កីឡាជាតិ
Asian Games៖ ម៉ូតូទឹក ដែលជាប្រភេទកីឡារំពឹងដណ្តើមបានមេដាយ ត្រូវប្រកួតនៅថ្ងៃនេះ
×![]()
ការប្រណាំងម៉ូតូទឹក ដែលជាប្រភេទកីឡារំពឺងដណ្តើមបានមេដាយពីព្រឹត្តិការណ៍ Asian Games 2018 នៅប្រទេសឥណ្ឌូណេស៊ីជូនជាតិ ត្រូវប្រកួតនៅថ្ងៃទី២៣ ខែសីហា ឆ្នាំ២០១៨។ កីឡាករកម្ពុជាទាំងពីររូបត្រូវប្រជែងជាមួយកីឡាករ៧រូបផ្សេងទៀតមកពីឥណ្ឌូណេស៊ី, ថៃ, ចិន និងអាមីរ៉ាតអារ៉ាប់រួម។
កីឡាប្រណាំងម៉ូតូទឹក ដែលមានកីឡាករ សាលី អ៊ូមើត និង ម៉ឺន មូសស្តាន ត្រូវបានថ្នាក់ដឹកនាំកីឡាកម្ពុជាចាត់ទុកជាប្រភេទកីឡាសក្តានុពលមួយក្នុងចំណោមកីឡាសក្តានុពលទាំង៤ប្រភេទ សម្រាប់ការប្រកួតកីឡា Asian Games លើកទី១៨នៅប្រទេសឥណ្ឌូណេស៊ី។
ជាមួយគ្នានេះលោក ណេះ ស្លេះ ប្រធានសហព័ន្ធកីឡាម៉ូតូទឹកកម្ពុជាបានដាក់ក្តីរំពឹងខ្ពស់លើកីឡាករទាំងពីររូបក្នុងការដណ្តើមមេដាយពីព្រឹត្តិការណ៍ដ៏ធំប្រចាំទ្វីបអាស៊ីមួយនេះ។ «សម្រាប់ការប្រកួត Asian Games នៅឥណ្ឌូណេស៊ីលើកនេះ យើងរំពឹងនិងមានការជឿជាក់ថា កីឡាកររបស់យើងនឹងក្លាយជាកីឡាសក្តានុពលដណ្តើមបានមេដាយមាសក្នុងព្រឹត្តិការណ៍ដ៏ធំមួយនេះ»។ នេះជាការបង្ហាញក្តីរំពឹងរបស់លោក ណេះ ស្លេះ មុនពេលចេញដំណើរទៅចូលរួមប្រកួតនៅឥណ្ឌូណេស៊ី។
ការរំពឹងខ្ពស់បែបនេះ ដោយសារកីឡាទាំងពីររូបខាងលើធ្លាប់ជាម្ចាស់ជើងឯកនៅអាមេរិក, អឺរ៉ុប, អាល្លឺម៉ង់ និងអូស្ត្រាលីជាដើម។ លើសពីនេះ ដើម្បីត្រៀមចូលរួមព្រឹត្តិការណ៍នេះ សហព័ន្ធបញ្ជូនបានពួកគេទៅហ្វឹកហាត់ និងប្រកួតសមរយៈពេល៦ខែនៅប្រទេសថៃ អាល្លឺម៉ង់ អូស្ត្រាលី និងអ៊ីតាលីជាដើម។ នេះបើតាមការបញ្ជាក់របស់ប្រធានសហព័ន្ធខាងលើ។
ម្យ៉ាងទៀត ម៉ូតូដែលកីឡាករទាំងពីរជិះប្រណាំងក្នុងព្រឹត្តិការណ៍ Asian Games នេះ ត្រូវបានកុំម្មង់ពីរោងចក្រផ្ទាល់តែម្តង។ បន្ថែមលើនេះ សហព័ន្ធបានជួលអតីតកីឡាករម្ចាស់ជើងឯកពិភពលោក ឲ្យមកបង្វឹកថែមទៀតផង៕
Tag:
កីឡាម៉ូតូទឹក
Asian Games 2018
© រក្សាសិទ្ធិដោយ thmeythmey.com
