កីឡាជាតិ
ជាតិ
ស៊ន សៀវម៉ី ប៉ះកីឡាការិនីស្រីលង្កា Ranuri រីឯ Cassie ជួបជើងខ្លាំងវៀតណាមថ្ងៃនេះ
× កីឡាការិនី ស៊ន សៀវម៉ី ត្រូវប្រជែងជាមួយកីឡាការិនីស្រីលង្កា Ranuri Wanthila Wickramas Wickramasinghalage លើទម្ងន់៦៧គីឡូក្រាមឡើង នាព្រឹត្តិការណ៍ Asian Games 2018 ក្នុងទីក្រុងហ្សាការតាប្រទេសឥណ្ឌូណេស៊ី។ ចំណែកកីឡាការិនីខ្មែរ-អាមេរិក Casandre Nicole Tubbs ប៉ះកីឡាការិនីជើងខ្លាំងមកពីវៀតណាម Pham Thi Thu Hien។
ព្រឹត្តិការណ៍ Asian Games 2018 ដែលរៀបចំនៅទីក្រុងហ្សាការតា និងប៉ាឡាំបាងប្រទេសឥណ្ឌូណេស៊ី បានប្រព្រឹត្តទៅអស់រយៈពេល២ថ្ងៃហើយ។ ប៉ុន្តែអត្តពលិកកម្ពុជាមិនទាន់អាចស្វែងរកមេដាយដំបូងជូនជាតិមាតុភូមិនៅឡើយ ខណៈកីឡា៥ប្រភេទត្រូវបានប្រកួតជារួចរាល់ជាបណ្តើរៗ។
នៅថ្ងៃអង្គារទី២១ ខែសីហានេះ ម្ចាស់មេដាយមាស Asian Game 2014 កីឡាការិនី ស៊ន សៀវម៉ី ដែលជាក្តីរំពឹងក្នុងការដណ្តើមមេដាយរបស់កម្ពុជា ត្រូវប្រកួតបើកឆាករបស់ខ្លួន ដោយប៉ះជាមួយកីឡាការិនីស្រីលង្កា Ranuri Wanthila Wickramas Wickramasinghalage។ ការប្រកួតដែលរៀបចំនៅទីលាន JCC - Plenary Hall លើទម្ងន់៦៧គីឡូក្រាមឡើងមួយនេះ ស្ថិតនៅជុំទី១៦។
ការប្រកួតថ្ងៃនេះ ស៊ន សៀវម៉ី មានភាគរយខ្ពស់ជាងក្នុងការឈានទៅវគ្គបន្ត។ ព្រោះម្ចាស់មេដាយមាសស៊ីហ្គេមឆ្នាំ២០១៧ រូបនេះ មានប្រៀបទាំងកម្ពស់និងបទពិសោធលើឆាកអន្តរជាតិ។ ស៊ន សៀវម៉ី ដែលមានកម្ពស់១,៨៣ម៉ែត្រ ស្ថិតនៅលេខ២៦ក្នុងតារាងចំណាត់ថ្នាក់ពិភពលោក។ នៅឆ្នាំ២០១៦ សៀវម៉ី ជាម្ចាស់ជើងឯករងក្នុងព្រឹត្តិការណ៍ Asian Championship នៅទីក្រុងម៉ានីលប្រទេសហ្វីលីពីន និងជាម្ចាស់ជើងឯកស៊ីហ្គេមឆ្នាំ២០១៣ នៅប្រទេសមីយ៉ាន់ម៉ា។
ចំណែកគូប្រកួតរបស់គេមានកម្ពស់១,៧៤ម៉ែត្រ ស្ថិតនៅលេខ១២០ក្នុងតារាងចំណាត់ថ្នាក់ពិភពលោក។ កីឡាការិនីស្រីលង្ការូបនេះ មិនសូវមានបទពិសោធប្រកួតលើឆាកអន្តរជាតិនោះទេ ហើយក៏មិនធ្លាប់ទទួលបានលទ្ធផលគួរឲ្យកត់សម្គាល់ដែរ។ ជាក់ស្តែងនាការប្រកួត Asian Championship កាលពីពេលថ្មីៗនៅទីក្រុងហូជីមិញប្រទេសវៀតណាម នាងបានធ្លាក់ត្រឹមវគ្គជម្រុះជុំទី១។
មុនការប្រកួតដ៏ជក់ចិត្តខាងលើ នៅម៉ោង៩(ម៉ោងនៅកម្ពុជា)ថ្ងៃអង្គារនេះដែរ កីឡាការិនីខ្មែរ-អាមេរិក Tubbs Casandre Nicole ប៉ះកីឡាការិនីវៀតណាម Thu Hien Pham Thi ក្នុងទម្ងន់៥៧គីឡូក្រាម។ កីឡាការិនីដែលមានម្តាយខ្មែរ និងឪពុកអាមេរិករូបនេះ មានវ័យ១៩ឆ្នាំស្ថិតនៅលេខ៩៣ក្នុងតារាងចំណាត់ថ្នាក់ពិភពលោក។ កីឡាការិនីដែលមានឈ្មោះក្រៅ Cassie រូបនេះ ធ្លាប់ទទួលបានចំណាត់ថ្នាក់លេខ៣ម្តងក្នុងព្រឹត្តិការណ៍កីឡាស៊ីហ្គេមឆ្នាំ២០១៧។
ងាកមកមើលប្រវត្តិគូប្រកួតរបស់នាងឯណេះវិញ កីឡាការិនីវៀតណាមរូបនេះ ជោគជាំដោយបទពិសោធក្នុងការប្រកួតលើឆាកអន្តរជាតិ និងទទួលបានលទ្ធផលល្អគួឲ្យកត់សម្គាល់។ សម្រាប់ការប្រកួត Asian Games នៅកូរ៉េខាងត្បូងឆ្នាំ២០១៤ នាងទទួលបានចំណាត់ថ្នាក់លេខ៣ ហើយកាលពីពេលថ្មីៗក្នុងព្រឹត្តិការណ៍ Asian Championship នៅទីក្រុងហូជីមិញប្រទេសវៀតណាម កីឡាកររូបនេះបញ្ចប់ក្នុងចំណាត់ថ្នាក់លេខ៣។
សម្រាប់ការប្រកួតកីឡាស៊ីហ្គេមនៅម៉ាឡេស៊ីឆ្នាំ២០១៧ កីឡាការិនីវ័យ២៣ឆ្នាំរូបនេះ បញ្ចប់ក្នុងចំណាត់ថ្នាក់លេខ២។ ស៊ីហ្គេមឆ្នាំ២០១៣ នៅមីយ៉ាន់ម៉ា Thu Hien Pham Thi ជាម្ចាស់ជើងឯក និងស៊ីហ្គេមឆ្នាំ២០១៥នៅសិង្ហបុរីកីឡាការិនីរូបនេះបញ្ចប់ក្នុងចំណាត់ថ្នាក់លេខ២។ ប៉ុន្តែអ្វីដែលកីឡាការិនីខ្មែរ-អាមេរិកមានប្រៀបជាងនោះគឺកម្ពស់ ដោយនាងមានកម្ពស់១,៨០ម៉ែត្រ ខណៈកីឡាការិនីវៀតណាមមានកម្ពស់១,៦៥ម៉ែត្រ៕
Tag:
ស៊ន សៀវម៉ី
Asian Games 2018
Cassie
© រក្សាសិទ្ធិដោយ thmeythmey.com