ជាតិ
បទយកការណ៍ / បទសម្ភាសន៍
សេដ្ឋកិច្ច
មួយខែចំណាយជិត២០០០ដុល្លារ, លោក រតនា បោះទុនលក់បន្លែសរីរាង្គតាមApp
× ភ្នំពេញ៖ លោក ភុន រតនា និងស្ថាបនិក ៤រូបទៀត បានបង្កើតហាង ផ្សារខ្មែរ ដែលជាអាជីវកម្មលក់បន្លែសរីរាង្គ តាមអ៊ែបទូរសព្ទ។ អាជីវក្មនេះ មានគោលដៅអតិថិជនជាអ្នករស់នៅក្នុងផ្ទះបុរី ដែលលោក រតនា អះអាងថា ពួកគេនឹងជ្រើសរើសផលិតផលរបស់លោក ដោយសារភាពទំនើប ងាយស្រួល និងការដឹកជញ្ជូនឥតគិតថ្លៃ។
សូមស្ដាប់កិច្ចសម្ភាសរវាងលោក ញ៉ុង ហេង អ្នកកាសែតសេដ្ឋកិច្ចនៃសារព័ត៌មានថ្មីៗ និងលោក ភុន រតនា សហស្ថាបនិក និងអ្នកគ្រប់គ្រងទូទៅហាងផ្សារខ្មែរ ខាងក្រោមនេះ៖
ក្រុមរបស់លោក ភុន រតនា បានបោះទុនជាង ៣ម៉ឺនដុល្លារសម្រាប់ការចាប់ផ្ដើមអាជីវកម្ម Startup មួយនេះ និងចំណាយប្រមាណ ១៨០០ដុល្លារ សម្រាប់ប្រតិបត្តិការប្រចាំខែ។ លោក រតនា ឲ្យដឹងថា ចំពោះអាជីវកម្មមួយនេះ ក្រុមរបស់ខ្លួនត្រូវប្រើរយៈពេលពី ៦ខែទៅ១ឆ្នាំ ទើបរកបានផលចំណេញ។
សហគ្រិនថ្មីថ្មោងរូបនេះ អះអាងថា អាជីវកម្មរបស់ខ្លួននឹងដំណើរការល្អ ដោយសារភាពជឿជាក់របស់អតិថិជន តាមរយៈការដែលហាងនេះមានឧបករណ៍ត្រួតពិនិត្យគុណភាពបន្លែ និងកម្មវិធីអ៊ែបលើទូរសព្ទដៃ។ កម្មវិធីអ៊ែបនេះ នឹងដាក់ឲ្យដំណើរការក្នុងពេលឆាប់ៗនេះ។
មុនបើកអាជីវកម្មថ្មីមួយនេះ លោក ភុន រតនា បានបើកកសិដ្ឋានដាំបន្លែសរីរាង្គនៅខេត្តសៀមរាប ជាមួយដៃគូរបស់ខ្លួនផ្សេងទៀត។ អាជីវកម្មទាំងពីរនេះ សុទ្ធតែស្ថិតក្នុងជំនាញរបស់លោក រតនា ដែលលោកបានបញ្ចប់ការសិក្សាបរិញ្ញាបត្រកសិកម្ម។
នេះជាការឆ្លៀតប្រើពេលបើកអាជីវកម្ម ដោយស្ថាបនិកទាំងអស់នេះសុទ្ធតែមានការងារផ្សេងរៀងៗខ្លួន។ ពួកគេក៏បានជួលបុគ្គលិកខ្លះមកប្រចាំការផងដែរ៕
Tag:
startup
ភុន រតនា
បន្លែសរីរាង្គ
© រក្សាសិទ្ធិដោយ thmeythmey.com