ភ្នំពេញ៖ ជំងឺថប់បារម្ភកើតមានច្រើនជាងគេបង្អស់ ក្នុងចំណោមជំងឺផ្លូវចិត្តផ្សេងៗទៀត ហើយជំងឺនេះ កើតមានច្រើនលើមនុស្សស្រី។ ជំងឺថប់បារម្ភ ជាក្រុមជំងឺដែលមានសភាពខ្លាំងក្លា និងធ្ងន់ធ្ងរ មានរយៈពេលយូរ និងប៉ះពាល់ដល់តួនាទី មុខងារ និងជីវិតប្រចាំថ្ងៃរបស់អ្នកកើតជំងឺ។ នេះជាការបញ្ជាក់របស់លោកវេជ្ជបណ្ឌិត យឹម សុបុត្រា ប្រធានផ្នែកសុខភាពផ្លូវចិត្ត នៃមន្ទីរពេទ្យមិត្តភាពខ្មែរ-សូវៀត នៅក្នុងសិក្ខាសាលាស្ដីពីជំងឺធ្លាក់ទឹកចិត្ត និងជំងឺថប់បារម្ភ។
សិក្ខាសាលាស្ដីពីជំងឺធ្លាក់ទឹកចិត្ត និងជំងឺថប់បារម្ភ ដែលរៀបចំកាលពីថ្ងៃទី៥ សីហាកន្លងទៅ មានវាគ្មិនសំខាន់ៗដូចជា ព្រះតេជគុណ គូ សុភាព និងលោកវេជ្ជបណ្ឌិត យឹម សុបុត្រា បានចូលរួមចែករំលែកចំណេះដឹងទាក់ទងនឹងវិធីសាស្ត្រព្យាបាល និងមូលហេតុនៃការកើតជំងឺនេះ។
លោកវេជ្ជបណ្ឌិត យឹម សុបុត្រា បញ្ជាក់ថា ជំងឺថប់បារម្ភស្ដែងចេញរោគសញ្ញាលើរាងកាយ និងអារម្មណ៍។ សម្រាប់រោគសញ្ញាមានលើរាងកាយ រួមមាន បេះដូងដើរញាប់ ចង្វាក់ដង្ហើមខ្លីៗ, វិលមុខ ស្រវាំងភ្នែក រោយកញ្ចឹងក, ស្ងួតមាត់, នោមញឹក, ពិបាកគេង គេងមិនលក់, ឧស្សាហ៍កោសខ្យល់ និងបែកញើសហួសប្រមាណ។ ចំណែករោគសញ្ញាមានលើអារម្មណ៍ រួមមាន ព្រួយបារម្ភ ភ័យខ្លាចគ្មានហេតុផល, ភ័យខ្លាចស្លាប់ដោយគាំងបេះដូង,អន្ទះសារពិបាកក្នុងការរង់ចាំ, ពិបាកក្នុងការផ្ទង់អារម្មណ៍ និងមិនហ៊ានធ្វើដំណើរ ឬនៅតែឯង។
ក្នុងកិច្ចសម្ភាសជាមួយសារព័ត៌មានថ្មីៗ លោកវេជ្ជបណ្ឌិត យឹម សុបុត្រា លើកឡើងថា ការព្យាបាលជំងឺថប់បារម្ភមានពីរបែប គឺការប្រើប្រាស់ថ្នាំ និងមិនប្រើថ្នាំ។ ដោយឡែក ការព្យាបាលដោយមិនប្រើប្រាស់ថ្នាំ គឺការព្យាបាលបែបពុទ្ធិ-អាកប្បកិរិយា,ការសម្រាកកាយ ចិត្ត, ការកាត់បន្ថយភាពតានតឹងជាដើម។
ជាមួយគ្នានេះ ការលេងបណ្ដាញសង្គមច្រើន ក៏អាចបណ្ដាលឲ្យមានបញ្ហា និងកើតជំងឺថប់បារម្ភនេះផងដែរ ដោយសារតែចំណាយពេលច្រើនលើបណ្ដាញសង្គម។ នេះបើតាមលោកវេជ្ជបណ្ឌិត យឹម សុបុត្រា។
ដើម្បីជ្រាបច្បាស់ សូមអញ្ជើញស្ដាប់កិច្ចសម្ភាសរវាងកញ្ញា ញឹក ស្រីល័ក្ខ អ្នកយកព័ត៌មាននៃសារព័ត៌មានថ្មីៗ ជាមួយលោកវេជ្ជបណ្ឌិត យឹម សុបុត្រា ប្រធានផ្នែកសុខភាពផ្លូវចិត្ត នៃមន្ទីរពេទ្យមិត្តភាពខ្មែរ-សូវៀត ដូចតទៅ៖