បេក្ខជនប្រឡងបាក់ឌុប កាន់តែខ្មីឃ្មាតពីមួយឆ្នាំទៅមួយឆ្នាំ ដើម្បីត្រៀមប្រឡង

ជាតិ

បទយកការណ៍ / បទសម្ភាសន៍

បាក់ឌុប

បេក្ខជនប្រឡងបាក់ឌុប កាន់តែខ្មីឃ្មាតពីមួយឆ្នាំទៅមួយឆ្នាំ ដើម្បីត្រៀមប្រឡង

13, Aug 2018 , 10:19 pm

រូបភាព

ដោយ: ប៉ូ សាគុន

គិតចាប់ពីសម័យប្រឡងសញ្ញាបត្រទុតិយភូមិ ឬគេហៅជាសាមញ្ញថា ប្រឡងបាក់ឌុប ត្រូវបានរឹតបន្តឹង ពោលគឺចាប់តាំងពីឆ្នាំ២០១៤មក គេសង្កេតឃើញថា សិស្សានុសិស្សជាបេក្ខជនបានឱហាតសិក្សាគួរឲ្យកត់សម្គាល់។ គ្រូបង្រៀនគួរត្រៀមប្រឡងបាក់ឌុបនៅសាលាជ័យថាវី គឺជាសាក្សីនៃទិដ្ឋភាពថ្មីនេះ។

នេះជាប្រធានបទបទយកការណ៍របស់កញ្ញា ប៉ូ សាគុន។ សូមនាងកញ្ញា លោក លោកស្រី រីករាយស្តាប់បទយកការណ៍ខាងក្រោមនេះដូចតទៅ៖

យើងកំពុងនៅក្នុងបន្ទប់បង្រៀនគួរមួយក្នុងចំណោមបន្ទប់ជាច្រើនទៀតដែលស្ថិតក្នុងសាលារៀនជ័យថាវីដ៏ល្បីល្បាញសម្រាប់សិស្សវិទ្យាល័យ។ ក្នុងបន្ទប់រៀនគួរធំល្មម សិស្សប្រមាណជិត២០០នាក់បានអង្គុយជាជួរតាមតុសិស្សរាងទ្រវែ។ ក្នុងបន្ទប់ដែលត្រូវផ្ទុកសិស្សជាច្រើនយ៉ាងដូច្នេះ តុត្រូវបានតម្រៀបគ្នាពីតុទាបជាងគេនៅខាងមុខ បន្តទៅតុខ្ពស់បន្តបន្ទាប់ទៅខាងក្រោយ ដើម្បីអនុញ្ញាតឲ្យសិស្សដែលអង្គុយនៅខាងក្រោយអាចមើលឃើញការពន្យល់របស់គ្រូ។ ទោះយ៉ាងនេះក៏ដោយ យូរៗម្តងគេឃើញសិស្សខ្លះ លើកយកទូរសព្ទរបស់ពួកគេផ្តិតយកអក្សរពីលើក្តារខៀនរបស់គ្រូ។ ទោះបីការអង្គុយរៀនចង្អៀតបន្តិចក្ដី ដោយតុខ្លះមាន៣នាក់ទៅ៤នាក់ តែសិស្សនៅក្នុងបន្ទប់មួយនេះ នៅតែខំតាមដានគ្រូពន្យល់ដោយភាពស្ងៀមស្ងាត់។ អ្នកខ្លះគ្រាន់តែសួរគ្នាពីអក្សរដែលខ្លួនមើលមិនច្បាស់តែប៉ុណ្ណោះ។

គ្រូបង្រៀននៅក្នុងបន្ទប់ខាងលើនេះគឺលោក ធូ ភន ដែលកំពុងបង្រៀនគួរមុខវិជ្ជាជីវដល់សិស្សជិត២០០នាក់។ ដើម្បីឱ្យសំឡេងរបស់ខ្លួនឮទៅដល់សិស្សបានគ្រប់គ្នា លោក ធូ ភន ចាំបាច់ត្រូវប្រើឧបករណ៍បំពងសំឡេង ជាជំនួយដល់សិស្សងាយស្រួលទទួលមេរៀន។ តាមបទពិសោធន៍ ដែលលោកគ្រូរូបនេះធ្លាប់បង្រៀនគួរ លោកជ្រើសរើសបង្រៀនមេរៀនច្រើនជាងលំហាត់ ព្រោះវាទទួលបានពិន្ទុច្រើន។ មានបទពិសោធន៍បង្រៀន២៣ឆ្នាំលោកគ្រូ ធូ ភន អះអាងថា ភាគច្រើនមេរៀនដែលលោកបង្រៀនត្រូវនឹងវិញ្ញាសាដែលក្រសួងចេញក្នុងពេលប្រឡង។

