ជាតិ
រដ្ឋ នឹងដាក់មន្ត្រី៥ម៉ឺននាក់ និងចំណាយ១០លានដុល្លារ ក្នុងការធ្វើជំរឿនឆ្នាំ២០១៩ សម្ដេច ស ខេង រដ្ឋមន្ត្រីក្រសួងមហាផ្ទៃ។ រូបពីក្រសួងមហាផ្ទៃ
× ភ្នំពេញ៖ ជំរឿនប្រជាជនកម្ពុជាទូទៅប្រទេស នឹងចាប់ផ្តើមធ្វើ នៅថ្ងៃទី៣ ខែមីនា ឆ្នាំ២០១៩ ដោយប្រើមន្ត្រីរដ្ឋប្រមាណ ៥ម៉ឺននាក់ និងត្រូវចំណាយថវិកាជាតិជិត ១០លានដុល្លារ ហើយត្រូវប្រើពេលជិតមួយឆ្នាំ។ នេះបើតាមការផ្សាយរបស់គេហទំព័រអគ្គស្នងការដ្ឋាននគរបាលជាតិ នៅថ្ងៃទី១៤ ខែសីហា។
ការធ្វើជំរឿនប្រជាជនកម្ពុជា នៅឆ្នាំ២០១៩ មានការកែរលម្អតារាងសំណួរ ដែលធ្វើឲ្យមានលក្ខណ:ទាន់សម័យ ស្របតាមតម្រូវការសូចនាករ និងគោលដៅអភិវឌ្ឍប្រកបដោយចីរភាព នៃរបៀបវារ:ឆ្នាំ២០១៦-២០៣០។ នេះជាការលើកឡើងរបស់សម្ដេច ស ខេង ឧបនាយករដ្ឋមន្ដ្រី និងជារដ្ឋមន្ត្រីក្រសួងមហាផ្ទៃ ដែលថ្លែងនៅក្នុងកិច្ចប្រជុំលើកទី២ នៃគណៈកម្មាធិការជាតិជំរឿនទូទៅប្រជាជនកម្ពុជា នៅឆ្នាំ២០១៩ នាថ្ងៃទី១៤ ខែសីហា នៅទីស្តីការក្រសួងមហាផ្ទៃ។
សម្ដេច ស ខេង បានបន្តថា ជំរឿនទូទៅប្រជាជននៅកម្ពុជា ឆ្នាំ២០១៩ គឺប្រើប្រាស់ថវិកាជាតិស្ទើរតែទាំងស្រុង ដោយគ្មានដៃគូអភិវឌ្ឍន៍ណាមួយជួយគាំទ្រឡើយ លើកលែងតែអង្គការ UNFPA ដែលបានជួយខាងបច្ចេកទេស និងក្នុងកម្រិតមួយនៃលទ្ធភាពរបស់គេ។
នៅក្នុងឆ្នាំ២០១៩ខាងមុខនេះ ប្រជាជនកម្ពុជាអាចនឹងកើនដល់ក្នុងរង្វង់១៦លាននាក់ ខណៈប្រជាជនកម្ពុជាមានកំណើនក្នុងមួយឆ្នាំពីរង្វង់១,៦ភាគរយ។ ហើយក្រុមការងារបច្ចេកទេសវិទ្យាស្ថានជាតិស្ថិតិក្រសួងផែនការ បានអនុវត្តការងារជំរឿនប្រជាជន បានដោយរលូនទៅតាមផែនការសកម្មភាព ដែលបានគ្រោងទុក។ នេះជាការថ្លែងរបស់លោក ឆាយ ថន រដ្ឋមន្ត្រីក្រសួងផែនការ និងជាអនុប្រធានគណៈកម្មាធិការជាតិជំរឿនទូទៅប្រជាជននៅកម្ពុជា នៅក្នុងកិច្ចប្រជុំខាងលើ។
គូសបញ្ជក់ថា ការធ្វើជំរឿនប្រជាជនកម្ពុជា បានធ្វើឡើង៣ដងរួចមកហើយ គឺនៅឆ្នាំ១៩៦២ ឆ្នាំ១៩៩៨ និងឆ្នាំ២០០៨។ ការជំរឿនទាំង៣លើកនេះ មានការជួយជ្រោមជ្រែងពីអង្គការដៃគូ ដូចជាអង្គការ UNFPA អង្គការ JICA រដ្ឋាភិបាលជប៉ុន និងរប្រទេសអាល្លឺម៉ង់ ជាដើម៕
Tag:
ជំរឿន
ស ខេង
ឆាយ ថន
© រក្សាសិទ្ធិដោយ thmeythmey.com