ជាតិ
នយោបាយជាតិ
ក្រោយរួចពីពន្ធនាគារ លោក អ៊ួន ឈិន និងលោក យាង សុជាមេត្តា មិនទាន់ដឹងថាត្រូវធ្វើការអ្វីឡើយ
× ក្រោយចេញពីពន្ធនាគារព្រៃសនៅយប់ថ្ងៃទី២១ ខែសីហា ឆ្នាំ២០១៨នេះ លោក អ៊ួន ឈិន និងលោក យាង សុជាមេត្តា អតីតអ្នកកាសែតវិទ្យុអាស៊ីសេរី បាននាំគ្នាទៅកាន់វត្តអង្គតាម៉ិញ ដើម្បីឲ្យព្រះសង្ឃស្រោចទឹកលាងជម្រះឧបទ្រព និងអពមង្គលទាំងពួង ចេញពីជីវិតរបស់ពួកលោក។
មុខនឹងចូលទៅក្នុងវត្ត អ្នកទាំងពីរ បានផ្តល់បទសម្ភាសដល់អ្នកកាសែត។ លោក អ៊ួន ឈិន មានបំណងចង់ធ្វើជាអ្នកកាសែតដដែល ពីព្រោះលោក នៅតែស្រឡាញ់អាជីពនេះ។
ក៏ប៉ុន្តែ លោក បញ្ជាក់ថា ក្នុងអំឡុងពេលនេះ ប្រហែលជាលោក មិនអាចឈានជើងចូលក្នុងវិស័យសារព័ត៌មានទេ ដោយសារតែមានការលំបាកខ្លះៗ។ លោក រៀបរាប់ថា ក្រោយពេលចេញពីពន្ធនាគារ លោក ត្រូវការពេលវេលានៅជាមួយគ្រួសារ ជាពិសេសជូនកូនទៅសាលា។
ម្យ៉ាងទៀត ពួកលោកទាំងពីរ មិនទាន់រួចផុតពីការចោទប្រកាន់របស់តុលាការនៅឡើយទេ ពោលគឺតុលាការឲ្យពួកលោកនៅក្រៅឃុំជាបណ្តោះអាសន្ន តែនៅតែស្ថិតនៅក្រោមការស៊ើបអង្កេត។ ដូច្នេះតុលាការ អាចហៅពួកលោកទាំងពី ទៅសួរបានគ្រប់ពេល។ ទាំងនេះជាការលើកឡើងរបស់លោក អ៊ួន ឈិន។
ចំណែកលោក យាង សុជាមេត្តា ក៏បានបង្ហាញផលលំបាកដែរ ដោយលោកនិយាយថា ពួកលោក បានលាឈប់ពីវិទ្យុអាស៊ីសេរី តាំងពីមិនទាន់ត្រូវបានសមត្ថកិច្ចចាប់ខ្លួនម្ល៉េះ ហើយពេលចេញពីពន្ធនាគារ ក៏លោកមិនទាន់ដឹងថា ត្រូវទៅការងារអ្វី និងនៅស្ថាប័នណាដែរ។ ជាពិសេសខ្លួន មិនទាន់មានសេរីភាពពេញលេញទេ ដ្បិតស្ថិតនៅក្រោមការឃ្លាំមើលរបស់តុលាការ។
សូមរម្លឹកថា លោក អ៊ួន ឈិន និងលោក យាង សុជាមេត្តា ត្រូវបានចោទចំនួនពីរបទល្មើស គឺ បទផលិតព័ត៌មានដោយខុសច្បាប់ ដែលធ្វើឲ្យអន្តរាយដល់សន្តិសុខជាតិ និងបទផលិតវីដេអូអាសអាភាស។ អ្នកទាំងពីរត្រូវបានចាប់ខ្លួន កាលពីថ្ងៃទី១៤ ខែវិច្ឆិកា ឆ្នាំ២០១៧៕
© រក្សាសិទ្ធិដោយ thmeythmey.com