១៧នាក់ស្លាប់ និងជិត៨ម៉ឺនគ្រួសារ ក្នុងខេត្ត៦ កំពុងរងគ្រោះដោយសារទឹកជំនន់ទន្លេមេគង្គ

ជាតិ

១៧នាក់ស្លាប់ និងជិត៨ម៉ឺនគ្រួសារ ក្នុងខេត្ត៦ កំពុងរងគ្រោះដោយសារទឹកជំនន់ទន្លេមេគង្គ

14, Aug 2018 , 9:59 pm

រូបភាព

រូបភាពបានពីក្រសួងធនធានទឹក និងឧតុនិយម.

ដោយ: អ៊ូ សុខមាន (OU Sokmean)

ទឹកជំនន់ទន្លេមេគង្គ បានធ្វើឲ្យមនុស្សចំនួន១៧នាក់ស្លាប់ (កុមារ៩នាក់) និងប្រជាពលរដ្ឋសរុប ៧៧៦៦៧គ្រួសារ ក្នុងខេត្ត៦ រួមមាន ស្ទឹងត្រែង ក្រចេះ ត្បូងឃ្មុំ កំពង់ចាម ព្រៃវែង និងកណ្តាល កំពុងរងការប៉ះពាល់។ នេះបើតាមលោក កែវ វី អ្នកនាំពាក្យគណៈកម្មការជាតិគ្រប់គ្រងគ្រោះមហន្តរាយ ដែលប្រាប់សារព័ត៌មានថ្មីៗ នាថ្ងៃទី១៤ សីហា។

លោក កែវ វី អះអាងថា ទឹកជំនន់នេះ ក៏បានធ្វើឲ្យផលដំណាំរបស់ប្រជាកសិករក្នុងតំបន់ខូចខាតទាំងស្រុងផងដែរ ដោយក្នុងនោះ ស្រូវសរុប៤៨១៧ហិចតា សំណាប១២ហិចតា និងដំណាំបន្លែផ្សេងៗ ២០១២ហិចតា។ លោក បន្តថា ក្រៅពីដំណាំ នៅមានស្រូវ និងសន្ទូងជាង៣ម៉ឺនហិចតា រួមទាំងចម្ការបន្លែ និងផ្លែឈើផ្សេងៗ ៤៥២៧ហិចតា កំពុងលិចលង់ និងប្រឈមនឹងការខូច។

អ្នកនាំពាក្យដដែល បន្ថែមថាសាលារៀនចំនួន ២០៣កន្លែង វត្តអារាមចំនួន ១០៧កន្លែង មណ្ឌលសុខភាពចំនួន ១៤កន្លែង ត្រូវបានជន់លិច និងមានការរុះរើសផ្ទះចំនួន២៨ខ្នង ដោយសារបាក់ច្រាំងទន្លេ។ លោក បានបញ្ជាក់ថា ចំនួនប្រជាពលរដ្ឋ ៧៧៦៦៧គ្រួសារ ដែលកំពុងរងការប៉ះពាល់ពីទឹកជំនន់ទន្លេមេគង្គនេះ មាន៧០៣៥គ្រួសារ ហើយសត្វពាហនៈសរុប៣៦១១៨ក្បាល ត្រូវបានជម្លៀសទៅទីទួលសុវត្ថិភាព។

លោក កែវ វី បានឲ្យដឹងទៀតថា ចំពោះទឹកទន្លេមេគង្គក្នុងរយៈពេល៣ថ្ងៃចុងក្រោយនេះ មានការស្រក់ចុះជាបណ្តើរហើយ ប៉ុន្តែ យ៉ាងនេះក្តី ក៏ប្រជាពលរដ្ឋ ដែលនៅទីទួលសុវត្ថិភាព នៅតែមិនទាន់អាចមកកាន់លំនៅដ្ឋានរបស់ខ្លួនវិញបាន ដោយសារទឹកដែលជន់លិចនៅតាមភូមិនីមួយៗ មិនទាន់ស្រក់នៅឡើយ៕