ក្រោយបានលឺសម្តីមន្ត្រីជាន់ខ្ពស់អាមេរិកព្រមានហ្វីលីពីនរឿងចង់ទិញនាវាមុជទឹកពីរុស្ស៊ី ប្រធានាធិបតីហ្វីលីពីនមាត់ដាច រ៉ូឌ្រីហ្គោ ឌូទើតេ បានចេញមុខប្រតិកម្មតបវិញភ្លាម។ លោកបានទិតៀនអាមេរិកត្រង់ៗ ដែលចេះតែលូកដៃក្នុងកិច្ចការផ្ទៃក្នុងហ្វីលីពីន មិនស័ក្តិសមជាសម្ព័ន្ធមិត្តស្មើមុខស្មើមាត់សោះ។
ពីទីក្រុង Davao ថ្ងៃទី ១៧ ខែសីហា លោក ឌូទើតេបានចោទសួរជាសំណួរទៅកាន់អាមេរិកថា តើអាមេរិកំពុងចាត់ទុកខ្លួនជាអ្វីដែលហ៊ានបង្គាប់បញ្ជា និងព្រមានជាហូរហែរពេលហ្វីលីពីនចង់ទិញសព្វាវុធពីប្រទេសដទៃ។ លោក ឌូទើតេ យល់ថា ឋានៈជាសម្ព័ន្ធមិត្តគេមិនធ្វើដូចអាមេរិកំពុងធ្វើឡើយ។
យោងតាមទីភ្នាក់ងារព័ត៌មាន AFP លោក ឌូទើតេ បានថ្លែងដូច្នេះថា៖«តើនេះឬជាអ្វីដែលអ្នកឯងធ្វើដាក់សម្ព័ន្ធមិត្ត? ហើយអ្នកឯងចង់ឲ្យយើងនៅជាមួយអ្នកឯងគ្រប់ពេលឬយ៉ាងណា? អ្នកឯងជាអ្នកណាបានជាមកព្រមានយើងបែបនេះ?»
ប្រមុខរដ្ឋហ្វីលីពីនវ័យ៧៣ឆ្នាំនេះនិយាយទាំងក្រេវក្រោធដោយសារមន្ត្រីជាន់ខ្ពស់អាមេរិកមួយរូបបានព្រមានហ្វីលីពីនដែលមានចេតនាចង់ទិញនាវាមុជទឹកពីរុស្ស៊ីដើម្បីពង្រឹងសមត្ថភាពការពារជាតិរបស់ខ្លួននោះ។ មន្ត្រីជាន់ខ្ពស់របស់អាមេរិកនោះគឺ ឧបការីរដ្ឋមន្ត្រីការពារជាតិទទួលបន្ទុកកិច្ចការសន្តិសុខអាស៊ី និងប៉ាស៊ីហ្វិកលោក Randall Schriver។
ពេលជួបអ្នកសារព័ត៌មានថ្ងៃ ១៦ ខែសីហានៅក្រុងម៉ានីល មន្ត្រីជាន់ខ្ពស់ខាងលើព្រមានជាមុនថា ហ្វីលីពីនត្រូវគិតគូរដោយប្រុងប្រយ័ត្នចំពោះបញ្ហាទិញសព្វាវុធនេះព្រោះវាប៉ះពាល់សម្ព័ន្ធភាពរវាងអាមេរិក និងហ្វីលីពីនដែលមានយូរអង្វែងមកនោះ។
ត្រឡប់មកវិញក្រៅពីរិះគន់អាមេរិក លោក ឌូទើតេ បានបន្ថែមទៀតថា ឥរិយាបថរបស់អាមេរិកដែលប្រឆាំងនឹងបំណងហ្វីលីពីននេះ ក្នុងការទិញនាវាមុជទឹកនេះ បង្ហាញឲ្យឃើញថា អាមេរិកមិនចង់ឃើញហ្វីលីពីនមានសមត្ថភាពការពារជាតិខ្លាំងឡើយ។ មេដឹកនាំហ្វីលីពីននេះសង្កត់ធ្ងន់ថា ក្នុងស្ថានភាពណាក៏ដោយ ហ្វីលីពីនត្រូវមាននាវាមុជទឹក បើសិនជាខ្លួនចង់ដើរឲ្យទាន់បណ្តាប្រទេសជិតខាងក្នុងការអភិវឌ្ឍវិស័យការពារជាតិនេះ។
តាមពិតទៅ កន្លងមកនេះ រដ្ឋមន្ត្រីការពារជាតិហ្វីលីពីនលោក Delfin Lorenzana បានបង្ហើបប្រាប់អ្នកសារព័ត៌មានថា ហ្វីលីពីនកំពុងស្វែងរកទិញនាវាមុជទឹកដើម្បីពង្រឹងសមត្ថភាពកងទ័ពជើងទឹក ហើយរុស្ស៊ី កូរ៉េខាងត្បូងនិងបារាំងជាដើមនោះជាទីផ្សារអាវុធដែលហ្វីលីពីនសំឡឹងឃើញ។
ប៉ុន្តែប្រមុខការពារជាតិហ្វីលីពីនរូបនេះបានព្រលយថា ហ្វីលីពីនទំនងជាជ្រើសរើសយករុស្ស៊ី ហើយកិច្ចព្រមព្រៀងទិញនាវាមុជទឹកនោះនឹងអាចចុះរួមគ្នាខាងមុខផង។ បើសិនជាកិច្ចព្រមព្រៀងត្រូវចុះហត្ថលេខាមែននោះ រុស្ស៊ីនឹងអាចផ្គត់ផ្គង់នាវាមុជទឹកបួនគ្រឿង(Kilo class) ដល់ហ្វីលីពីនផង។ ដំណឹងនេះហើយដែលធ្វើឲ្យមន្ត្រីអាមេរិកប្រតិកម្ម និងព្រមានហ្វីលីពីនកន្លងមក៕