អាមេរិកប្រាប់អ៊ុយក្រែន៖ ទណ្ឌកម្មប្រឆាំងរុស្ស៊ីត្រូវនៅជាធរមានរហូតដល់រុស្ស៊ីព្រមចុះញ៉ម

អន្តរជាតិ

អាមេរិកប្រាប់អ៊ុយក្រែន៖ ទណ្ឌកម្មប្រឆាំងរុស្ស៊ីត្រូវនៅជាធរមានរហូតដល់រុស្ស៊ីព្រមចុះញ៉ម

25, Aug 2018 , 9:59 pm

រូបភាព

ដោយ: ថ្មីៗ

អាមេរិកប្តេជ្ញារក្សាទុកទណ្ឌកម្មប្រឆាំងរុស្ស៊ីរហូតដល់មហាអំណាចមួយនេះផ្លាស់ប្តូរឥរិយាបថរបស់ខ្លួនសិន ហើយខ្លួនបន្តគាំទ្រការ។ ទណ្ឌកម្មអាមេរិកប្រឆាំងរុស្ស៊ី គឺឆ្លើយតបនឹងការលូកលាន់ការបោះឆ្នោតនៅអាមេរិកកាលពីឆ្នាំ ២០១៦ និង ការឈ្លានពានអ៊ុយក្រែនក្នុងឆ្នាំ ២០១៤។

ក្នុងសន្និសីទសារព័ត៌មាននៅទីក្រុងគៀវប្រទេសអ៊ុយក្រែន ទីប្រឹក្សាប្រធានាធិបតីអាមេរិក ចន បុលតុន បានប្រកាសថា អាមេរិកមិនមានគោលការណ៍បន្ធូរបន្ថយឬដកទណ្ឌកម្មរុស្ស៊ីទេ។ ការដកទណ្ឌកម្មនេះអាចធ្វើទៅបានដរាបណា អាមេរិកបានឃើញឥរិយាបថវិជ្ជមានរបស់រុស្ស៊ីជាមុនសិន។

យោងតាមទីភ្នាក់ងារព័ត៌មាន Reuters លោក បុលតុន និយាយដូច្នេះ៖ ទណ្ឌកម្មដែលមានទាំងអម្បាលម៉ានស្ថិតនៅជាធរមានដដែលរហូតដល់ពេលដែលមានការផ្លាស់ប្តូរឥរិយាបថរបស់ក្រុងម៉ូស្គូ»។

លោក បុលតុន បាននិយាយដូច្នេះបន្ទាប់ពីជួបពិភាក្សាទ្វេភាគីជាមួយប្រធានាធិបតីអ៊ុយក្រែន លោក Petro Poroshenko ជុំវិញបញ្ហាប្រឈមដូចវិបត្តិភាគខាងកើតអ៊ុយក្រែន និងលទ្ធភាពនៃការចូលជាសមាជិកបក្សសម្ព័ន្ធយោធាណាតូ។ លោក បុលតុន ក៏ឆ្លៀតប្រាប់មេដឹកនាំអ៊ុយក្រែនឲ្យប្រុងប្រយ័ត្នរឿងរុស្ស៊ីលូកលាន់ក្នុងការបោះឆ្នោតប្រធានាធិបតីនៅឆ្នាំក្រោយដូចគ្នា។

ទាក់ទិននឹងបញ្ហាសមាជិកភាពអ៊ុយក្រែនក្នុងអង្គការណាតូ ទីប្រឹក្សាសន្តិសុខរូបនេះបានគូសបញ្ជាក់ដែរថា អ៊ុយក្រែនកំពុងប្រឹងប្រែងខ្លាំងដើម្បីចូលជាសមាជិកសម្ព័ន្ធយោធានេះប៉ុន្តែវានៅមានកិច្ចការច្រើនដែលត្រូវធ្វើ។

«បញ្ហានៅច្រើនទៀតហើយវាពឹងផ្អែកលើការប្រឹងប្រែងរបស់អ៊ុយក្រែនក្នុងការបំពេញលក្ខខណ្ឌទាំងផ្នែកនយោបាយ និងយោធាដែលចាំបាច់ដើម្បីក្លាយជាសមាជិកអង្គការណាតូបាននោះ»។ នេះជាការលើកឡើងរបស់លោក បុលតុន។

យ៉ាងណាក៏ដោយ ចេតនាចង់ក្លាយជាសមាជិកបក្សសម្ព័ន្ធយោធាណាតូ និងជាសមាជិកសហភាពអឺរ៉ុបរបស់អ៊ុយក្រែនជាមូលហេតុដែលធ្វើឲ្យអ៊ុយក្រែនធ្លាក់ខ្លួនជួបវិបត្តិនយោបាយឆ្នាំ ២០១៤ និងត្រូវរុស្ស៊ីឈ្លានពាន និងត្របាក់យកឧបទ្វីបគ្រីមៀ ជាបន្តបន្ទាប់។ រុស្ស៊ីជំទាស់ដាច់ខាតរាល់ការចូលរួមជាមួយអឺរ៉ុបជាពិសេសសម្ព័ន្ធយោធានេះព្រោះមហាអំណាចនេះចាត់ទុកថា វាជាគ្រោះថ្នាក់សម្រាប់សន្តិសុខរបស់ខ្លួនទៅថ្ងៃមុខផង។ ដូច្នេះហើយ ការឈានជើងរបស់អ៊ុយក្រែនចូលក្នុងបក្សសម្ព័ន្ធយោធាណាតូជារឿងលំបាក និងស្មុគស្មាញបំផុតមួយ។

ជុំវិញសមាជិកភាពរបស់អ៊ុយក្រែននេះដែរ លោក បុលតុន បានពន្យល់បន្ថែមថា វាជារឿងចាំបាច់ដែលត្រូវមានការដោះស្រាយវិបត្តិនៅអ៊ុយក្រែនដែលនៅមានជាមុនសិន។ ទីប្រឹក្សាលោក ត្រាំ នេះក៏ព្រមានដែរថា បើសិនជាបណ្តោយឲ្យបញ្ហាគ្រីមៀ និងជម្លោះប្រដាប់អាវុធភាគខាងកើតនៅបន្តរ៉ាំរ៉ៃ វានឹងកាន់តែគ្រោះថ្នាក់ខ្លាំងនៅពេលអនាគតផង៕