សមត្ថកិច្ច ចាប់ខ្លួនជនជាតិចិន៦នាក់ ដែលដើរផ្សព្វផ្សាយមុខរបរម៉ាស្សា បង្កប់សេវាផ្លូវភេទ

ជាតិ

សមត្ថកិច្ច ចាប់ខ្លួនជនជាតិចិន៦នាក់ ដែលដើរផ្សព្វផ្សាយមុខរបរម៉ាស្សា បង្កប់សេវាផ្លូវភេទ

13, Aug 2018 , 3:46 pm

រូបភាព

ដោយ: ថ្មីៗ

ព្រះសីហនុ៖ ជនជាតិ៦នាក់ ដែលដើរចែកខិតបណ្ណផ្សព្វផ្សាយមុខរបរម៉ាស្សា ហើយសង្ស័យថា បង្កប់សេវាផ្លូវភេទនោះ ត្រូវបានសមត្ថកិច្ចចាប់ខ្លួន កាលពីថ្ងៃយប់ថ្ងៃទី១២ សីហា។

ក្រោយសាកសួរចម្លើយ តាមរយៈអ្នកបកប្រែជុំវិញករណីនេះ បានបញ្ជាក់ថា ខិត្តបណ្ណចែកចាយទាំងនោះ ចង់បង្ហាញពីសេវាកម្មម៉ាស្សាប៉ុណ្ណោះ ប៉ុន្តែដោយសាររូបភាពមានរូបស្រីស្លៀកស៊ិចស៊ី ដែលវាហាក់ដូចជាបង្កប់ ទៅជាការផ្សព្វផ្សាយអាជីវកម្មផ្លូវភេទ ឬ ពេស្យាចារ ដែលជាអំពើខុសច្បាប់ នៅប្រទេសកម្ពុជាទៅវិញ។ នេះបើតាមអគ្គស្នងការដ្ឋាននគរបាលជាតិ ដែលបានស្រង់សម្តីលោក ជួន ណារិន្ទស្នងការនគរបាលខេត្តព្រះសីហនុ ។

លោក ជួន ណារិន្ទ ស្នងការនគរបាលខេត្តព្រះសីហនុ បានបន្ថែមថា៖« បុរសជនជាតិចិនទាំង៦នាក់នោះ យើងបានធ្វើការអប់រំ ឲ្យធ្វើកិច្ចសន្យាបញ្ឈប់សកម្មភាពផ្សព្វផ្សាយនេះទាំងស្រុង ពីព្រោះវាជាអំពើខុសច្បាប់នៅកម្ពុជា »។

ការអនុវត្តវិធានការរបស់សមត្ថកិច្ចនេះ ធ្វើឡើងបន្ទាប់ពីជនជាតិចិនទាំងនោះ ដើរចែកខិតបណ្ណផ្សព្វផ្សាយមុខរបរម៉ាស្សាយ៉ាងអនាធិបតេយ្យ ដែលនាំឲ្យពលរដ្ឋប្រើប្រាស់ហ្វេសប៊ុករិះគន់ចំពោះទង្វើរបស់ចិន ថា ជាសកម្មភាពប៉ះពាល់ដល់សណ្ដាប់ធ្នាប់កម្ពុជា៕