១ថ្ងៃទៀតប៉ុណ្ណោះ លោក គឹម សុខ អនុវត្តទោសគ្រប់តាមកាលកំណត់ហើយ

ជាតិ

នយោបាយជាតិ

១ថ្ងៃទៀតប៉ុណ្ណោះ លោក គឹម សុខ អនុវត្តទោសគ្រប់តាមកាលកំណត់ហើយ

16, Aug 2018 , 8:59 am

រូបភាព

ដោយ:

ភ្នំពេញ៖ ថ្ងៃទី១៧ ខែសីហា ឆ្នាំ២០១៨ នេះ នឹងគ្រប់រយៈពេលមួឆ្នាំកន្លះ ដែលលោក គឹម សុខ អ្នកវិភាគនយោបាយ បានជាប់ពន្ធនាគារ តាមការសម្រេចរបស់តុលាការរាជធានីភ្នំពេញ។ នេះបើតាមលោក ជួង ជូងី មេធាវីការពារក្ដីឲ្យលោកគឹម សុខ។

បើមិនមានអ្វីប្រែប្រួលទេ លោក គឹម សុខ អ្នកវិភាគនយោបាយ នឹងមានសេរីភាពឡើងវិញនៅថ្ងៃទី១៧ ខែសីហា ខាងមុខ ព្រោះលោកបានអនុវត្តទោសរួចរាល់ហើយ។ នេះជាការលើកឡើងរបស់លោក ជួង ជូងី មេធាវីការពារក្ដីឲ្យលោក គឹម សុខ។ ប៉ុន្តែលោកមេធាវីរូបនេះ បន្ថែមថា ក្រោយពីបញ្ចប់ក្ដី ដែលត្រូវឃុំខ្លួនរយៈពេលមួយឆ្នាំកន្លះនេះហើយ លោក គឹម សុខ នៅជាប់បណ្ដឹងមួយផ្សេងទៀតពីលោក គី តិច មេធាវីតំណាងរដ្ឋាភិបាល។

បណ្ដឹងក្រោយនេះ អាចធ្វើឲ្យតុលាការ មានហេតុផល ដើម្បីឃុំលោក គឹម សុខ បន្តទៀត ពីព្រោះថា លោក អនុវត្តទោសលើបណ្តឹងទី១ប៉ុណ្ណោះ ចំណែកបណ្តឹងទី២ កំពុងស្ថិតក្នុងចំណាត់ការរបស់តុលការនៅឡើយ ដោយមិនទាន់ជំនុំជម្រះនោះទេ។ យ៉ាងណាក៏ដោយ ដោះលែង ឬមិនដោះលែង គឺជាឆន្ទានុសិទ្ធិរបស់ចៅក្រម។

សម្រាប់បណ្តឹងទី១ ដែលមានលោកមេធាវី គី តិច ជាអ្នកប្តឹង លោក គឹម សុខ ត្រូវបានតុលាការចោទពីបទ «ញុះញង់ឲ្យប្រព្រឹត្តបទល្មើសជាអាទិ៍ និងបទបរិហារកេរ្តិ៍» ដោយសារតែអ្នកវិភាគរូបនេះ ចោទសម្តេច ហ៊ុន សែន ប្រធានគណបក្សប្រជាជនកម្ពុជាថា នៅពីក្រោយនៃអំពើឃាតកម្មលើលោកបណ្ឌិត កែម ឡី។ បណ្តឹងទី១នេះ ធ្វើឲ្យលោក គឹម សុខ ជាប់ពន្ធនាគាររយៈពេល១ឆ្នាំកន្លះ ហើយរងការពិន័យជាប្រាក់ចំនួន ៨លានរៀលចូលទៅរដ្ឋ និងសងជំងឺចិត្តដល់សម្ដេច ហ៊ុន សែន ចំនួន៨០០លានរៀល។

ចំណែកបណ្តឹងទី២របស់លោកមេធាវី គី តិច ដដែល គឺជាប់ពាក់ព័ន្ធនឹងការលើកឡើងរបស់លោក គឹម សុខ ដែលថា រដ្ឋាភិបាលបានបង្កើតប្រព័ន្ធមួយសម្លាប់មនុស្ស ហើយរកឃាតកមិនឃើញ។ បណ្ដឹងនេះ ត្រូវបានលោកមេធាវីតំណាងរដ្ឋាភិបាល ដាក់ទៅតុលាការ កាលពីថ្ងៃទី១៦ ខែកុម្ភៈ ឆ្នាំ២០១៧៕