Asian Games៖ សុខ វរលក្ខណ៍ បញ្ចប់ចំណាត់ថ្នាក់ឈរលើ៨ប្រទេស លើវិញ្ញាសាហែលកង្កែប

កីឡាជាតិ

ជាតិ

Asian Games៖ សុខ វរលក្ខណ៍ បញ្ចប់ចំណាត់ថ្នាក់ឈរលើ៨ប្រទេស លើវិញ្ញាសាហែលកង្កែប

23, Aug 2018 , 11:42 am

រូបភាព

ដោយ:

កីឡាការិនីហែលទឹក សុខ វរលក្ខណ៍ បានបញ្ចប់ចំណាត់ថ្នាក់ឈរលើ៨ប្រទេស នាការប្រកួតកីឡា Asian Games 2018 នៅប្រទេសឥណ្ឌូណេស៊ី លើវិញ្ញាសាហែលកង្កែបចម្ងាយ៥០ម៉ែត្រ។ សម្រាប់ការប្រកួតនៅថ្ងៃទី២៣ ខែសីហានេះដែរ កីឡាករ លឹម កែវឧត្តម បញ្ចប់ត្រឹមលេខ៣៥ក្នុងចំណោមកីឡាករ៤០នាក់ ខណៈកីឡាករ ធឿន ថុល ឈរលេខ៤២ក្នុងចំណោម៤៧នាក់។

សម្រាប់ការប្រកួតលើវិញ្ញាសាហែលកង្កែបចម្ងាយ៥០ម៉ែត្រនៅអាងហែលទឹកក្នុងមជ្ឈមណ្ឌល GBK - Aquatic Center នៅព្រឹកថ្ងៃទី២៣ ខែសីហា កីឡាការិនី សុខ វរលក្ខណ៍ បានបញ្ចប់ក្នុងចំណាត់ថ្នាក់លេខ៧ក្នុង Heats ដែលមានកីឡាការិនី៨រូបចូលរួម ក្រោយប្រើពេល៣៦វិនាទី។ លទ្ធផលជារួម វរលក្ខណ៍ បញ្ចប់ក្នុងចំណាត់ថ្នាក់លេខ២១ ដោយឈរលើកីឡាការិនី៩រូបមកពីប៉ាឡេស្ទីន, ប៉ាគីស្ថាន, ម៉ុងហ្គោលី, តាហ្ស៊ីគីស្ថាន, នេប៉ាល់, បង់ក្លាដែស, ឡាវ និងម៉ាឌីវ។

កីឡាករ ធឿន ថុល បានបញ្ចប់ក្នុងចំណាត់ថ្នាក់លេខ៣ក្នុង Heats ក្នុងចំណោមកីឡាករ៨រូប ក្រោយប្រើពេល៥៨.៧៨នាទីលើវិញ្ញាសាហែលសេរីចម្ងាយ១០០ម៉ែត្រ។ ប៉ុន្តែលទ្ធផលជារួមកីឡាកររូបនេះ ឈរចំណាត់ថ្នាក់លេខ៤២ក្នុងចំណោមកីឡាករចូលរួម៤៧នាក់ ដោយឈរលើប្រទេសឥណ្ឌា, តាហ្ស៊ីគីស្ថាន, ប៉ាឡេស្ទីន, ម៉ាឌីវ និងអេមីរ៉ាតអារ៉ាប់រួម។

ជាមួយគ្នានេះកីឡាករ លឹម កែវឧត្តម បានប្រើពេល២៧.៣៨វិនាទីលើវិញ្ញាសាហែលមេអំបៅចម្ងាយ៥០ម៉ែត្រ ដើម្បីឈរចំណាត់ថ្នាក់លេខ៣៥ក្នុងចំណោមកីឡាករចូលរួម៤០នាក់។ ដោយរូបគេឈរកីឡាកររូបមកពីម៉ុងហ្គោលី, ប៉ាឡេស្ទីន, តាហ្ស៊ីគីស្ថាន និងអាហ្វហ្គានីស្ថាន។ តាមរយៈលទ្ធផលនេះ កីឡាករកីឡាការិនីទាំង៣រូបខាងលើមិនអាចឡើងទៅវគ្គបន្តនោះទេ៕