កីឡាអន្តរជាតិ
អន្តរជាតិ
ប្រធានាធិបតី​លី​បេ​រី​យ៉ា​នឹង​ប្រគល់​មេដាយ​កិត្តិយស​ដល់ Wenger អតីត​គ្រូ​ខ្លួន ដើម្បី​ជាការ​ដឹងគុណ
22, Aug 2018 , 8:39 pm        
រូបភាព
លោក George Weah និង Arsene Wenger កាលជាគ្រូនិងសិស្សនៅ Monaco
លោក George Weah និង Arsene Wenger កាលជាគ្រូនិងសិស្សនៅ Monaco
​លោក George Weah ប្រធានាធិបតី​លី​បេ​រី​យ៉ា និង​ជា​អតីត​កីឡាករ​បាល់ទាត់​ល្បីឈ្មោះ​ម្នាក់ នឹង​ប្រគល់​មេដាយ​កិត្តិយស​លំដាប់​ខ្ពស់បំផុត​របស់​ប្រទេស​ជូន​ដល់​លោក Arsene Wenger ដែលជា​អតីត​គ្រូ​ខ្លួន​កាល​នៅ Monaco ដើម្បី​ជាការ​ដឹងគុណ​។​



អត្ថបទទាក់ទង


​លោក Weah ដែល​ទើប​ជាប់ឆ្នោត​ឡើងកាន់តំណែង​ជា​ប្រធានាធិបតី​លី​បេ​រី​យ៉ា​កាលពី​ខែមករា​កន្លងទៅ ជា​កីឡាករ​បាល់ទាត់​ពី​ទ្វីបអាហ្វ្រិក​តែ​ម្នាក់​គត់​ដែល​ជាប់​ឈ្មោះ​ជា​កីឡាករ​ឆ្នើម​ប្រចាំឆ្នាំ​របស់​ពិភពលោក Ballon d'Or ក្នុង​ឆ្នាំ​១៩៩៥​។ លោក Arsene Wenger ដែល​កាលនោះ​ជា​អ្នកចាត់ការ Monaco បាន​ទិញ​ខ្សែប្រយុទ្ធ​រូបនេះ​ពី​ក្លិប Tonnerre Yaoundé មក​រួម​ក្រុម​ក្នុង​ឆ្នាំ​១៩៨៨​។​

 Wenger អ្នកចាត់ការ​សញ្ជាតិ​បារាំង​ដែល​បាន​លាលែង​ពី​តំណែង​គ្រូ Arsenal ក្រោយ​ដឹកនាំ​រយៈពេល ២២ ឆ្នាំ​នោះ​ធ្លាប់បាន​បណ្តុះបណ្តាល​តារា​បាល់ទាត់​ពី​អាហ្វ្រិក​ជាច្រើន​នាក់​ដែល​ក្នុងនោះ​រួមមាន Weah ផងដែរ​។​

Weah វ័យ​៥១​ឆ្នាំ​ដែលជា​អតីត​ខ្សែប្រយុទ្ធ Paris Saint-Germain, AC Mila, Chelsea, Manchester City, Marseille និង Al Jazira បាន​ចូលនិវត្តន៍​ពី​អាជីព​កីឡាបាល់ទាត់​ក្នុង​ឆ្នាំ​២០០៣ ដើម្បី​ចូលប្រឡូក​ក្នុង​វិស័យ​នយោបាយ ដោយ​ចូល​បម្រើ​ជា​សមាជិក​ព្រឹទ្ធសភា​ក្នុងប្រទេស​លី​បេ​រី​យ៉ា​តែម្តង​។ លោក​បានឈ្នះ​ការបោះឆ្នោត​ភ្លូកទឹកភ្លូកដី​កាលពី​ចុងឆ្នាំ​២០១៧​។​



​បើតាម​រដ្ឋមន្ត្រីក្រសួង​ព័ត៌មាន​លី​បេ​រី​យ៉ា​លោក Eugene Nagbe បាន​ប្រាប់ BBC ថា ដើម្បី​ជាការ​ដឹងគុណ​សម្រាប់​ការជួយ​ត្រួស​ត្រាយផ្លូវ​ខ្លួន​នោះ លោក​ប្រធានាធិបតី George Weah បានប្រកាស​ផ្តល់​ពាន​មេដាយ​កិត្តិយស​លំដាប់​កំពូល​របស់​ប្រទេស​អាហ្វ្រិក​មួយ​នេះ​ដល់​លោក Wenger​។

​ពិធី​ប្រគល់​មេដាយ​កិត្តិយស ត្រូវបាន​គេ​រំពឹងថា​នឹងធ្វើ​ឡើង​ក្នុង​រដ្ឋធានី Monrovia នៃ​ប្រទេស​លី​បេ​រី​យ៉ា​នៅ​ថ្ងៃទី​២៤ ខែសីហា ឆ្នាំ​២០១៨ ខាងមុខនេះ​៕


Tag:
 បាល់ទាត់​
  George Weah
  Arsene Wenger
© រក្សាសិទ្ធិដោយ thmeythmey.com