ជាតិ
រូបភាពពីហ្វេសប៊ុក ក្រសួងទេសចរណ៍ លោក ទិត ចន្ថា រដ្ឋលេខាធិការក្រសួងទេសចរណ៍
×![]()
ភ្នំពេញ៖ ក្រសួងទេសចរណ៍ និងក្រសួងធម្មការ និងសាសនា នឹងរៀបចំវត្តអារាមដែលមានភាពលេចធ្លោជាងគេ នៅតាមតំបន់គោលដៅទេសចរណ៍សំខាន់ៗ ឲ្យក្លាយទៅជាវត្តទេសចរណ៍ដ៏ទាក់ទាញ ដើម្បីចូលរួមលើកកម្ពស់សក្តានុពលទេសចរណ៍ ឲ្យកាន់តែរីកចម្រើនឡើងថែមទៀត។ នេះបើតាមហ្វេសប៊ុកក្រសួងទេសចរណ៍ នៅថ្ងៃទី២៣ ខែសីហា។
រដ្ឋលេខាធិការក្រសួងទេសចរណ៍ លោក ទិត ចន្ថា បានបញ្ជាក់ថា ការរៀបចំឲ្យមាន«វត្តទេសចរណ៍»គឺជាការជំរុញឲ្យទីអារាមសំខាន់ៗ នៅក្នុងតំបន់គោលដៅទេសចរណ៍ ប្រែក្លាយទៅជាកន្លែងទាក់ទាញទេសចរ និងទទួលទេសចរទៅទស្សនានៅក្នុងទីអារាមទាំងនោះ ស្របតាមគោលនយោបាយរដ្ឋាភិបាល ដែលកំពុងជំរុញទេសចរជាតិ-អន្តរជាតិ ឲ្យទៅទស្សនានៅគ្រប់គោលដៅនៃប្រទេសកម្ពុជា។
លោក ទិត ចន្ថា បាននិយាយថាវត្តលេចធ្លោរជាងគេ ត្រូវមានទីតាំងល្អ និងប្រវត្តិអស្ចារ្យ ព្រមទាំងមានរចនាសម្ព័ន្ធគ្រប់គ្រងល្អ ដោយមានកិត្តិនាមល្បីល្បាញផង។ ចំណែកព្រះសង្ឃ ឬអាចារ្យវត្ត ក៏អាចធ្វើជាមគ្គុទ្ទេសក៍ទេសចរ ដើម្បីបង្ហាញពីប្រវត្តិនិងរឿងរ៉ាវពាក់ព័ន្ធវត្តទាំងនោះផងដែរ។
«វត្តអារាមនៅតាមតំបន់គោលដៅទេសចរណ៍សំខាន់ៗមួយចំនួន កំពុងរៀបចំបណ្ដើរៗ នឹងមានទេសចរទស្សនាជា បន្តបន្ទាប់»។ នេះជាការបញ្ជាក់របស់រដ្ឋលេខាធិការ ដែលបានបន្ថែមថា ក្រុមមន្ត្រីអន្តរក្រសួង នឹងជួបពិភាក្សាគ្នាម្ដងទៀតក្នុងការប្រមូលធាតុចូលបន្ថែម ដើម្បីដាក់ជូនរដ្ឋមន្ត្រីសម្រេចការងារជាផ្លូវការនៅចុងឆ្នាំ២០១៨ ឬអាចនៅដើមឆ្នាំ២០១៩។
ការរៀបចំវត្តទេសចរណ៍នេះ មានគោលដៅសំខាន់ចំនួន២ រួមមានគឺ៖ គោលដៅទី១ គឺទាក់ទាញភ្ញៀវទេសចរ ឲ្យស្នាក់នៅបានរយៈពេលយូរ ដោយចំណាយប្រាក់ច្រើននៅកម្ពុជា ក៏ដូចជាផ្ដល់នូវប្រាក់ចំណូល ដល់វត្តផងដែរ។ សម្រាប់គោលដៅទី២ គឺផ្ដល់ការអប់រំ និងការយល់ដឹងដល់ភ្ញៀវទេសចរជាតិ-អន្តរជាតិ ក្នុងការសិក្សាស្វែងយល់ពីព្រះពុទ្ធសាសនានៅកម្ពុជា ដែលជាសាសនារបស់រដ្ឋជាដើម។ នេះបើតាមក្រសួងទេសចរណ៍៕
Tag:
វត្តទេសចរណ៍
ទិត ចន្ថា
© រក្សាសិទ្ធិដោយ thmeythmey.com
