ទឹកជំនន់៖ សមាគមមីក្រូហិរញ្ញវត្ថុ ស្នើឲ្យសមាជិកខ្លួន ដោះស្រាយការសងបំណុលឲ្យសមស្រប

ជាតិ

ទឹកជំនន់៖ សមាគមមីក្រូហិរញ្ញវត្ថុ ស្នើឲ្យសមាជិកខ្លួន ដោះស្រាយការសងបំណុលឲ្យសមស្រប

26, Aug 2018 , 10:19 pm

រូបភាព

ដោយ:

ភ្នំពេញ៖ សមាគមមីក្រូហិរញ្ញវត្ថុកម្ពុជា (CMA) អះអាងថាខ្លួនកំពុងយកចិត្តទុកដាក់ចំពោះផលប៉ះពាល់របស់ពលរដ្ឋពីគ្រោះទឹកជំនន់។

«សមាគមមីក្រូហិរញ្ញវត្ថុកម្ពុជា នឹងបន្តតាមដានស្ថានភាព និងផលប៉ះពាល់ដែលអាចកើតមានជាយថាហេតុ ព្រមទាំងត្រៀមលក្ខណៈសម្បត្តិចូលរួមក្នុងយន្តការសមស្របដើម្បីសម្រាលបន្ទុកប្រជាពលរដ្ឋដែលទទួលរងផលប៉ះពាល់ធ្ងន់ធ្ងរដោយផ្ទាល់ពីគ្រោះធម្មជាតិដល់ជីវភាព និងផលរបររបស់ពួកគាត់»។ នេះបើតាមសេចក្ដីថ្លែងការណ៍របស់សមាគមនេះ នៅថ្ងៃទី២៤ខែសីហា។

ទន្ទឹមនឹងនេះ សមាគមបានអំពាវ និងលើកទឹកចិត្តឲ្យគ្រឹះស្ថានមីក្រូហិរញ្ញវត្ថុ បន្តផ្ដល់ឥណទានដោយប្រុងប្រយ័ត្ន ដោយពិនិត្យលទ្ធភាពជាក់ស្ដែង និងផ្ដល់យន្តការដោះស្រាយទន់ភ្លន់ ចំពោះអតិថិជនដែលរងផលប៉ះពាល់ធ្ងន់ធ្ងរពីគ្រោះទឹកជំនន់។

CMA ស្នើឲ្យសមាជិករបស់ខ្លួន បន្តតាមដានស្ថានភាព និងផលប៉ះពាល់នៃគ្រោះធម្មជាតិលើអតិថិជនគ្រឹះស្ថានមីក្រូហិរញ្ញវត្ថុ ដោយផ្ដល់ការគាំទ្រចាំបាច់ស្របតាមកាលៈទេសៈជាក់ស្ដែង និងរាយការណ៍មកសមាគមមីក្រូហិរញ្ញវត្ថុកម្ពុជា ឲ្យទាន់ពេលវេលា។

គួរបញ្ជាក់ថា នៅថ្ងៃទី២៣ខែសីហា ប្រមុខរដ្ឋាភិបាលសម្ដេច ហ៊ុន សែន បានអំពាវឲ្យគ្រឹះស្ថានផ្ដល់កម្ចី បន្ធូរបន្ថយបញ្ហាបំណុលចំពោះពលរដ្ឋរងគ្រោះទឹកជំនន់។ ជាមួយគ្នានេះ ក្រសួងសេដ្ឋកិច្ច និងហិរញ្ញវត្ថុ និងធនាគារជាតិ ក៏បានស្នើដល់គ្រឹះស្ថានមីក្រូហិរញ្ញវត្ថុ ស្រដៀងគ្នានេះដែរ ដើម្បីឲ្យមានការយោគយល់ដល់កសិករដែលរងគ្រោះ៕