ជាតិ
សង្គមជាតិ
៦ខែ សមត្ថកិច្ច ឃាត់មនុស្សជាង ១ម៉ឺននាក់ ពាក់ព័ន្ធនឹងគ្រឿងញៀន
× ភ្នំពេញ៖ រយៈពេល៦ខែ ក្នុងឆ្នាំ២០១៨ អាជ្ញាធរគ្រឿងញៀន បានសហការជាមួយសមត្ថកិច្ចគ្រប់ផ្នែកទាំងអស់ ចុះបង្ក្រាប់អ្នកជូញដូរ និងប្រើប្រាស់គ្រឿងញៀនជិត ៤ពាន់ករណី ហើយឃាត់មនុស្សជាង ១ម៉ឺននាក់ និងរឹបអូសសារធាតុញៀនជាង ១រយគីឡូក្រាម។ នេះបើតាមការឱ្យដឹងពីនាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀននៃក្រសួងមហាផ្ទៃ ដែលគេហទំព័រអគ្គស្នងការនគរបាលជាតិ បានចុះផ្សាយ នៅថ្ងៃទី១៤ ខែសីហា។
នគរបាលជាតិ បានស្រង់សម្ដីរបស់លោក មាស វិរិទ្ធ ទៅចុះផ្សាយថា អាជ្ញាធរបានចាប់ខ្លួនអ្នកជួញដូរគ្រឿងញៀនជាង៧៥០០នាក់ ដោយក្នុងនោះ បានបញ្ជូនទៅកាន់តុលាការកាត់ទោសជាង ៤៤០០នាក់រួចហើយ ហើយបានឃាត់ខ្លួនអ្នកប្រើប្រាស់ជាង ៣ពាន់នាក់ ដោយត្រូវបញ្ចូនទៅកាន់មណ្ឌលកែប្រែ។ លោក មាស វិរិទ្ធ បានបន្ថែមថា តួលេខទាំងអ្នកជូញដូរនិងអ្នកប្រើប្រាស់ត្រូវបានថយចុះជាងឆ្នាំ២០១៧ ប៉ុន្តែសារធាតុញៀន បានកើនឡើងដោយសារតែអាជ្ញាធរបង្ក្រាបបានភាគច្រើនជាទ្រង់ទ្រាយធំ។
បើតាមការចុះផ្សាយរបស់នគរបាលជាតិដដែល អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀននៃក្រសួងមហាផ្ទៃរូបនេះ បានអំពាវនាវដល់ប្រជាពលរដ្ឋទូទៅ សហការជាមួយអាជ្ញាធរគ្រប់លំដាប់ថ្នាក់ដើម្បីលុបបំបាត់នូវគ្រឿងញៀននៅកម្ពុជា។ លោក ថា អាជ្ញាធរ ធ្វើការតែឯងគឺមិនអាចទៅរួចនោះឡើយ លុះត្រាតែមានការសហការជាមួយប្រជាពលរដ្ឋផងដែរ៕
Tag:
គ្រឿងញៀន
មាស វិរិទ្ធ
© រក្សាសិទ្ធិដោយ thmeythmey.com