កីឡាជាតិ
ជាតិ
អត្តពលិកទោចក្រយាននឹងប្រមូលផ្តុំហ្វឹកហាត់ពេញ១ឆ្នាំ ក្រោយបានថវិកាជាង២ម៉ឺនដុល្លារក្នុង១ឆ្នាំ
× កីឡាករកីឡាការិនីប្រណាំងកង់ជម្រើសជាតិ នឹងទទួលបានការប្រមូលផ្តុំហ្វឹកហាត់១ឆ្នាំពេញ ពីសហព័ន្ធកីឡាទោចក្រយានកម្ពុជា ក្រោយសហព័ន្ធទទួលបានការឧបត្ថម្ភពីដៃគូសហការចំនួន២៥,០០០ដុល្លារក្នុង១ឆ្នាំ។ តាមរយៈគម្រោងនេះ ថ្នាក់ដឹកនាំសហព័ន្ធរំពឹងថា នឹងជួយអភិវឌ្ឍន៍វិស័យកីឡាទោចក្រយានកាន់តែរីកចម្រើន និងបង្កើនការទាក់ទាញកាន់តែខ្លាំង។ ព្រោះថវិកាទាំងនេះ នឹងចំណាយលើការបណ្តុះបណ្តាលបច្ចេកទេស បន្ថែមការហ្វឹកហាត់របស់ក្រុមជម្រើសជាតិ និងការលើកទឹកចិត្តជាដើម។
លោកឧកញ៉ា វង្ស ខាន់ពៅ អគ្គលេខាធិការសហព័ន្ធកីឡាទោចក្រយានកម្ពុជាបានបញ្ចាក់ថា កីឡាករកីឡាការិនីទោចក្រយានជម្រើសជាតិ នឹងទទួលបានការប្រមូលផ្តុំហ្វឹកហាត់មួយឆ្នាំពេញពីសហព័ន្ធ ដែលគម្រោងនេះអាចនឹងអនុវត្តនៅឆ្នាំ២០១៨នេះតែម្តង។ តាមធម្មតាក្រសួងអប់រំយុវជននិងកីឡា ផ្តល់គោលការណ៍ក្នុងការប្រមូលផ្តុំក្រុមជម្រើសជាតិតែ៦ខែប៉ុណ្ណោះ។ ការផ្តល់៦ខែបន្ថែមនេះ ក្រោយសហព័ន្ធកីឡាទោចក្រយានទទួលបានការឧបត្ថម្ភពី ខ្មែរប៊ែវីរីជីស ចំនួន២៥,០០០ដុល្លារក្នុងមួយឆ្នាំ។
«ខ្ញុំគិតថា វារឿងមួយដ៏ល្អ ព្រោះក្រោយបញ្ចប់ការប្រមូលផ្តុំជាមួយក្រសួង ក្មេងៗនៅតែនៅជាប់ជាមួយសហព័ន្ធ ធ្វើឲ្យយើង និងគ្រូបង្វឹកគ្រប់គ្រងពួកគាត់បានល្អ និងហ្វឹកហាត់ពង្រឹងសមត្ថភាពជាមួយសហព័ន្ធពេញមួយឆ្នាំតែម្តង។ រាល់លើកក្រោយចប់ការប្រមូលផ្តុំម្តងៗ មានកីឡាករកីឡាការិនីមួយចំនួនបានទៅប្រកបកិច្ចការងារផ្សេងៗ ដើម្បីរកកម្រៃមកដោះស្រាយជីវភាព»។ នេះជាការលើកឡើងរបស់លោកឧកញ៉ា វង្ស ខាន់ពៅ ហើយបានបន្ថែមថា ក្រៅផ្តល់លើការហ្វឹកហាត់ក្នុងក្រុមជម្រើសជាតិ ថវិកាដែលបានពីការឧបត្ថម្ភរបស់ខ្មែរប៊ែវីរីជីសនេះ នឹងចំណាយលើការបណ្តុះបណ្តាល បើកវគ្គបច្ចេកទេសផ្សេងៗ និងផ្តល់ជាថវិកាលើកទឹកចិត្តសម្រាប់កីឡាជ័យលាភីជាដើម។
លោកឧកញ៉ា វង្ស ខាន់ពៅ អគ្គលេខាធិការសហព័ន្ធកីឡាទោចក្រយានកម្ពុជាផ្តល់បទសម្ភាសដល់អ្នកសារព័ត៌មាននៅ NOCC
អគ្គលេខាធិការសហព័ន្ធកីឡាទោចក្រយានខាងលើ ប្តេជ្ញាថា នឹងខិតខំប្រឹងប្រែងឲ្យអស់ពីសមត្ថភាពក្នុងការអភិវឌ្ឍវិស័យកីឡាទោចក្រយានកម្ពុជាឲ្យកាន់តែប្រសើរថែមទៀត។ លើសពីនេះ លោកនឹងព្យាយាមពង្រឹងសមត្ថភាពកីឡាករឲ្យកាន់តែខ្លាំង ដើម្បីត្រៀមប្រជែងដណ្តើមមេដាយក្នុងព្រឹត្តិការណ៍ស៊ីហ្គេមឆ្នាំ២០១៩ នៅប្រទេសវៀតណាម និងស៊ីហ្គេមលើកទី៣២នៅកម្ពុជា។
ទោះបីមិនបានបញ្ជាក់ពេលវេលាជាក់លាក់ក្នុងការជួយគាំទ្រកីឡាទោចក្រយានក៏ដោយ តែលោក ពេជ្រ សុវណ្ណ តំណាងក្រុមហ៊ុនសហការ បានអះអាងថា នឹងបន្តជួយគាំទ្រវិស័យកីឡានេះ ក៏ដូចជាវិស័យកីឡាផ្សេងទៀត។ តែយ៉ាងណា លោករង់ចាំមើលលទ្ធផលនៃការជួយគាំទ្រជាមុនសិន៕
Tag:
ប្រណាំងកង់
វង្ស ខាន់ពៅ
ពេជ្រ សុវណ្ណ
© រក្សាសិទ្ធិដោយ thmeythmey.com