតចាប់តាំងពីឆ្នាំ២០០៨ មក Honda លេងឲ្យក្រុមជម្រើសជាតិប្រមាណ៩០ប្រកួត និងមានវត្តមាននៅ World Cup ៣លើកជាប់ៗ ពោលគឺឆ្នាំ២០១០ ឆ្នាំ២០១៤ និងឆ្នាំ២០១៨ ហើយកីឡាករអន្តរជាតិរូបនេះ បានជាប់ជា Player of the Tournament នៅពេលដែលជប៉ុនលើកពាន AFC Asian Cup ឆ្នាំ២០១១។
នៅក្លិបអាជីព Honda ផ្តើមលេងឲ្យក្លិបជប៉ុន Nagoya Grampus ពីឆ្នាំ២០០៤ ដល់ឆ្នាំ២០០៧ ហើយទៅលេងជាបន្តបន្ទាប់នៅ VVV-Venlo, CSKA Moscow, AC Milan និង Pachuca។ នៅកម្ពុជា លោកក៏ជាម្ចាស់ក្លិបសូលទីឡូអង្គរ ដែលមានមូលដ្ឋាននៅខេត្តសៀមរាបផងដែរ។
លោក Honda ដែលបានហៅខ្លួនឯងថា ជាគ្រូបង្វឹកមិនផ្ទាល់នោះ មានបេសកកម្មជាមួយក្រុមជម្រើសជាតិកម្ពុជានាព្រឹត្តិការណ៍ AFF Suzuki Cup នាខែវិច្ឆិកា ខាងមុខ ដោយកម្ពុជា ស្ថិតក្នុងពូល A ជាមួយវៀតណាម ម៉ាឡេស៊ី មីយ៉ាន់ម៉ា និងម្ចាស់ផ្ទះឡាវ៕
© រក្សាសិទ្ធិដោយ thmeythmey.com