កីឡាជាតិ
ជាតិ
Asian Games៖ លោក ថោង ខុន ក្រើនរំលឹកកីឡាករឲ្យចៀសវាងធ្វើអ្វី ដែលប៉ះពាល់ដល់កិត្តិយស
× លោក ថោង ខុន បានក្រើនរំលឹកកីឡាករឲ្យចៀសវាងប្រើល្បិច ឬធ្វើអ្វី ដែលនាំឲ្យប៉ះពាល់កិត្តិយសប្រទេសជាតិ។ ប្រធានគណៈកម្មាធិការជាតិអូឡាំពិកកម្ពុជារូបនេះ ផ្តាំឲ្យកីឡាករត្រូវចេះថែរក្សាសុខភាព ខិតខំហ្វឹកហាត់ និងត្រៀមស្មារតីឲ្យបានល្អ ពិសេសត្រូវមានភាពរួសរាយរាក់ទាក់ និងទំនាក់ទំនងល្អជាមួយកីឡាករមកពីប្រទេសដទៃ។
«ត្រូវចេះរក្សាកិត្តិយសជាតិ កុំរំលោភវិធានការប្រកួត កុំប្រើល្បិច និងកុំប្រើប្រាស់សារធាតុលើកកម្លាំង»។ ជាការផ្តាំផ្ញើពីសម្តេចនាយករដ្ឋមន្ត្រី ហ៊ុន សែន ដែលត្រូវបានលោក ថោង ខុន រដ្ឋមន្ត្រីក្រសួងទេសចរណ៍ និងជាប្រធាន NOCC លើកយកមកក្រើនរំលឹកដល់មន្ត្រី គ្រូបង្វឹក និងកីឡាករ ដែលចូលរួមប្រកួតក្នុងព្រឹត្តិការណ៍ Asian Games 2018 នៅប្រទេសឥណ្ឌូណេស៊ី។
ការក្រើនរំលឹករបស់ប្រធានប្រតិភូដឹកនាំរូបនេះ ធ្វើឡើងក្នុងពិធីជួបសំណេះសំណាលជាមួយមន្ត្រី គ្រូបង្វឹក និងកីឡាករមុនការប្រកួតមកដល់កាលពីថ្ងៃទី១៨ ខែសីហា ឆ្នាំ២០១៨ នៅទីក្រុងហ្សាការតាប្រទេសឥណ្ឌូណេស៊ី ដោយមានការចូលរួមពីសំណាក់លោក ហោ ណាំបូរ៉ា ឯកអគ្គរាជទូតកម្ពុជាប្រចាំឥណ្ឌូណេស៊ី។
ជាមួយគ្នានោះដែរ លោក ថោង ខុន ផ្តាំដល់កីឡាករត្រូវចេះថែរក្សាសុខភាព ខិតខំហ្វឹកហាត់ពង្រឹងសមត្ថភាពបន្ថែម និងត្រៀមស្មារតីប្រកួតឲ្យបានល្អ ដើម្បីនាំជ័យជម្នះជូនប្រទេសជាតិ។ លើសពីនេះ ត្រូវចេះស្រលាញ់គ្នា មានភាពរួសរាយរាក់ទាក់ ទន់ភ្លន់ និងមានទំនាក់ទំនងល្អជាមួយមន្ត្រី គ្រូបង្វឹក និងកីឡាករមកពីតាមបណ្តាប្រទេសផ្សេងៗក្នុងតំបន់អាស៊ី។
ព្រឹត្តិការណ៍ Asian Games 2018 បានបើកការប្រកួតផ្លូវការកាលពីយប់ថ្ងៃទី១៨ ខែសីហា ឆ្នាំ២០១៨ នៅទីក្រុងហ្សាការតា។ ដោយថ្ងៃបើកឆាកនេះ កម្ពុជាត្រូវប្រកួតលើ៤ប្រភេទកីឡារួមមានចំបាប់ ហែលទឹក គុនដាវ និងតេក្វាន់ដូ។ អត្តពលិកដែលត្រូវប្រកួតរួមមានកីឡាករចំបាប់ ហេង វុទ្ធី និងកីឡាករ ជន់ ធួន, កីឡាការិនីហែលទឹក សុខ វរលក្ខណ៍, កីឡាការិនីតេក្វាន់ដូ ស៊ីម រចន និងកីឡាករ ផល សុវណ្ណាត់, កីឡាការិនីគុនដាវ ឆាយ លីនលី និងកីឡាករ វ៉ាហ្គអូរមិនស្គី ហ្វ្រេនធិសិដ្ឋប៉ូល៕
Tag:
Asian Games 2018
លោក ថោង ខុន
© រក្សាសិទ្ធិដោយ thmeythmey.com