អន្តរជាតិ
លោក មហាធៀ ថា ម៉ាឡេស៊ីមានរឿងច្រើនត្រូវរៀនពីចិន នាយករដ្ឋមន្រ្តីម៉ាឡេស៊ី លី ខឹឈាំង ស្វាគមន៍នាយករដ្ឋមន្រ្តីម៉ាឡេស៊ី មហាធៀ មហាម៉ាត់ (រូបភាព Xinhua)
× កាលពីទស្សនកិច្ចការងារនៅជប៉ុន នាយករដ្ឋមន្ត្រីម៉ាឡេស៊ី មហាធៀ មហាម៉ាត់ ធ្លាប់និយាយថា ម៉ាឡេស៊ីគួររៀនសូត្រពីជប៉ុន បើចង់មានបានដូចមហាអំណាចសេដ្ឋកិច្ចលំដាប់ទីបីនេះ។ ដោយឡែកនៅក្រោយទស្សនកិច្ចផ្លូវការនៅចិន លោក មហាធៀ ក៏និយាយទៀតថា ម៉ាឡេស៊ីអាចយកគំរូតាមលំនាំចិនបានដែរ។ ចំណុចដែលលោក មហាធៀ ចង់រៀនតាម គឺវិធីសាស្ត្រដែលចិនអាចផ្ដល់តម្រូវការឲ្យប្រជាជនដ៏ច្រើនសន្ធឹកសន្ធាប់បានគ្រប់គ្រាន់។
នាយករដ្ឋមន្ត្រីម៉ាឡេស៊ី មហាធៀ មហាម៉ាត់ ទើបបញ្ចប់ទស្សនកិច្ចផ្លូវការនៅចិននៅថ្ងៃទី២១ ខែសីហា។ លោក មហាធៀ បានជួបជាមួយថ្នាក់ដឹកនាំសំខាន់ៗរបស់ចិនមានប្រធានាធិបតី ស៊ី ជិនភីង និងសមភាគី លី ខឹឈាំង ព្រមទាំងធុរជនល្បីៗរបស់ចិនជាច្រើនទៀតដូចជា Jack Ma នាយកក្រុមហ៊ុន Alibaba ជាដើម។ មុនត្រឡប់ទៅប្រទេសវិញ នាយករដ្ឋមន្ត្រីរូបនេះ ក៏បានទៅទស្សនកិច្ចនៅមជ្ឈមណ្ឌលកសិកម្ម និងបច្ចេកវិទ្យាផង។
ក្នុងសន្និសីទសារព័ត៌មានបញ្ចប់ដំណើរទស្សនកិច្ច លោក មហាធៀ និយាយថា ម៉ាឡេស៊ីចាំបាច់ត្រូវរៀនសូត្រពីចិនជាពិសេសការបំពេញតម្រូវការរបស់ប្រជាជន។ ត្រង់ចំណុចនេះ អ្វីដែលលោក មហាធៀ ចង់ដឹង គឺរបៀបដែលប្រទេសដ៏ធំមួយដូចចិនអាចចិញ្ចឹមប្រជាជនជាង១.៤ពាន់លាននាក់បានតាមរយៈការផ្គត់ផ្គង់អាហារ បង្កើតបច្ចេកវិទ្យាថ្មីដើម្បីសម្រួលការរស់នៅ និងការបង្កើតការងារសម្រាប់ប្រជាជនផង។
យោងតាមទីភ្នាក់ងារព័ត៌មាន Bernama នាយករដ្ឋមន្ត្រីវ័យ៩៣ឆ្នាំរូបនេះ ក៏វាយតម្លៃខ្ពស់ចំពោះការផលិតស្រូវរបស់ចិនដែលមិនត្រឹមបំពេញសេចក្ដីត្រូវការក្នុងស្រុកឡើយ ថែមទាំងអាចនាំចេញបានទៀត។ លោកក៏ឆ្លៀតនិយាយបែបរិះគន់ប្រទេសរបស់លោកដែលមានប្រជាជនត្រឹមត្រូវ៣០លាននាក់ តែអាចផលិតស្រូវបានចំនួន៧០ភាគរយនៃតម្រូវការសរុប ទោះជារដ្ឋាភិបាលប្រឹងជួយផ្ដល់ប្រាក់ឧបត្ថម្ភ និងផ្ដល់ជីក្ដី។
លើសពីនេះ នាយករដ្ឋមន្ត្រីទី៧ របស់ម៉ាឡេស៊ីរូបនេះក៏ចង់រៀនសូត្រពីការធ្វើទីផ្សារតាមអនឡាញក្នុងការលក់ផលិតផលទៅទីផ្សារក្នុងស្រុក និងក្រៅស្រុក។ គំនិតនេះលេចឡើងក្រោយលោកបានជួបជាមួយលោក Jack Ma នៅទីក្រុងហាងចូវកាលពីពេលចាប់ផ្ដើមដំណើរទស្សនកិច្ចនៅចិន។ តាមរយៈវិធីសាស្ត្រនេះ ផលិតផលមិនត្រឹមអាចផ្គត់ផ្គង់ប្រទេសទាំងមូលឡើយ តែអាចលក់តាមអនឡាញទៅបរទេសផង។ ក្នុងន័យនេះ លោក មហាធៀ ជឿថា ម៉ាឡេស៊ីមិនចាំបាច់រស់ក្នុងភាពក្រីក្រទៀតឡើយ។
សូមរំឭកថា ក្នុងដំណើរទៅកាន់ក្រុងតូក្យូក្នុងខែមិថុនា នាយករដ្ឋមន្ត្រីម៉ាឡេស៊ីរូបនេះបានលើកសរសើរសីលធម៌ក្នុងការងារ និងការព្យាយាមរបស់ជនជាតិជប៉ុន ដោយលោកចាត់ទុកជាមូលហេតុនាំឲ្យជប៉ុនរីកចម្រើន។ លោកអះអាងថា ម៉ាឡេស៊ីគ្មានចំណុចទាំងនេះដូចជប៉ុនឡើយ។ សម្រាប់នាយករដ្ឋមន្ត្រីវ័យចំណាស់នេះ ម៉ាឡេស៊ីក៏អាចជោគជ័យដូចជប៉ុនដែរ បើរៀនសូត្រតាមចំណុចល្អៗរបស់ជប៉ុននោះ៕
Tag:
ចិន
ម៉ាឡេស៊ី
មហាធៀ មហាម៉ាត់
© រក្សាសិទ្ធិដោយ thmeythmey.com