អន្តរជាតិ
អូស្ត្រាលី៖ កៅអីនាយករដ្ឋមន្ត្រី ធើនប៊ូល រង្គោះរង្គើ ព្រោះសមាជិកបក្សចង់ប្រជែង នាយករដ្ឋមន្រ្តីអូស្ត្រាលី ម៉ាល់ខម ធើនប៊ូល (រូបភាព AFP)
× កៅអីនាយករដ្ឋមន្ត្រីអូស្ត្រាលីរបស់លោក ម៉ាល់ខម ធើនប៊ូល រង្គោះរង្គើកាន់តែខ្លាំង ស្របពេលរដ្ឋមន្ត្រីសំខាន់ដាក់ពាក្យលាលែង ហើយគូប្រជែងរបស់លោកកំពុងការគាំទ្រដើម្បីផ្ដួលរូបលោក។ លោក ធើនប៊ូល អាចបន្តអំណាច បន្ទាប់ពីទទួលសំឡេងគាំទ្រភាគច្រើនក្នុងការបោះឆ្នោតផ្ទៃក្នុងបក្សនៅថ្ងៃទី២២ ខែសីហា។ ប៉ុន្តែគូប្រជែងរបស់លោកគឺ អតីតរដ្ឋមន្ត្រីមហាផ្ទៃ Peter Dutton ដែលបរាជ័យម្ដងហើយនោះ នៅមិនទាន់បោះបង់ការព្យាយាមនៅឡើយ និងត្រៀមប្រជែងម្ដងនៅថ្ងៃទី២៤ ខែសីហា។
វិបត្តិនយោបាយនៅអូស្ត្រាលីបានផុងកាន់តែជ្រៅក្នុសប្ដាហ៍នេះ រហូតដល់មានការស្នើផ្លាស់ប្ដូរនាយករដ្ឋមន្ត្រី។ លោកនាយករដ្ឋមន្ត្រី ម៉ាល់ខម ធើនប៊ូល (Malcolm Turnbull) កំពុងរងសម្ពាធឲ្យលាលែងពីតំណែង ខណៈដែលសមាជិករដ្ឋាភិបាលសំខាន់ជាច្រើនបានសុំលាលែងពីតំណែងជាបន្តបន្ទាប់។ នៅថ្ងៃទី២២ ខែសីហា លោកបានឆ្លងផុតការបោះឆ្នោតផ្ទៃក្នុងបក្សពលករកំពុងកាន់អំណាច ទាំងប្រផិតប្រផើយ។
ដោយសារបាត់បង់ការគាំទ្រពីសមាជិកសំខាន់ក្នុងបក្ស កៅអីនាយករដ្ឋមន្ត្រីរបស់លោក ធើនប៊ូល បានរង្គើជាថ្មីទៀត។ អតីតរដ្ឋមន្ត្រីមហាផ្ទៃ Peter Dutton ដែលចង់បានតំណែងនាយករដ្ឋមន្ត្រីវិញម្ដង បានប្រមូលអតីតអ្នកគាំទ្ររបស់លោកនាយករដ្ឋមន្ត្រី និងស្នើឲ្យលោក ធើនប៊ូល កោះប្រជុំផ្ទៃក្នុងបក្ស ដើម្បីបោះឆ្នោតម្ដងទៀត។ បើតាមទីភ្នាក់ងារព័ត៌មាន AFP លោក Dutton ប្រាប់លោក ធើនប៊ូលតាមទូរសព្ទថា លោកទទួលបានសំឡេងគាំទ្រគ្រប់គ្រាន់ហើយ។
យ៉ាងណាមិញ លោក ធើនប៊ូល អះអាងថា គូប្រជែងរបស់លោកមិនទាន់មានសំឡេងភាគច្រើនពីសមាជិកបក្សពលករនៅឡើយទេ។ នាយករដ្ឋមន្ត្រីដែលរងសម្ពាធរូបនេះក៏ប្រកាសថា លោកនឹងមិនរាថយឡើយ តែនឹងចាកចេញពីនយោបាយ បើបក្សលែងគាំទ្ររូបលោក។
បើលោក Dutton អាចរកសំឡេងគ្រប់ ការប្រជុំផ្ទៃក្នុងបក្សថ្មីទៀត ត្រូវធ្វើនៅថ្ងៃទី២៤ ខែសីហា ដើម្បីបោះឆ្នោតរើសមេដឹកនាំបក្សថ្មី ហើយលោក ធើនប៊ូល មិនអាចឈរឈ្មោះប្រជែងបានទេ ហើយត្រូវចាកចេញពីសភាទៅទៀត។ ប្រធានបក្សកាន់អំណាច នឹងអង្គុយកៅអីនាយករដ្ឋមន្ត្រីស្វ័យប្រវត្តិ។ មកទល់ពេលនេះ រដ្ឋមន្ត្រីក្នុងរដ្ឋាភិបាលលោក ធើនប៊ូល យ៉ាងតិច១០នាក់ហើយដែលបានលាលែង ឬដាក់ពាក្យលាលែង។ រដ្ឋមន្ត្រីហិរញ្ញវត្ថុដ៏មានឥទ្ធិពល Mathias Cormann និងរដ្ឋមន្ត្រីការងារ និងអប់រំ និយាយថា ឈប់គាំទ្រលោក ធើនប៊ូល ទៀតហើយ។
សូមបញ្ជាក់ថា មិនដែលមាននាយករដ្ឋមន្ត្រីអូស្ត្រាលីណាអាចកាន់កាប់រដ្ឋាភិបាលពេញអាណត្តិឡើយ តាំងពីឆ្នាំ២០០៧ មកពេលដែលលោក John Howard ចាញ់ឆ្នោត។ ការផ្លាស់ប្ដូរនាយករដ្ឋមន្ត្រីញឹកញាប់ សឹងក្លាយជាប្រពៃណីក្នុងនយោបាយរបស់អូស្ត្រាលីទៅហើយ ជាពិសេសពេលមានការប្រែប្រួលក្បាលម៉ាស៊ីនដឹកនាំបក្សកាន់អំណាច៕
Tag:
អូស្ត្រាលី
Malcolm Turnbull
© រក្សាសិទ្ធិដោយ thmeythmey.com