លោកបានផ្ដល់ដំបូន្មានដល់សិស្សដែលត្រៀមប្រឡងថា គួរតាមដានវិញ្ញាសាប្រឡងបាក់ឌុបពីឆ្នាំ២០១៤ដល់ឆ្នាំចុងក្រោយ ដើម្បីអាចដឹងថា ក្រសួងចូលចិត្តចេញមេរៀនណា និងត្រង់ចំណុចណាជាងគេ ហើយត្រូវរៀនឱ្យច្រើនត្រង់ចំនុចនោះ។ លោក ធូ ភន បញ្ជាក់៖«ខ្ញុំចង់ឱ្យប្អូនៗតាមដានប្រវត្តិចេញវិញ្ញាសាពីឆ្នាំ២០១៤ដល់២០១៧ថាក្រសួងអប់រំចេញអ្វីខ្លះ របៀបដូចម្ដេច ជួនកាលគេគ្រាន់តែកាឡៃបន្តិចបន្ទួច។ បើលំហាត់គាត់គ្រាន់តែមើលក្នុងសៀវភៅសង្ខេបរបស់ក្រសួងតូចមួយទៅបានហើយ ហើយបើមករៀនគួរបំប៉នបន្ថែមចំណេះកាន់តែកើន»។

កំពុងអង្គុយក្នុងបន្ទប់មួយជាមួយគ្រូដទៃទៀត ដើម្បីរង់ចាំម៉ោងបង្រៀន លោកគ្រូ ទៀង ប៉ាង ដែលជាគ្រូបង្រៀនគួររូបវិទ្យានៅសាលាជ័យថាវីមួយរូបដែរ បានកត់សម្គាល់ថា ចាប់តាំងពីមានការរឹតបន្តឹងក្នុងពេលប្រឡង សិស្សកាន់តែខំប្រឹងប្រែងរៀនសូត្រពីមួយឆ្នាំទៅមួយឆ្នាំ។ សម្រាប់លោកគ្រូ ទៀង ប៉ាង ពាក្យថា «អ្នកចេះគឺជាប់» បានប្ដូរសិស្សពីការមិនចូលសាលារៀន មកគោរពវិន័យ និងយកចិត្តទុកដាក់រៀនសូត្រ ហើយពួកគេចាប់ផ្ដើមពង្រឹងខ្លួនឱ្យមានគុណភាពទ្វេដង។ «រៀនសំខាន់ប្រឡង បើពេលប្រឡងមិនរៀបឱ្យបានត្រឹមត្រូវ សិស្សរហូតដល់វាមិនរៀន វាអាងតែចម្លងគ្នា។ ឥឡូវរដ្ឋមន្ត្រីធ្វើតឹងស្មើ ដកទូរស័ព្ទ ដកអ្វីទាំងអស់ ចឹងកូនសិស្សវាខំរៀនហើយ។

នេះជាការបញ្ជាក់របស់លោក ទៀង ប៉ាង ទើបតែរៀនចប់ម៉ោងជីវវិទ្យា ហើយដើរតម្រង់ទៅរកបន្ទប់រៀនមួយទៀត កញ្ញា ពេជ ណាវី គឺជាសិស្សថ្នាក់ទី១២មួយរូប ដែលបានមករៀនគួរក្នុងសាលាជ័យថាវី ត្រៀមប្រឡងបាក់ឌុបឆ្នាំ២០១៨នេះ។ ដោយសារតែមិនមានពេលវេលារៀនគួរគ្រប់គ្រាន់ ណាវីបានជ្រើសរើសរៀនគួរតែមុខវិទ្យាសំខាន់មួយចំនួនតែប៉ុណ្ណោះដូចជា គណិតវិទ្យា រូបវិទ្យា គីមីវិទ្យា និង ជីវវិទ្យា។ ចំណែកឯមុខវិជ្ជាដទៃទៀត ណាវី កំពុងសិក្សានៅផ្ទះដោយខ្លួនឯង។ ឆ្លងកាត់ការរៀនគួរច្រើន និងការខឹតខំប្រឹងប្រែងខ្លួនឯងផងនោះ ណាវីហាក់មានសង្ឃឹមជាវិជ្ជមាន ក្នុងថ្ងៃប្រឡងខាងមុខ។ កញ្ញា ពេជ ណាវី បញ្ជាក់«ខ្ញុំគិតថាខ្ញុំអាចធ្វើបានលទ្ធផលល្អច្រើន ព្រោះខ្ញុំយល់ដឹងច្រើន ចឹងវាងាយស្រួលក្នុងការប្រឡង»។

