ជាតិ
សេដ្ឋកិច្ច
ដូនពេញ, ចំការមន, ៧មករា មានតម្លៃដីខ្ពស់ជាងគេនៅភ្នំពេញ តែពុំសូវមានកំណើន
× ភ្នំពេញ៖ ក្នុងចំណោមខណ្ឌទាំង១២ ក្នុងរាជធានីភ្នំពញ ខណ្ឌដូនពេញមានតម្លៃដីខ្ពស់ជាងគេ បន្ទាប់មកខណ្ឌចំការមន ៧មករា និងខណ្ឌទួលគោក។ តម្លៃដីធ្លីក្នុងតំបន់ទាំងនេះ លើកលែងតែខណ្ឌទួលគោក គឺមានកំណើនតិចតួចបំផុត ក្នុងឆមាសទី១ឆ្នាំនេះ ធៀបនឹងឆមាសទី២ឆ្នាំ២០១៧ ដែលផ្ទុយពីខណ្ឌដែលកំពុងមានអភិវឌ្ឍថ្មីៗមួយចំនួន។ នេះបើតាមរបាយការណ៍ស្រាវជ្រាវរបស់ក្រុមហ៊ុន Key Real Estate ។
ខណ្ឌដូនពេញ ដីនៅជាប់ផ្លូវធំមានថ្លៃចន្លោះពី ៣០០០ ទៅ ១២០០០ដុល្លារក្នុងមួយម៉ែត្រក្រឡា ដែលក្នុងនោះតំបន់ផ្សារថ្មីមានតម្លៃខ្ពស់បំផុត។ រីឯដីនៅផ្លូវធំបន្ទាប់ គឺមានតម្លៃពី ២០០០ ទៅ៥០០០ដុល្លារ។
ខណ្ឌចំការមន ដីជាប់ផ្លូវធំមានតម្លៃពី ២៥០០ ទៅ ៩៥០០ដុល្លារក្នុងមួយម៉ែត្រក្រឡា។ សង្កាត់បឹងកេងកង១មានតម្លៃចន្លោះពី ៤០០០ ទៅ ៩៥០០ដុល្លារក្នុងមួយម៉ែត្រ។ រីឯដីនៅផ្លូវធំបន្ទាប់ គឺមានតម្លៃពី ១៥០០ ទៅ ៤៥០០ដុល្លារក្នុងមួយម៉ែត្រក្រឡា។
ខណ្ឌ៧មករា ដីនៅជាប់ផ្លូវធំមានតម្លៃ ៣៨០០ ទៅ ៧៥០០ដុល្លារក្នុងមួយម៉ែត្រក្រឡា ក្នុងនោះសង្កាត់អូរឫស្សីមានតម្លៃខ្ពស់ជាងគេ។ ចំពោះដីនៅផ្លូវធំបន្ទាប់ថ្លៃ ២២០០ ទៅ ៥៥០០ដុល្លារក្នុងមួយម៉ែត្រក្រឡា។
ខណ្ឌទួលគោក ដីជាប់ផ្លូវធំមានតម្លៃ ២៥០០ ទៅ ៥០០០ដុល្លារក្នុងមួយម៉ែត្រក្រឡា។ ដីជាប់ផ្លូវធំបន្ទាប់ គឺមានតម្លៃពី ១៧០០ ទៅ ៣០០០ដុល្លារ។
លោក ស៊ន សៀប នាយកប្រតិបត្តិក្រុមហ៊ុន Key Real Estate ថ្លែងថា ក្រៅពីខណ្ឌទួលគោក ខណ្ឌទាំងបីខាងលើមានកំណើនតម្លៃដីតិចតួចណាស់ ព្រោះតំបន់ទាំងនោះមានការអភិវឌ្ឍរួចស្រាប់ហើយ។ លោកបន្ថែមថា៖«លើកលែងតែខណ្ឌទួលគោក ដែលមានកំណើនតម្លៃដី ៦,៣ភាគរយ ព្រោះខណ្ឌនេះមានដីធ្លីសក្ដាសនុពលសម្រាប់ការអភិវឌ្ឍបន្តទៀត ពិសេសគម្រោងធំៗនៅទីនោះ ដូចជានៅបឹងកក់ជាដើម»។
ដោយឡែកដីធ្លីនៅខណ្ឌដែលមានការអភិវឌ្ឍថ្មីៗមួយចំនួន បន្តមានកំណើនខ្ពស់។ «ខណ្ឌមានជ័យមានកំណើនប្រមាណ ៦ភាគរយ ព្រោះខណ្ឌនេះបានផ្សាភ្ជាប់ការអភិវឌ្ឍថ្មីៗដូចជា ផ្លូវ៦០ម៉ែត្រជាដើម ខណៈខណ្ឌសែនសុខមានកំណើន ៦,៧ភាគរយ ដែលមានគម្រោងលំនៅឋានជាច្រើន និងហេដ្ឋារចនាសម្ព័ន្ធថ្មីៗនៅទីនោះ។ ខណ្ឌព្រែកព្នៅមានកំណើន ៧,១ភាគរយ ព្រោះខណ្ឌនេះបានតោងការអភិវឌ្ឍពីខណ្ឌសែនសុខ និងខណ្ឌជ្រោយចង្វារ និងមានគម្រោងពុះដីឡូត៍លក់ច្រើននៅទីនោះ»៕
© រក្សាសិទ្ធិដោយ thmeythmey.com