ជាតិ
នយោបាយជាតិ
សម្ដេច ហ៊ុន សែន លើកពីការបង្កើតវេទិកាពិភាក្សាជាមួយគណបក្សមិនជាប់ឆ្នោត
× ភ្នំពេញ៖ ពីពិធីជួបសំណេះសំណាលជាមួយកម្មកររោងចក្រ នៅសង្កាត់ឃ្មួញ ខណ្ឌសែនសុខ រាជធានីភ្នំពេញ នៅព្រឹកថ្ងៃពុធនេះ សម្ដេចនាយករដ្ឋមន្ត្រី ហ៊ុន សែន គ្រោងនឹងបង្កើតវេទិកាពិគ្រោះយោបល់ជាមួយគណបក្សនយោបាយដទៃ ដែលចូលរួមប្រកួតប្រជែងការបោះឆ្នោត ដើម្បីដោះស្រាយបញ្ហានយោបាយនានា ជាមួយរដ្ឋាភិបាល។
សម្ដេច ហ៊ុន សែន បានបញ្ជាក់ពីបំណងបង្កើតវេទិកាពិភាក្សានេះ ដើម្បីឲ្យបណ្ដាភាគីគណបក្សនយោបាយ ដែលមិនជាប់ឆ្នោតទាំងនោះ ចែករំលែកគំនិតល្អៗរបស់ពួកគេ ក្នុងការដោះស្រាយបញ្ហាពលរដ្ឋ និងប្រទេសជាតិ។ បើតាមប្រមុខរដ្ឋាភិបាល ការរៀបចំវេទិកានេះ វាជាឱកាសឲ្យគណបក្សនយោបាយ ដែលមិនជាប់ឆ្នោតនេះ កសាងកិត្តិយសខ្លួន សម្រាប់ការបោះឆ្នោតនៅអាណត្តិខាងមុខទៀតផងដែរ។
សូមស្ដាប់ប្រសាសន៍ប្រមុខរដ្ឋាភិបាល៖
វេទិកាពិភាក្សាគ្នានេះ រដ្ឋាភិបាល នឹងបើកចំហឲ្យគណបក្សនយោបាយ ដែលមិនជាប់ឆ្នោតទាំងនោះ មានសិទ្ធិរិះគន់លើគោលនយោបាយរបស់រដ្ឋាភិបាល ដែលអនុវត្តការងារមិនល្អ និងជួយដោះស្រាយចំណុចខ្វះខាតនានា តាមរយៈការពិនិត្យលើយន្តការក្នុងសេចក្តីព្រាងច្បាប់ជាដើម។ ការរៀបចំបែបនេះ វានឹងជួយរំឭកដល់ការងាររដ្ឋាភិបាល ឲ្យអនុវត្តការងារត្រឹមត្រូវតាមការសន្យាខ្លួន ពោលគឺកុំឲ្យរដ្ឋាភិបាល ជិះសេះលែងដៃ ហើយទុកពលរដ្ឋរងទុក្ខលំបាក។ នេះបើតាមសម្ដេច ហ៊ុន សែន៕
© រក្សាសិទ្ធិដោយ thmeythmey.com