ជាតិ
សេដ្ឋកិច្ច
×![]()
ភ្នំពេញ៖ វិស័យសំណង់ និងអចលនទ្រព្យ បានក្លាយជាប៉ូលមួយនៃការអភិវឌ្ឍសេដ្ឋកិច្ចរបស់កម្ពុជា ហើយឧស្សាហកម្មមួយនេះ បានរីកលូតលាស់ជាបន្តបន្ទាប់។ ក្នុងរយៈពេលប៉ុន្មានឆ្នាំចុងក្រោយនេះ អគារខ្ពស់ៗខុនដូ អាផាតមេន បានលេចឡើងយ៉ាងច្រើន ពិសេសចាប់ពីឆ្នាំ២០១៤ មក។ 
នៅភ្នំពេញ ខុនដូ និងអាផាតមេន ប្រមាណ ៣៤៨៨ យូនីត បានចាក់បញ្ចូលក្នុងទីផ្សាលំនៅឋានក្នុងឆ្នាំ២០១៧។ ហើយអចលនទ្រព្យប្រភេទនេះចំនួនជាង ១៥០០០ យូនីតទៀត ត្រូវបានព្យាករថានឹងរួចរាល់សម្រាប់ទីផ្សារនៅឆ្នាំ២០១៨នេះ។ នេះបើតាមតួលេខពីអត្ថបទស្រាវជ្រាវមួយរបស់ Eastasiaforum ។
នៅឆ្នាំ២០១៦ក្រសួងរៀបចំដែនដី នគរូបនីយកម្ម និងសំណង់ បានអនុម័តគម្រោងសាងសង់ ២៦៣៦គម្រោង មានទឹកប្រាក់ ៨,៥ពាន់លានដុល្លារ កើនឡើង ១៥៥ភាគរយ ធៀបនឹង៣,៣ពាន់លានដុល្លារនៅឆ្នាំ២០១៥។
អ្នកស្រី អាន ធីតា នាយិកាក្រុមហ៊ុន CBRE Cambodia ថ្លែងថា ទីផ្សារអចលនទ្រព្យកម្ពុជាបច្ចប្បន្ន មានរូបភាពចម្រុះ ដោយផ្នែកខ្លះផ្គត់ផ្គង់ខ្វះ ខណៈផ្នែកខ្លះទៀតប្រឈមនឹងហានិភ័យនៃការផ្គង់ផ្គង់លើសតម្រូវការ។ អ្នកស្រីបន្ថែមថា ទីផ្សារខុនដូនៅកម្ពុជាជាទីផ្សារថ្មី ដូចនេះបានធ្វើឲ្យមានអត្រាកំណើនខ្លាំងក្នុងពេលកន្លងមក និងក្នុងរយៈ៣៦ខែខាងមុខជាពិសេសនៅភ្នំពេញ និងខេត្តព្រះសីហនុ។
អ្នកស្រីថ្លែងដូច្នេះថា៖«ការសិក្សានាពេលថ្មីៗនេះបង្ហាញនិន្នាការនៃការផ្គង់ផ្គង់លើសតម្រូវការ ជាពិសេសអចលនទ្រព្យខុនដូកម្រិតគុណភាពខ្ពស់នៅទីតាំងមិនមែនកណ្ដាលក្រុង ដែលទំនងមិនសូវមានការជួល»។
អ្នកវិភាគសេដ្ឋកិច្ច លោក ង៉ែត ជូ មើលឃើញស្រដៀងគ្នានេះដែរ។ លោកប្រាប់ថា ការផ្គង់ផ្គង់អចលនទ្រព្យតម្លៃខ្ពស់ ហាក់លើសតម្រូវការ ខណៈអចលនទ្រព្យតម្លៃសមរម្យនៅខ្វះខាតច្រើន។
ការផ្គត់ផ្គង់អចលនទ្រព្យតម្លៃខ្ពស់លើសតម្រូវការ ហាក់មានន័យថា មានការសាងសង់ដែលមិនចាំបាច់។ មិនត្រឹមតែពុំចាំបាច់ តែផ្ទុយមកវិញការសាងសង់ទាំងនោះ បានញ៉ាំងឲ្យតម្លៃដីធ្លីសាងសង់លំនៅឋានសម្រាប់អ្នកចំណូលមធ្យម និងទាប ឡើងថ្លៃផងដែរ។
បើតាមរបាយការណ៍ពីក្រសួងរៀបចំដែនដី ប្រជាជនដែលរស់នៅក្នុងទីក្រុង និងទីប្រជុំជនធំៗ នឹងកើនជាងពាក់កណ្ដាលនៅឆ្នាំ២០៣០ ដែលនឹងដល់ចំនួន ៧,៩លាននាក់ ហើយមានតម្រូវការផ្ទះសម្បែងប្រមាណ ៨០ម៉ឺនផ្ទះ។
ការសិក្សាដែលចេញផ្សាយដោយ Eastasiaforum ក្នុងពេលថ្មីៗនេះ ហាក់មិនសាទរនឹងការអភិវឌ្ឍវិស័យអចលនទ្រព្យរបស់កម្ពុជា ដែលរុញដោយវិនិយោគិនចិនឡើយ។
