ជើងខ្លាំងប្រចាំភូមិភាគទាំង៥ ប្រជែងគ្នាដណ្តើមជើងឯកថ្នាក់ជាតិកីឡាទាញព្រ័ត្រនៅកោះពេជ្រ

កីឡាជាតិ

ជាតិ

ជើងខ្លាំងប្រចាំភូមិភាគទាំង៥ ប្រជែងគ្នាដណ្តើមជើងឯកថ្នាក់ជាតិកីឡាទាញព្រ័ត្រនៅកោះពេជ្រ

15, Aug 2018 , 2:57 pm

រូបភាព

ដោយ:

ប្រធានសហព័ន្ធកីឡាទាញព្រ័ត្រកម្ពុជា ប្រាប់កីឡាករកីឡាការិនី និងអាជ្ញាកណ្តាលចៅក្រម ឲ្យប្រកួតអស់ពីសមត្ថភាព និងកាត់ក្តីឲ្យបានត្រឹមត្រូវ ដោយឈរលើគោលការណ៍សមធម៌។ ការក្រើនរំលឹកបែបនេះ ធ្វើឡើងក្នុងពិធីបើកការប្រកួតកីឡាទាញព្រ័ត្រជ្រើសរើសជើងឯកថ្នាក់ជាតិលើកទី២ កាលពីព្រឹកថ្ងៃទី១៥ ខែសីហា ឆ្នាំ២០១៨។

លោក មាស សារិន ប្រធានសហព័ន្ធកីឡាទាញព្រ័ត្រកម្ពុជា ក្រើនរំលឹកឲ្យកីឡាករកីឡាការិនី ដែលចូលប្រកួតប្រជែងដណ្តើមជើងថ្នាក់ជាតិឆ្នាំនេះ ត្រូវប្រកួតឲ្យអស់ពីសមត្ថភាព ដោយឈរលើភាពយុត្តិធម៌ សាមគ្គីភាព គោរពវិន័យ និងគោរពបទបញ្ជានៃការប្រកួត។ លើសពីនេះ លោកប្រាប់ឲ្យអាជ្ញាកណ្តាល ចៅក្រម ដែលចូលរួមកាត់ក្តី ត្រូវឈរលើភាពសុក្រឹត និងយុត្តិធម៌។

ការជំរុញបែបនេះ គឺដើម្បីផ្តល់ភាពយុត្តិធម៌ដល់កីឡាករកីឡាការិនី ដែលព្យាយាមហ្វឹកហាត់ពិតប្រាកដផង និងធ្វើឲ្យការប្រកួតកាន់តែស្វិតស្វាញ និងទាក់ទាញជាងមុន។ ព្រោះការប្រកួតនេះ ជាផែនការយុទ្ធសាស្ត្រក្នុងការចម្រាញ់រកជើងខ្លាំង ដើម្បីត្រៀមចូលរួមប្រកួតប្រជែងក្នុងព្រឹត្តិការណ៍កីឡាស៊ីហ្គេមនាឆ្នាំ២០២៣នៅកម្ពុជា។

បើយោងតាមអ្នកស្រី ប្រាក់ សម្ផស្ស អគ្គលេខាធិការសហព័ន្ធ ការប្រកួតជើងឯកថ្នាក់ជាតិឆ្នាំនេះ មានអត្តពលិកចំនួន២០០នាក់មកពី១២ក្លិប-សមាគមចូលរួម ដែលចំនួននេះមានការថយចុះបើធៀបនឹងលើកទី១។ ប៉ុន្តែការប្រកួតឆ្នាំនេះ មានលក្ខណៈខុសប្លែកពីឆ្នាំមុន ដោយក្រុមចូលរួមឆ្នាំនេះសុទ្ធសឹងជាជើងខ្លាំងប្រចាំភូមិភាគទាំង៥ ខណៈលើកមុនបើកសេរីសម្រាប់ក្រុមចូលរួម។

ភូមិភាគទាំង៥រួមមាន ភូមិភាគវាលរាប ភូមិភាគឦសាន ភូមិភាគនិរតី ភូមិភាគបឹងទន្លសាប និងភូមិភាគរាជធានីភ្នំពេញ។ ការប្រកួតជើងឯកថ្នាក់ជាតិឆ្នាំនេះ ប្រព្រឹត្តទៅចន្លោះពីថ្ងៃទី១៤-១៦ ខែសីហា ឆ្នាំ២០១៨ នៅក្នុងបរិវេណសាលមហោស្រពកោះពេជ្រ៕