ក្រលេកទៅមើលបន្ទប់រៀនមួយទៀតនៅក្បែរគ្នានោះ មានសិស្សមួយក្រុមកំពុងរង់ចាំចូលបន្ទប់រៀន។ កញ្ញា កណិការ បានងាកមកឆ្លើយសំនួររបស់ខ្ញុំ ដែលសួរថាហេតុអ្វីបានជា នាងសម្រេចចិត្តមករៀនគួរនៅទីនេះ នៅមុនសម័យប្រឡងបាក់ឌុបមកដល់? យុវតីវ័យ១៨ឆ្នាំបានទទួលស្គាល់ថា ការសិក្សានៅក្នុងកម្មវិធីរបស់សាលារៀនកន្លងមក មិនគ្រប់គ្រាន់នឹងធានាឲ្យកញ្ញាមានជំនឿចិត្តលើខ្លួនឯងក្នុងសម័យប្រឡងខាងមុខនេះឡើយ។ កណិការ បានបញ្ជាក់ទៀតថា កញ្ញាថែមទាំងបានព្យាយាមសិក្សាតាមប្រព័ន្ធអនឡាញទៀតផង។ «ខ្ញុំរៀនតែនៅសាលារដ្ឋមិនសូវជាទុកចិត្តថាប្រឡងជាប់ទេ ព្រោះគ្រូបង្រៀនទៅតាមកម្មវិធី ចឹងរៀនលឿន។ ដើម្បីយើងរៀនកាន់តែច្បាស់និងបែកគំនិត យើងត្រូវរៀនគួរថែមទៀត សំខាន់បើមានឱកាសរៀនយើងត្រូវតែខំរៀនទៅ ទុកពេលទំនេរឥតប្រយោជន៍ធ្វើអី។ នេះជាការបញ្ជាក់បន្ថែមរបស់កញ្ញា កណិកា។

ចំណែកកញ្ញា ស៊ុម លីដា វិញ នាងទើបតែផ្លាស់ពីខេត្តស្វាយរៀង មករៀននៅទីក្រុងភ្នំពេញក្នុងឆ្នាំនេះ។ បន្ទាប់ពីបញ្ចប់ឆ្នាំសិក្សារដ្ឋថ្នាក់ទី១២ ហើយរង់ចាំសម័យប្រឡងបាក់ឌុបនៅថ្ងៃទី២០ខែសីហានេះ លីដាបានចំណាយពេលរៀនគួរពេញមួយថ្ងៃ ពីម៉ោង៨ព្រឹករហូតដល់ម៉ោង៤រសៀល។ លីដា ត្រូវចំណាយប្រាក់ប្រមាណ១ម៉ឺនរៀល សម្រាប់តែថ្លៃឈ្នួលរៀនគួរ។ ផ្លាស់មករៀនគួរនៅភ្នំពេញព្រោះតែនាងយល់ថានៅក្នុងរាជធានីនេះ នាងអាចទទួលបានចំណេះច្រើន ព្រមទាំងមានឱកាសឱ្យបងរបស់ខ្លួន ដែលជាគ្រូបង្រៀនផងនោះ បានបង្រៀនបន្ថែម។ កញ្ញា ស៊ុម លីដា បញ្ជាក់បន្ថែម៖« ខ្ញុំរៀនខ្មែរ គណិត រូប គីមី ជីវ។ ខ្ញុំរៀនគណិតយល់ជាងគេ ហើយខ្ញុំសង្ឃឹមថា ខ្ញុំនឹងប្រឡងជាប់ ព្រោះពេលខ្ញុំរៀនខ្ញុំធ្វើបានសឹងគ្រប់មុខដែរ»។

ក្រសួងអប់រំយុវជននិងកីឡា បានចាប់ផ្ដើមរឹតបន្តឹងគុណភាពប្រឡងចាប់ពីឆ្នាំ២០១៤មក។ ក្នុងឆ្នាំ២០១៤នេះមានការប្រឡងពីរលើក ដោយលើកទី១បេក្ខជនប្រឡងជាប់មានចំនួនជាង២ម៉ឺននាក់ ស្មើនឹងជាង២៥ភាគរយ បេក្ខជនសរុបជិត៩ម៉ឺននាក់ និងលើកទី២មានបេក្ខជនប្រឡងជាប់ចំនួនជិត២ម៉ឺននាក់ទៀត។ ឆ្នាំ២០១៥ បេក្ខជនប្រឡងជាប់មានចំនួនជិត៥ម៉ឺននាក់ ស្មើនឹងជាង ៥៥% ក្នុងចំណោមបេក្ខជនវត្តមានជាង៨ម៉ឺននាក់។ ឆ្នាំ២០១៦ បេក្ខជនប្រឡងជាប់មានចំនួនជាង៥ម៉ឺននាក់ ស្មើនឹងជាង ៦២% នៃបេក្ខជនវត្តមានចំនួនជិត៩ម៉ឺននាក់។ ឆ្នាំ២០១៧ កន្លងទៅ សិស្សប្រឡងជាប់ជាង៦៣% ក្នុងចំណោមបេក្ខជនជិត១០ម៉ឺននាក់៕