ជាតិ
សេដ្ឋកិច្ច
ក្រសួងសេដ្ឋកិច្ច និងធនាគារជាតិ ស្នើឲ្យមីក្រូហិរញ្ញវត្ថុ បន្ធូរបន្ថយដល់កសិកររងគ្រោះទឹកជំនន់
× ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ និងធនាគារជាតិនៃកម្ពុជា បានអំពាវនាវឲ្យគ្រឹះស្ថានផ្ដល់ប្រាក់កម្ចី ពិនិត្យលទ្ធភាពបន្ធូរបន្ថយដល់កសិករដែលរងគ្រោះទឹកជំនន់។ នេះបើតាមសេចក្ដីថ្លែងការណ៍រួមរបស់ស្ថាប័នទាំងពីរ នៅថ្ងៃទី២៤ខែសីហានេះ។
កសិករក្នុងបណ្ដាខេត្តមួយចំនួន កំពុងជួបរងគ្រោះទឹកជំនន់។ ដើម្បីសម្រាលបន្ទុកនេះ ក្រសួងសេដ្ឋកិច្ច និងធនាគារជាតិ អំពាវនាវ និងលើកទឹកចិត្ត ឲ្យគ្រឹះស្ថានធនាគារ និងមីក្រូហិរញ្ញវត្ថុ ពិនិត្យលទ្ធភាពសងរបស់កសិករ ដែលរងគ្រោះទឹកជំនន់ សម្រាប់ធ្វើជាមូលដ្ឋានក្នុងបន្ធូរបន្ថយរយៈពេលសង បន្ថយអត្រាការប្រាក់ ឬមិនយកការប្រាក់ក្នុងរយៈពេលណាមួយ និងមិនត្រូវរឹបអូសទ្រព្យសម្បត្តិរបស់កសិករ ព្រមទាំងផ្ដល់ដំណោះស្រាយសមស្របផ្សេងៗ។
ស្ថាប័នទាំងពីរនេះ ជំរុញឲ្យគ្រឹះស្ថានផ្ដល់កម្ចី បន្តតាមដានស្ថានភាព និងផលប៉ះពាល់នៃគ្រោះទឹកជំនន់លើប្រជាកសិករ និងផ្ដល់ការគាំទ្រចាំបាច់ ស្របតាមកាលៈទេសៈជាក់ស្ដែង។
សេចក្ដីថ្លែងការណ៍នេះបន្ថែមថា៖«គ្រឹះស្ថានធនាគារ និងមីក្រូហិរញ្ញវត្ថុ បន្តផ្ដល់ឥណទានដោយប្រុងប្រយ័ត្ន និងមានយន្តការដោះស្រាយទន់ភ្លន់ចំពោះអតិថិជនដែលរងផលប៉ះពាល់ពីគ្រោះទឹកជំនន់ជាក់ស្ដែង ដើម្បីរក្សាស្ថិរភាពវិស័យហិរញ្ញវត្ថុ»។
«ក្រសួងសេដ្ឋកិច្ច និងហិរញ្ញវត្ថុ និងធនាគារជាតិ ជឿជាក់ថា គ្រឹះស្ថានធនាគារ និងមីក្រូហិរញ្ញវត្ថុ អាជ្ញាធរមូលដ្ឋាន និងដៃគូពាក់ព័ន្ធទាំងអស់ នឹងចូលរួមសហការជួយសម្រាលទុក្ខលំបាក និងសម្រាលសម្ពាធហិរញ្ញវត្ថុរបស់ប្រជាកសិករដែលរងគ្រោះពីទឹកជំនន់ជាក់ស្ដែង»។ នេះបើតាមសេចក្ដីថ្លែងការណ៍ខាងលើនេះ។
សូមបញ្ជាក់ថា ក្រសួងសេដ្ឋកិច្ច និងធនាគារជាតិ បានចេញសេចក្ដីថ្លែងការណ៍រួមនេះ បន្ទាប់ពីសម្ដេចនាយករដ្ឋមន្ត្រី ហ៊ុន សែន នៅថ្ងៃទី២៣ខែសីហា បានអំពាវដល់គ្រឹះស្ថានផ្ដល់កម្ចី ពន្យារពេលសងប្រាក់ និងបន្ធរបន្ថយមិនយកការប្រាក់ក្នុងរយៈពេលណាមួយដល់ពលរដ្ឋដែលរងគ្រោះទឹកជំនន់៕
© រក្សាសិទ្ធិដោយ thmeythmey.com