Eastasiaforum បានផ្សាយថា គម្រោងសាងសង់នៅភ្នំពេញ ដែលត្រូវបានគាំទ្រដោយទុនវិនិយោគរបស់ចិន មានគោលដៅអតិថិជនជាក្រុមអ្នកមានៗ និងជនជាតិចិន។ ហេតុផលនេះបានធ្វើឲ្យតម្លៃលំនៅឋានកើនឡើងខ្លាំង ដែលពលរដ្ឋកម្ពុជាទូទៅ គ្មានលទ្ធភាពទិញ។ ការសិក្សានេះ លើកឡើងថា៖«ការវិនិយោគផ្នែកសំណង់ និងអចលនទ្រព្យរបស់ចិននៅភ្នំពេញ ទំនងជាមិនឆ្លើយតបនឹងតម្រូវការរបស់ប្រជាជនកម្ពុជាឡើយ»។
ការសិក្សាថែមទាំងបង្ហាញក្ដីបារម្ភពីការលាងលុយកខ្វក់ ដោយបង្ហាញហេតុផលថា ខុនដូ និងអាផាតមេនប្រណិត ច្រើនជាងពាក់កណ្ដាល ក្នុងក្រុងភ្នំពេញ ត្រូវបានទិញដោយជនជាតិចិន ដែលប្រើសាច់ប្រាក់សុទ្ធ។
ការស្រាវជ្រាវនេះ បានផ្ដល់អនុសាសន៍ថា៖«អាជ្ញាធរគួរដាក់ចេញ និងអនុវត្តដំណើរការគោលនយោបាយ ដែលអាចការពារភ្នំពេញ ពីកំណើនក្នុងវិស័យសំណង់ និងអចលនទ្រព្យ ដែលមិនមាននិរន្តរភាព»។
ជុំវិញការវិនិយោគរបស់ជនបរទេសនេះ លោក ង៉ែត ជូ បានថ្លែងថា កម្ពុជាគួរនៅតែចាប់យកការវិនិយោគ និងចំណែកទីផ្សារពីជនជាតិចិន ព្រោះចិនជាទីផ្សារធំ ប៉ុន្តែត្រូវធ្វើឲ្យមានភាពច្បាស់លាស់លើរឿងលាងលុយកខ្វក់ និងបញ្ហាសន្តិសុខសង្គម។ «ចិននៅតែជាចំណែកទីផ្សារធំ ប៉ុន្តែយើងត្រូវជម្រះឲ្យអស់ក្ដីកង្វល់ជុំវិញការលាងលុយកខ្វក់ និងបញ្ហាសន្តិសុខ ដែលបង្កដោយជនជាតិចិនមួយចំនួន ក្នុងពេលកន្លងមក»។ លោក ង៉ែត ជូ មានប្រសាសន៍ដូចនេះ។
ដោយឡែកទីផ្សារអចលនទ្រព្យបែបពាណិជ្ជកម្ម ពិសេសការិយាល័យ គឺមានរូបភាពខុសគ្នាខ្លាំងបើធៀបនឹងទីផ្សារលំនៅឋាន។ អ្នកស្រី អាន ធីតា ឲ្យដឹងដូចនេះថា៖«ទីផ្សារការិយាល័យមានតម្រូវការច្រើនពីរក្រុមហ៊ុនអន្តរជាតិសម្រាប់ការិយាល័យដែលមានគុណភាពល្អក្នុងរយៈពេល ២៤ខែកន្លងមក ហើយអត្រាប្រើប្រាស់មានស្ថេរភាពល្អ ទោះបីជាមានការផ្គត់ផ្គង់ថ្មីក៏ដោយ។ យើងរំពឹងទុកថាតម្រូវការការិយាល័យដែលមានគុណភាព នឹងបន្តកើនឡើងក្នុងរយៈពេល១២ខែទៀត»។
អ្នកជំនាញក្នុងវិស័យនេះ ជំរុញឲ្យរដ្ឋាភិបាលអនុវត្តវិធានច្បាប់ និងគោលនយោបាយនានា ដែលលើកទឹកចិត្តដល់ការអភិវឌ្ឍប្រកបដោយនិរន្តរភាពដើម្បីធ្វើឲ្យមានតុល្យភាពរវាងតម្រូវការបែបសង្គម និងសេដ្ឋកិច្ច។ អ្នកជំនាញ លើកឡើងស្រដៀងគ្នាថា ក្នុងពេលថ្មីៗនេះ ការអភិវឌ្ឍមួយចំនួនមិនសូវយកចិត្តទុកដាក់អំពីទីធ្លាបៃតង អត្តសញ្ញាណកម្ពុជា សេវាសាធារណៈ សុវត្ថិភាព អគ្គិភ័យ និងការទទួលខុសត្រូវសង្គមនោះទេ។
ទោះយ៉ាងណាគេរំពឹងថាទីផ្សារដែលមានភាពប្រកួតប្រជែងនេះ នឹងនាំឲ្យអ្នកអភិវឌ្ឍន៍ជាច្រើនចាប់ផ្ដើមយកចិត្តទុកដាក់លើបញ្ហាសំខាន់ៗទាំងនេះ ដើម្បីបង្កើនគុណប្រយោជន៍បន្ថែមលើគម្រោងរបស់ខ្លួន៕
Tag:
អចលនទ្រព្យ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
