កីឡាជាតិ
ជាតិ
Asian Games៖ សាលី អ៊ូមើត ត្រូវបានថ្នាក់ដឹកនាំស្នើឲ្យដកខ្លួនពីការប្រកួតវិញ្ញាសាម៉ូតូធំ
×![]()
ក្រោយប្រកួតបានមួយជុំ កីឡាករ សាលី អ៊ូមើត ម្ចាស់មេដាយមាសលើវិញ្ញាសា Ski Modified ត្រូវបានថ្នាក់ដឹកនាំកីឡាកម្ពុជាស្នើឲ្យដកខ្លួនពីការប្រកួតលើវិញ្ញាសាម៉ូតូធំ (Endurance Runabout Open) សម្រាប់ការប្រកួត Asian Games នៅឥណ្ឌូណេស៊ី។ ការស្នើបែបនេះ ព្រោះមិនចង់ឲ្យរបួសស្មារបស់កីឡាករ សាលី អ៊ូមើត មានបញ្ហាកាន់តែធ្ងន់។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានបញ្ជាក់ថា លោក និងថ្នាក់ដឹកនាំសហព័ន្ធកីឡាម៉ូតូទឹកកម្ពុជាបានសម្រេចឲ្យកីឡាករ សាលី អ៊ូមើត ដកខ្លួនពីការប្រកួតវិញ្ញាសាម៉ូតូធំ បន្ទាប់ពីគ្រូពេទ្យពិនិត្យឃើញថា រូបគេមានរបួសដៃ(ធ្លាក់ស្មា)។ នាយបេសកកម្មរូបនេះបន្ថែមថា បើមិនសម្រេចបែបនេះទេ អាចធ្វើឲ្យរបួសរបស់ អ៊ូមើត មានបញ្ហាកាន់តែធ្ងន់ធ្ងរថែមទៀត។
បញ្ហារបួសនេះ បានក្លាយជាបញ្ហារាំងស្ទះនាំឲ្យ សាលី អ៊ូមើត ធ្វើមិនបានល្អសម្រាប់ការប្រកួតជុំទី១លើវិញ្ញាសានេះ ដោយរូបគេបានបញ្ចប់ត្រឹមចំណាត់ថ្នាក់លេខ៩ក្នុងចំណោមកីឡាករ១៣រូប ក្រោយរកបាន៣២៦ពិន្ទុ។ បញ្ហារបួសធ្លាក់ស្មានេះ គឺកើតឡើងក្នុងអំឡុងពេលរូបគេ ខិតខំប្រឹងប្រែងប្រកួតដណ្តើមយកមេដាយមាសលើវិញ្ញាសា Ski Modified និងមេដាយសំរឹទ្ធលើវិញ្ញាសា Runabout 1100 Stock។
គិតត្រឹមថ្ងៃទី២៦ ខែសីហា ឆ្នាំ២០១៨ កម្ពុជាស្ថិតនៅលេខ២២បណ្តោះអាសន្នក្នុងតារាងមេដាយ ក្រោយឈ្នះមេដាយមាសពីរ និងសំរឹទ្ធមួយ។ អត្តពលិកចិនបន្តគ្រងកំពូលតារាងមេដាយ ក្រោយឈ្នះមេដាយមាស៧៨ ប្រាក់៥៩ និងសំរឹទ្ធ៣៧ ហើយតាមពីក្រោយដោយកូរ៉េខាងត្បូង អ៊ីរ៉ង់ និងម្ចាស់ផ្ទះឥណ្ឌូណេស៊ី៕
Tag:
ម៉ូតូទឹក
វ៉ាត់ ចំរើន
សាលី អ៊ូមើត
Asian Games
© រក្សាសិទ្ធិដោយ thmeythmey.com
